“Kon mangamuyo ako kay Jehova, ginabuligan gid niya ako nga magkalma,” siling ni Brother Selim Taganov paggua niya sa prisuhan sang Oktubre 3, 2020. Si Selim, nga 19 anyos pa lang, ginpriso sing isa ka tuig kay nagpangindi sia nga magsoldado bangod sa iya konsiensia.

Si Selim natawo sa Ashgabat, ang kapital sang Turkmenistan. Sang bata pa sia, nanamian sia mag-eskwela kag mahilig sia sa musika. Nagasulat sia sing mga kanta kag mahilig man sia magkanta kag maggitara. Ang mga ginikanan, duha ka utod nga lalaki, kag mga abyan ni Selim nagasiling nga mabuot, maayo, kag malipayon sia nga tawo. Antes sang pamatbat sang korte nga guilty si Selim, ang abogado nga gin-asayn sang korte sa iya nagsiling: “Maayo sia kag honest nga pamatan-on nga wala nagapanigarilyo ukon nagapahubog kag bag-o lang sia makagradweyt sa hayskul. Ang pagpriso sa iya makahalit sang iya kabuhi.”

Mabudlay gid tuod ang kabuhi sa prisuhan. Pero, si Selim nagsiling: “Sang ara ako sa prisuhan, nagbakod pa gid ang akon relasyon kay Jehova. Nadumduman ko ang akon mga natun-an sa Biblia sang ara pa ako sa balay kag mas nag-athag sa akon ang kahulugan sini. Napalig-on man ako sang mga teksto pareho sang Isaias 41:10, 11.

“Sang pa ara ako sa Temporary Detention Facility kag nagahulat sang pamatbat sa akon, kabudlay gid kay wala ako sing maistorya kag masugiran sang akon ginabatyag. Pero nangamuyo ako sing bulig kay Jehova. Pagkatapos sina, ginabuligan na ako kag ginapabakod sang iban nga mga priso kag mga guardia, bisan pa nga sang primero indi maayo ang pagtrato nila sa akon. Tanan ini nagkumbinsi sa akon nga wala gid ako ginapabay-an ni Jehova.”

Ginpabakod man si Selim sang mga kauturan. “Sang ara ako sa prisuhan, madamo ang nagapadala sang ila pagpangamusta kag sang makapalig-on nga mga mensahe,” siling ni Selim. Ginasaulo ko ang ila ginasiling kag ginasulitsulit ini. Nagpabakod gid ini kag nagpaumpaw sa akon.”

Suno sa kasuguan sang Turkmenistan, mahimo nga ipatawag liwat si Selim para magsoldado. Kon matabo ina, kabalo si Selim nga sa sina nga tion posible sia masentensiahan sing mas malawig nga pagkapriso. “Sang nabatas ko ini nga pagtilaw sa bulig ni Jehova, wala na ako nahadlok. Ginahatagan ako ni Jehova sang kaisog kag kompiansa,” siling ni Selim.

Tanan kita kabalo nga may magaabot gid nga mga pagtilaw sa palaabuton. Si Selim nagapalig-on sa aton: “Sa mga makaagi man sang pareho sini nga pagtilaw, dumduma ang ginasiling sang Isaias 30:15: ‘Mangin mabakod kamo kon magpakalinong kamo kag magsalig sa akon.’”