Pa 25 October 2020, pa Sabata Bayibolu la Charu Chifya la Malemba Ngakupaturika lingutuzgika muvineneru vitatu ku India: Chigujarati, Chikanada ndi Chipunjabi. Mabayibolu ngenanga ngakutuzgika pa vipangizu va mazuŵa nganu pe ndipu nkhani yaki yinguchita kujambulika. Apharazgi anguwonere pulogilamu yeniyi kunyumba zawu. Pa pulogilamu yeniyi apharazgi ŵenga ndi mwaŵi wakupanga dawunilodi Bayibolu muchineneru chawu.

Pacharu chosi pe ŵanthu pafufupi 61 miliyoni wo alongoro Chigujarati.

Akufwatuliya 6 angugwira ntchitu yakufwatuliya Bayibolu kwa vyaka 7. Wakufwatuliya munyaki wangukamba kuti: “Tingukondwa ukongwa ndi kutuzgika kwa Bayibolu lenili. Bayibolu lenili le ndi mazu ngapusu ngakuti chinanga mbana angasuzgika cha kungavwisa.”

Wakufwatuliya munyaki so wangukamba kuti: “Zina laku Yehova likuwezekiyamu mu malu ngo lasanirikanga mu malemba ngakwambiriya. Tiziŵa kuti chivwanu cha abali ndi azichi chijengi chakukho asani agwiriskiyengi ntchitu Bayibolu lenili pakusambira pakuŵija.”

Bayibolu lenili ndambula kusuzga kuvwisa, ndipu tendi chigomezgu kuti ŵanthu wo aliŵerengengi akondwengi nalu ndipuso liwovyengi “ŵanthu akufwasa” kuti aziŵi Yehova.—Salimo 25:9.

Pe kupambana kukulu pakati mo aŵereŵete Chikanada ndipuso mo alembe. Mo aŵereŵete muchigaŵa chinyaki vipambana ndi muchigaŵa chinyaki. Mwaviyo, suzgu yikulu yo akufwatuliya akumananga nayu, nkhugwiriskiya ntchitu mazu ngakuvwika umampha ndipuso ngapusu ndi kuwonesesa kuti uthenga wa mu Bayibolu awufwatuliya mwauneneska.

Akufwatuliya anguto vyaka vakujumpha 7 kuti amalizi kufwatuliya Bayibolu losi lamphumphu. Akufwatuliya 10 ndiwu angugwira ntchitu yeniyi. Wakufwatuliya munyaki wangukamba kuti: “Ndaŵanaŵananga kuti Bayibolu lenili lituzgikengi cha mpaka mu 2021 chifukwa cha mulili wa COVID-19. Kweni kutuzgika kwa Bayibolu lenili kulongo kuti palivi cho chingatondekesa ntchitu yaku Yehova.”

Wakufwatuliya so munyaki wangukamba kuti: “Vakukondwesa ukongwa kuziŵa kuti ŵanthu wo alongoro Chikanada, sonu aŵerengengi mazu ngaku Yehova muchineneru chawu ndi kusaniya zina laki mumalu ngosi ngo lakhumbikiyanga kuŵamu!”

Te ndi chigomezgu kuti Bayibolu ili liwovyengi apharazgi akujumpha 2,800 wo alongoro Chikanada wo aja muchigaŵa cha nthambi ya ku India. Liwovyengi so ŵanthu pafufupi 46 miliyoni pacharu chosi wo alongoro chineneru chenichi kuziŵa ‘unandi wa chuma chaku Chiuta, zeru zaki zapachanya ukongwa ndipuso kuti waziŵa vinthu ukongwa.’—Aroma 11:33.

Ŵanthu 6 ndiwu angufwatuliya Bayibolu la Charu Chifya la chineneru cha Chipunjabi ndipu anguto vyaka 12 kuti amalizi kufwatuliya. Bayibolu lenili liwovyengi ŵanthu akujumpha 100 miliyoni wo alongoro chineneru chenichi ku India kweniso pacharu chapasi.

Wakufwatuliya munyaki wangukamba kuti: “Tinguchita waka vo tingafiska chifukwa tenga ndi vipangizu vimana vakugwiriya ntchitu. Yehova wangutiwovya kuti timalizi kugwira ntchitu yeniyi. Bayibolu lenili liwovyengi abali ŵidu kuti aje ndi chivwanu chakukho, chimangu ndipuso liŵawovyengi kuzikunthiyapu masuzgu ngo angazikumana nangu kunthazi.”

Wakufwatuliya munyaki so wanguti: “Ŵanthu a mtima wamampha akondwengi ukongwa kuŵerenga Bayibolu ili, ukongwa mabuku ngo ngakulembeka nge ndakatulu. Ŵanthu amuyanduwa ukongwa ndi vigaŵa vakufufuziya nkhani vo ve mu Bayibolu ili.”

Tosi tiwonga Yehova limoza ndi abali ŵidu chifukwa cha ‘ntchitu zaki zosi zakuziziswa’ zo ‘zinandi ukongwa ndipu nditondekengi kuzikonkhoska.’—Salimo 40:5.