M’bale Kegawale Biyama jwa mu komiti ja nyambi ku Papua New Guinea ni juŵakopwesye Baibulo ja Dziko Latsopano la Malemba Opatulika mu chiŵecheto cha Chihiri Motu. Pologalamu jakoposya Baibuloji ŵajijambwile pa ofesi ja nyambi ja Mboni sya Yehofa ku Port Moresby. Ŵandu ŵapikanile nganiji pa Nofemba 28, 2020. Ŵandu ŵakupunda 7,000 ŵapikanile nganiji.

Chilambo cha Papua New Guinea chikwete yiŵecheto yejinji yayikusaŵechetedwa kulekangana ni yilambo yine. Yiŵecheto yayikusaŵechetedwa kweleku yipali 840. Chiŵecheto cha Chihiri Motu chili chimo mwa yiŵecheto yitatu yayili yakumanyika chenene m’chilambomo. Chiŵechetochi chikusaŵechetedwa ni ŵandu chiŵandika 140,000.

M’bale Kukuna Jack jwa mu komiti ja nyambi jwasasile kuti, “Ŵandu ŵakusaŵecheta chiŵecheto cha Chihiri Motu aŵele ali mkwembecheya Baibuloji kwa ndaŵi jelewu. Tukumanyilila kuti Baibulo ja Dziko Latsopano jajikopwecheji, chijakamuchisye abale ni alongo ligongo akamulichisye masengo maloŵe gangasawusya soni jili jakupikanika chenene.”

Ŵandu ŵakwana 6 ni ŵaŵagopolele Baibuloji, mwamti ŵakamwile masengoga kwa yaka yakwana 10. Jumo mwa ŵagopolelaŵa jwatite, “Mwangakayichila ŵandu chasangalale kuliwona lina lya Mlungu m’Baibuloji kutyochela m’buku ja Genesesi mpaka Chiwunukuko. Tukumyamichila Yehofa pakutupa Baibuloji.”

Patuganichisya masengo gagapali paŵagopolelaga Baibuloji, tukulipikana mpela muŵapikanile jwakulochesya Yesaya. Jwalakwe jwatite, “AMBUJE, akutupa mtendele ligongo lyakuti yiliyose yitukusatenda, akusatulinganyichisya ni ŵalakwe.”—Yesaya 26:12.