Pambula kuswera yapa, Khoti la Leninskiy ku Rostov-on-Don liperekengi cheruzgu chaki pa mulandu wa Mubali Arsen Avanesov, Vilen Avanesov, ndi Aleksandr Parkov. *

Arsen Avanesov

• Chaka cho Wakuwiya: 1983 (Ku Baku, Azerbaijan)

• Mo Wakukuliya: Wangusambira ntchitu ya uyinjiniya ndipu wagwiranga ntchitu ya kuzenga. Weche mwana wayanjanga kutchaya rugby. Wakusambira Chingelezi ndi Chifurenchi

  Apapi ŵaki ndiwu angumuwovya kuti wayambi kuwuyanja uneneska. Ndipu wangubatizika mu 2005 kuŵa Kaboni waku Yehova

Vilen Avanesov

• Chaka cho Wakuwiya: 1952 (Ku Baku, Azerbaijan)

• Mo Wakukuliya: Wagwiranga ntchitu ya vamagesi kweniso yakuzenga. Watanja vakubikabika ndipuso kuŵerenga. Weche wachinyamata wayanjanga ukongwa kuŵerenga Bayibolu

  Wakutorana ndi Stella mu 1980. Ŵe ndi mwana munthulumi zina laki Arsen, ndi mwana munthukazi zina laki Elina. Banja ili linguthaŵiya ku Armenia mu 1988. Mu chaka chenichi, ku Yerevan ndi ku Armenia kunguchitika chidilirisi ndipu kusoŵa kwa ndalama naku kungufika paheni ukongwa vo vinguchitiska kuti banja lenili lisami so. Yiwu angusamiya ku Rostov-on-Don, ku Russia. Wangubatizika mu 2006

Aleksandr Parkov

• Chaka cho Wakuwiya: 1967 (Ku Spassk, Muchigaŵa cha Kemerovo)

• Mo Wakukuliya: Kwambiya pa unyamata waki, wagwiranga ntchitu yakulima kweniso kuliska viŵetu. Wagwiranga ntchitu yakwendesa gandaganda ndipuso yakupanga vinthu vamkuŵa

  Wakutorana ndi Galina, mu 1990. Yiwu angwamba kusambiriya limoza Bayibolu. Wangubatizika mu 1992. Ŵe ndi ŵana anthukazi atatu ndi azuku ŵaŵi

Pa 22 May 2019, arara a boma angufufuza nyumba zinandi za Akaboni aku Yehova ku Rostov-on-Don. Mubali Vilen Avanesov ndi mwana waki Arsen, ndipuso Mubali Aleksandr Parkov anguchiŵaliya mujeri ndipu angujamu kwa vyaka pafufupi viŵi ŵechekulindiziya mulandu wawu. Mu March 2021, abali atatu ŵenaŵa anguŵatuzgaku kujeri ko ŵenga ndi kuŵatumiza kujeri linyaki.

Stella muwolu waku Vilen, akumukaniza kuwonana ndi mulumu waki kweniso mwana waki. Iyu wakumusiya waka viyo kwambula chechosi cho chingamuwovya kusaniya ndalama. Galina muwolu waku Aleksandr, nayu akukamba kuti we ndi mulandu chifukwa cha vo wagomezga. Ndipu Khoti likuyeruzga kuti wangapalamulanga mulandu wewosi cha kwa vyaka viŵi ndi myezi yitatu.

Abali ndi azichi pacharu chosi akwaskika ukongwa ndi vinthu vambula urunji vo vichitikiya abali ŵidu ŵenaŵa. Tosi tilutirizgengi ‘kukumbuka ŵanthu wo ŵe mujeri nge kuti [nasi] tamangikiya nawu limoza.’—Aheberi 13:3.