Tidan Luban aguseragülei Leninskiy Rostov-on-Don, málühali ariñawagúa ídatima luba lan lerederun hakesin íbirigu Arsen Avanesov, Vilen Avanesov, luma Aleksandr Parkov. *

Arsen Avanesov

• Nasiruati: 1983, (Baku, Aserbaiyán)

• Abahüdaguni luáguti libagari: Aturiahati kei ínhenieru, nadagimein ligía lidan ábunaguni. Lidan liñüraü, hínsiñeti meha lun lahurerun rugby. Aturiahati giñe inglesi luma faransu.

  Lau hídehan lagübürigu gumeseti asandira ínsiñeni tuagu Bíbülia. Badiseiti kei gefenti luagu Heowá lidan irumu 2005.

Vilen Avanesov

• Nasiruati: 1952 (Baku, Aserbaiyán)

• Abahüdaguni luáguti libagari: Nadagimeinti aranseha katei lánina elekütrisida luma kei ábunaguti. Hínsiñeti lun lásügürün dan ábougua, ásüraha fein luma aliiha. Lúmagiñe nibureingili Bíbülia tuguyatima líburu to hínsiñetimaboun lun laliihan.

  Maríeiti tuma Stella lidan irumu 1980. Gasaanitiña aban wügüri irahü le gíribei Arsen, tuma aban würi irahü to gíriboun Elina. Anurahatiña liduheñu hageiragiñe lun Arümenioun lidan irumu 1988. Lidan ligiaméme irumu dagati aban hárabaganali Ereván Arümenia, le adügübei lun lekesidun katei fulasurugu adügati lira lun háguyun. Águyatiña lun Rostov-on-Don, Rusia. Badiseiti lidan irumu 2006

Aleksandr Parkov

• Nasiruati: 1967 (Spassk, Kemerovo)

• Abahüdaguni luáguti libagari: Lúmagiñe nibureingili nadagimeinti saragu óunigira animaalugu lidan fárüga luma óunigira bágasu. Madagimeinti abugaha tuéinamu burí kamión luma adaagua burí katei lauti gürabu.

  Maríeiti tuma Galina lidan irumu 1990. Gumesetiña aturiahoun Bíbülia úara. Badiseiti lidan irumu 1992. Ǘrüwañanu lisaanigu hama bián ibañani

22 lidan seingü-hati, 2019, asagarahóuatu haban saragu gefentiña luagu Heowá Rostov-on-Don. Barüwati íbiri  Vilen Avanesov luma Arsen, le lisaani, ítara kei íbiri  Aleksandr Parkov adaürǘwa sin haguserawagüdün ani bián irumu hau guentó tidan furisun. Lidan ǘrüwa-hati irumu 2021, sügügüdawatiña íbirigu ha tidoun amu furisun.

Rútiña lúrudugu lébeha katei le gayaraabei tadügüni Stella, luagu Vilen le tani weiriei luma luagu tisaani. Lanwoun lira, maseinsunhaaña. Rúati giñe tidurun Galina, to lani Aleksandr weiriou luagu tafiñen. Siadi hamutu lúruduna lun hadaürünün luagu bián irumu luma ǘrüwa hati.

Hírutiña íbirigu ha lídanbaña sun ubóu luagu marichaü le. Sun wagía wasigiruba ‘aritagua hawagun adaürǘtiña, kéisigubeirügü hamuga giñe wadaürǘña lan hama’ (Ebüréu 13:3).