Miyesi ja Julayi soni Ogasiti, abale ni alongo ŵajinji soni ŵandu ŵa chidwi ŵalolele msongano wachigawo wa 2020.

Ŵa Mboni sya Yehofa ŵawujembecheyaga mwachidwi msongano wachigawo wa mtwe wakuti, “Aŵeje Ŵakusangalala.” Yaliji yakuti msonganowu chiwutendechele m’malo gakutendela misongano soni mmalo gane gakulekanganalekangana m’yilambo yakwana 240. Pakusaka kwachenjela ŵandu ŵachasimanikwe pamsonganowu ku ulwele wa kolona, Likuga Lyakulongolela lyasagwile yakuti ŵandu pachilambo chosope agambe kuwulolela kupitila pa yipangisyo yawo. Kutandila mu 1897, keleka kali kandanda kuti gulu jitende msongano wachigawowu mu litala lyeleli.

M’bale Kenneth Cook, Jr., jwa mu Likuga Lyakulongolela jwatite, “Tuli tulekasisye kuti abale akasongana malo gamo, twapatile litala lyakuti ŵandu pachilambo chosope atende msonganowu mwakulandana soni pandaŵi jakulandana. Myoyo kuti msonganowu ukomboleche, twamanyililaga kuti tukusosekwa tulinganye yakuti msonganowu ugopoleledwe m’yiŵecheto yejinji nambo jikapunda miyesi mcheche. Kuti masengo gelega gakomboleche, ndaŵi syejinji pakusajigala chaka chimo kapena kupunda. Twaliji ŵakusangalala kuti mbali jandanda ja msonganowu jawonechele pa Julayi 6, 2020 m’yiŵecheto yakwana 400. Tukwembecheya kuti yiŵechetoyi chiyiche pa 511.”

Pakusala ya umbone ŵapatile ŵandu ligongo lya msonganowu, mlongo jwine jwakulela jika ŵanache ŵatatu jwaŵechete kuti, “Atamose kuti nganituwonegana ni achimjetu ŵane, nambope kutenda msongano mwalitalali kukamuchisye mnope ŵanache. Kulolela msonganowu pandaŵi syakulekanganalekangana kwakamuchisye ŵanacheŵa kuti awupikanichisye chenene msonganowu. Naga tukusaka kupumula, twagambaga kwimika kaje msonganowo ni kupumula. Pangali mfundo jele mundu jampitaga. Ngani jine ja lya Lyamsano, jasasile kuti ŵanache ali mpela mipamba. Jemanjaji akusosekwa kwakamuchisya kuti akole yakulinga yakumtumichila Yehofa ni chakulinga chakuti aŵeje ŵakusangalala. Kusala yisyene msonganowu ungamuchisye kuti ndende yakomboleka pakwakamuchisya ŵanache ŵangu kola yakulingayi.”—Salimo 127:4.

Msongano wachigawowu waliji wakutesya chidwi mnopemnope kwa ŵakulokota ngani pa chilambo chosope chapasi. Mwachisyasyo, Robert Hendriks jwakusalolela dipatimenti jakuwandisya ngani ku United States jwasasile kuti, “Ŵakulokota ngani ŵajinji ŵalembile yejinji yakwamba msongano wachigawowu. Yalembile jemanjaji yasalaga kuti gulu jetuji jikamulichisye masengo yipangiso yamakono pakugulusya msongano nichakulinga chakwachenjela ŵandu ku ulwele.”

Msongano wachigawo wa 2020 wakuti, “Aŵeje Ŵakusangalala” watuwutesile mu litala lyasambano nambo lyakusangalasya, ulosisye kuti Yehofa ali jwakwiganya jwetu.—Yesaya 30:20.