For the month of July and August 2020, millions of our brothers and sisters, and interested people, watch the 2020 convention program as one big family.

Jehovah Witness for 240 countries don de wait for this “Always Dey Happy”! Convention, to attend-am for Assembly Halls, convention centers, stadiums and other place wey we rent. But the Governing Body decide say instead make we gather for the convention, we go do-am make people watch-am from their house. This one na to protect all the people wey go attend the convention make they no catch the disease wey de spread. This na the first time since 1897 wey the organization no do convention wey people go gather for the same place.

One member of the Governing Body, Kenneth Cook, Jr. talk say, “When they cancel the regional conventions, our target na to get only one convention wey everybody for all part of the world go attend for the same period of time. We know say we no go even get reach four months to prepare the program for different-different language. We de normally use one year to finish this kind project or e fit even pass. So we really dey happy when they release the first part of the program for July 6, 2020 for about 400 languages. We de expect say the program go dey for 511 languages!”

One sister wey na only e de train e three children talk about why this new arrangement dey fine. E talk say: “Na true say we don miss our brothers and sisters, but this arrangement really dey fine for children. As them de watch the program for small-small part, e de help them to really listen well. If they don tire, we fit pause-am. Nobody de miss even one minute. Friday program really make-am clear say children be like arrows, and to enjoy better life, we need to set them well to use their life work for Jehovah. This convention style really help me do this one for my children.”​—Psalm 127:4.

News company for different part of the world talk about the special style of our convention. For example, Robert Hendriks, wey dey in charge for the Public Information Desk for America, talk say: “Plenty news people write stories about the convention. Many of the stories talk about how the organization don use the things wey science make to do the convention, and protect the life of people.”

The 2020 “Always Dey Happy”! Convention don add new style wey e really fine, for the way Jehovah de show us say na e be our teacher wey high pass.​—Isaiah 30:20.