Ipan domingo 25, metstli octubre, 2020, kiski Traducción del Nuevo Mundo ipan eyi tlajtoli tlen altepetl India: gujarati, kannada uan punyabí. Kema kipanoltiyayaj nopa grabación tlen nopa tlamachtili, kiijtojkej ni Biblias ueliskiaj kikixtisej ipan ininteléfono o ipan inintableta. Nochi toikniuaj kiitakej nopa ueyi tlanechikolistli ipan ininchaj uan ika tiotlak uelkej kikixtiaj nopa Biblia ika inintlajtol.

Kiijtouaj itstokej 61 millones maseualmej katli kamanaltij gujarati.

Katli kitlajtolkuepkej Biblia eliyayaj 12 toikniuaj, uan kitlamichijkej ipan chikomej xiuitl. Se toikni katli tlajtolkuepa kiijtok: “Tlauel tiyolpakij pampa nama tijpiaj Biblia ika totlajtol. Nima mokuamachilia, yeka konemej nojkia uelis kipouasej”.

Seyok toikni katli tlajtolkuepa kiijtok: “Ipan ni Biblia sampa motlalik itoka toTeotsij, Jehová, kampa kinamiki yas. Timotemachiaj kema toikniuaj ininselti momachtisej, kinpaleuis nojua kuali ma tlaneltokakaj”.

Timotemachiaj kej motlajtolkuepki Biblia kinpaleuis ma asi ipan ininyolo maseualmej uan kinpaleuis katli kinekij kiixmatisej Jehová (Salmo 25:9).

Amo sanse moijtoua yon moijkuiloua tlajtoli kannada. Nojkia, amo sanse kamanaltij ipan pilaltepetsitsij. Yeka, katli tlajtolkuepaj monejki kitekiuisej tlajtoli tlen nochi kikuamachiliskiaj uan tlen amo ouij. Maske kiampa kichiuaskiaj, monekiyaya amo kipatlasej tlen kiijtoua Biblia.

Ipan ni tekitl, tlapaleuijkej 10 tlajtolkuepanij, uan kitlamiltijkej nochi Biblia ipan chikome xiuitl.

Se katli tlajtolkuepa kiijtok: “Nimoiljuik Biblia kisaskia ipan xiuitl 2021 pampa momoyajki kokolistli COVID-19. Maske kiampa nimoiljuijtoya, Jehová amo tleno kitsakuilia, yeka kichiuas tlen mosentlalijtok”.

Timotemachiaj Biblia ipan kannada kinpaleuis kipano 2,800 toikniuaj katli kamanaltij ni tlajtoli uan tlatekipanouaj ipan altepemej kampa kinyakana kali Betel ipan India. Nojkia, kinpaleuisej nechka 46 millones maseualmej katli kamanaltij ni tlajtoli, kiampa uelisej kimatisej “tlen toTeko motlalijtok kichiuas” (Romanos 11:33).

Chikuasej toikniuaj tlapaleuijkej ipan Traducción del Nuevo Mundo ipan punyabí, uan kitlamiltijkej ipan 12 xiuitl. Ni Biblia kinpaleuis kipano 100 millones maseualmej katli kamanaltij punyabí ipan India uan ipan sekinok altepemej.

Se katli tlajtolkuepa kiijtok: “Jehová techpaleuik kuali ma kisa ni tekitl pampa tojuantij amo tijpia miak tlamantli. Ni Biblia kinpaleuis toikniuaj nojua kuali ma tlaneltokakaj, kinyolchikauas uan kinpaleuis ma kiijiyouikaj tlen teipa kinpanos”.

Seyok toikni katli tlajtolkuepa kiijtok: “Maseualmej katli kipiaj kuali ininyolo, tlauel kinpaktis kipouasej ni Biblia. Uan tlauel kinpaleuis kema kitemosej sekinok tlamachtili pampa nochi motlajtolkueptok”.

Yeka, sanse kej kiijtojkej toikniuaj, tlauel tijtlaskamatiliaj Jehová pampa “tlauel miak tlamantli tlen yejyektsi[tsij]” kichijtok (Salmo 40:5).