Ena nodra ivolatukutuku na iVakadinadina i Jiova, e duatani duadua na nodra soqo ni veiwasewase ni 2020 e kena usutu ‘Meda Marau Tiko Ga’! E vakadewataki na porokaramu ena sivia na 500 na vosa qai saravi ena Internet. E vica na ka dredre era sotava na daunivakadewa me vaka ni lekaleka na gauna mera vakaotia kina na nodra cakacaka, qai sega ni tu kece na nodra iyaya ni cakacaka.

E kaya e dua na lewe ni timi ni vakadewa ni vosa vaKikiyu mai Kenya: “Ni sa vakatabui me dua e gole mai Peceli, era sa lailai ga na vakayagataki ena katokatoni. Keitou mani vakayagataki ira na mataveitacini era tu mai vakayawa. Keimami marautaka vakalevu ni keimami vakadinadinataka na veitokoni ni yalo tabu i Jiova.”

Era sotava tale ga qori na timi ni vakadewa ni vosa vaGalu ni Korea, kei na timi ni vakadewa ni vosa vaKorea. Era sa sega ni rawa ni gole mai Peceli mera mai katokatoni na tacida era dau mai veivuke tiko.

Era walia na ituvaki qori na tacida nira cakava na vanua ni katokatoni ena nodra vale. Era cautaka na tacida e levu na iyaya me vakayagataki ena katokatoni. Kena ikuri, ni sa sega ni caka na soqo ni veiwasewase, sa qai vakayagataka na valenivolavola ni tabana eso na camera ni Vale ni Soqoni Lelevu me katoni kina na porokaramu ni vosa vaGalu.

Era sotava na daunivakadewa e Venezuela na leqa ni Internet. So tale e sega na nodra iyaya ni cakacaka. Ia era vakayagataka na daunivakadewa na ka ga sa tu mera qarava kina na nodra cakacaka. Kena ivakaraitaki, era vakayagataka na daunivakadewa ena vanua ni katokatoni na meteresi me kua kina na rorogo e veivakasosani.

E tiko e dua na timi ni vakadewa ni vosa vakaZande e Juba, ena Ceva kei Sudan. E kaya e dua na daunivakadewa: “Na gauna au rogoca kina ni keitou sa na katona na porokaramu ni soqo ni veiwasewase, au kaya ga, ‘Sa na sega tu ga ni rawa! Me katoni vakacava e sivia ni 90 na vunau kei na vidio ena loma ni rua ga na vula, sa na sega tu ga ni rawa.’ Ia ni mai qaravi rawa cakacaka, au vakadeitaka sara ga ni sega ni dua na ka e dredre vei Jiova, ena yaco ga na nona inaki. E dau vakasakiti tu ga na ka e cakava!”—Maciu 19:26.

E dua dina na iloloma mai vei Jiova na porokaramu ni Soqo ni Veiwasewase ni 2020, ‘Meda Marau Tiko Ga’! ni “nona inaki me bula na tamata kece ga, mera mai kila vinaka na ka dina.”—1 Timoci 2:4.