12 ME, 2021
RUSIA
IROGO VOU | Vosota Tiko e Tolu na Tacida Nodratou Vesu
Ena ika23 ni June 2022, e sega ni vakadonuya na mataveilewai na Fourth General Jurisdiction Court of Cassation mai Rusia, nodrau ikarua ni kerekere o Brother Vilen Avanesov, kei Brother Aleksandr Parkov. E vakadonuya na mataveilewai me rogoci tale mada nona kisi o Brother Arsen Avanesov. Ena rawa ni tau vua e dua na itotogi levu. Ratou se vesu kece tiko ena gauna qo.
Ena ika6 ni Tiseba 2021, e sega ni vakadonuya na Rostov Regional Court mai Rusia, nodratou kerekere o Arsen, Vilen, kei Aleksandr. Ratou na tiko ga e valeniveivesu.
Ena ika29 ni Julai 2021, e vakataulewataka na Leninskiy District Court of Rostov-on-Don mai Rusia, me rau ono veimama na yabaki e valeniveivesu o Arsen kei Aleksandr. O Vilen ena vesu me ono na yabaki. Ratou sa vesu tu mai vakawawa na tacida qo me sivia e rua na yabaki. Ratou na vesu tiko ga e valeniveivesu.
Kedratou iTukutuku
Arsen Avanesov
Sucu: 1983 (Baku, Azerbaijan)
Me baleti koya: Vuli idinia, cakacaka sara ena tarataravaki. Dau taleitaka na qito rakavi ni se gone. Vulica na vosa vakavalagi, kei na vosa vakaVaranise
Rau vakavulici koya nona itubutubu me taleitaka na iVolatabu. Papitaiso me iVakadinadina i Jiova ena 2005
Vilen Avanesov
Sucu: 1952 (Baku, Azerbaijan)
Me baleti koya: E daunilivaliva, e matai tale ga. Taleitaka na vasaqa, vavi madrai kei na wilivola. Ni se itabagone, e dau taleitaka me wilika na iVolatabu
Rau vakamau kei Stella ena 1980. Rua na luvedrau, o Arsen na tagane, kei Elina na yalewa. Ratou dro vakavuvale (refugee) i Armenia ena 1988. A yaco tale ga ena yabaki qori na uneune e Yerevan, mai Armenia. Na dredre ni bula vakailavo ena vanua qori e vakavuna me ratou toki i Rostov-on-Don, e Rusia. Papitaiso sara ena 2006
Aleksandr Parkov
Sucu: 1967 (Spassk, Yasayasa o Kemerovo)
Me baleti koya: Ni se gone, e dau qarava nodratou iteitei vakavuvale, kei na manumanu. E kena dau ena draivataki katavila, e bulia tale ga na iyaya e caka mai na kopa kei na varasa (artistic coppersmith)
Rau vakamau kei Galina ena 1990. Rau vulica vata na iVolatabu, papitaiso sara o Aleksandr ena 1992. Rua na luvedrau, rua tale ga na makubudrau
iTukutuku ni Veilewai
Ena ika22 ni Me 2019, era vaqaqara na vakailesilesi ena nodra vale na tacida mai Rostov-on-Don. Ratou mani vesu, qai wawa veilewai me voleka ni rua na yabaki o Brother Vilen Avanesov, na luvena tagane o Arsen, kei Brother Aleksandr Parkov. Ena Maji 2021, ratou lai vesu ena dua tale na vanua.
E vakatabui o Stella me sikovi rau nona veitamani, e vinakata tale ga na veivuke vakailavo. A beitaki tale ga ena vuku ni nona vakabauta o Galina na wati Aleksandr. E kaya na mataveilewai ni cala, qai vakatatabutaki me rua ina tolu na vula.
Eda rarawataka na nodratou vesu vakatawadodonu na tacida qo. Ia eda na “dau nanumi ira na tu e valeniveivesu me vaka sara ga [eda] vesu tu kei ira.”—Iperiu13:3.
Rawa ni o Wilika Tale ga
ITUKUTUKU VOU
Vesu ena Vuku ni Nodra Vakabauta—Rusia
Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.