ጥር 26, 2022 | የታደሰው፦ ሰኔ 27, 2023
ሩሲያ

ወቅታዊ መረጃ—ወንድሞች ታሰሩ | በቲንዳ የሚኖሩ ወንድሞች ሌሎችን መርዳታቸውና በይሖዋ መታመናቸው እንዲጸኑ ረድቷቸዋል

አጫውት

ሰኔ 23, 2023 በአሙር ክልል የሚገኘው የቲንዲንስኪ አውራጃ ፍርድ ቤት ወንድም ቭላዲሚር ቡኪን፣ ሚክሃይል ቡርኮቭ፣ ቫሊሪ ስላሽችዮቭ እና ሰርጌ ዩፌሮቭ ጥፋተኛ ናቸው የሚል ብይን አስተላልፏል። ሚክሃይል የስድስት ዓመት ከሁለት ወር እስራት ተፈርዶበታል። ቭላዲሚር፣ ቫሊሪ እና ሰርጌ ደግሞ የስድስት ዓመት ከአራት ወር እስራት ተፈርዶባቸዋል። አራቱም ወንድሞች ወዲያውኑ ወህኒ ወርደዋል።

ታኅሣሥ 27, 2022 የአሙር ክልላዊ ፍርድ ቤት በወንድም ቭላዲሚር ቡኪን፣ ሚክሃይል ቡርኮቭ፣ ቫሊሪ ስላሽችዮቭ እና ሰርጌ ዩፌሮቭ ላይ የተላለፈውን ብይን በመሻር ክሳቸው ዳግመኛ እንዲታይ ወስኗል። ወንድሞች ከእስር የተለቀቁ ሲሆን ክሳቸው ዳግመኛ የሚታይበትን ጊዜ እየተጠባበቁ ነው። ሆኖም ክልሉን ለቅቀው እንዳይወጡ ክልከላ ተጥሎባቸዋል።

ጥቅምት 25, 2022 በአሙር ክልል የሚገኘው የቲንዲንስኪ አውራጃ ፍርድ ቤት በቭላዲሚር፣ በሚክሃይል፣ በቫሊሪ እና በሰርጌ ላይ የጥፋተኝነት ብይን አስተላልፏል። ቭላዲሚር፣ ቫሊሪ እና ሰርጌ እያንዳንዳቸው የስድስት ዓመት ተኩል እስራት ተፈርዶባቸዋል። ሚክሃይል የስድስት ዓመት ከሁለት ወር እስራት ተፈርዶበታል። አራቱም ከፍርድ ቤት ወዲያውኑ ወደ እስር ቤት ተወስደዋል።

የክሱ ሂደት

ኅዳር 17, 2019

ሕግ አስከባሪ አካላት የአራቱን ወንድሞች ቤት ጨምሮ በአካባቢው የሚኖሩ ስምንት የይሖዋ ምሥክር ቤተሰቦችን ቤቶች በረበሩ
ኅዳር 18, 2019

መርማሪዎች አራቱንም ወንድሞች በጽንፈኝነት ወንጀል ከሰሷቸው። ወንድሞች አካባቢውን ለቀው እንዳይሄዱ ተከለከሉ
ሐምሌ 26, 2021

ጉዳያቸው በፍርድ ቤት መታየት ጀመረ

አጭር መግለጫ

ሚክሃይል ቡርኮቭ

የትውልድ ዘመን፦ 1983 (አራስላኖቮ፣ ቼልያቢንስክ ክልል)

ግለ ታሪክ፦ አናጺ ነው። ስለ መጽሐፍ ቅዱስ እውነቶች ለመጀመሪያ ጊዜ የተማረው ከይሖዋ ምሥክሮች ጋር መጽሐፍ ቅዱስን ከሚያጠና የሥራ ባልደረባው ነው። በ2006 ተጠመቀ

የሰጠው ሐሳብ

ሌሎችን መርዳትህ የጠቀመህ እንዴት ነው?

አዎንታዊ አመለካከት በመያዝና በቻልኩት መጠን ተጨባጭ እርዳታ በመስጠት ሌሎችን ለማበረታታት እሞክራለሁ። በአሁኑ ወቅት ከሌሎች ጋር አዘውትሮ መገናኘት ቀላል አይደለም። ሆኖም አስቸጋሪ ሁኔታ ሲያጋጥም ሌሎችን ለመርዳት ራሴን አቀርባለሁ። የፈቃደኝነትና የትሕትና መንፈስ መያዜ በጣም ጠቅሞኛል።

ቫሊሪ ስላሽችዮቭ

የትውልድ ዘመን፦ 1981 (ቲንዳ፣ አሙር ክልል)

ግለ ታሪክ፦ ከሕፃንነቱ አንስቶ ያደገው በጉዲፈቻ ነው። ጦር ሠራዊት ውስጥ አገልግሏል። በኋላም የባቡር ሐዲድ ጠጋኝ ሆኖ ሠርቷል

ከመጠን በላይ ይጠጣ የነበረ ከመሆኑም ሌላ ብዙ ጊዜ ይደባደብ ነበር። በ2002 መጽሐፍ ቅዱስን ማጥናት ጀመረ። በ2003 ከታትያና ጋር ትዳር መሠረተ፤ እሷም መጽሐፍ ቅዱስን ማጥናት ጀምራ ነበር። በ2004 ተጠመቀ

የሰጠው ሐሳብ

በዚህ የፈተና ወቅት ወንድሞችና እህቶች የረዱህ እንዴት ነው?

በአካል መገናኘት ባንችልም ወንድሞችና እህቶች በጣም ደግፈውኛል። የሰጡኝ ማበረታቻ “ሁሉም ነገር ይስተካከላል። ከጎንህ ነን” ያሉኝ ያህል እንዲሰማኝ አድርጎኛል።

ሰርጌ ዩፌሮቭ

የትውልድ ዘመን፦ 1975 (ታሽኬንት፣ ኡዝቤኪስታን)

ግለ ታሪክ፦ የኤሌክትሪክ ቴክኒሽያን ነው። ፎቶግራፍ ማንሳት እና ሙዚቃ ይወዳል

በመጽሐፍ ቅዱስ ውስጥ ለጥያቄዎቹ መልስ ካገኘ በኋላ በ1993 ተጠመቀ

በ1997 ከናታልያ ጋር ትዳር መሠረተ። አንድ ወንድና አንዲት ሴት ልጅ አላቸው

የሰጠው ሐሳብ

የደረሰብህ ፈተና በይሖዋ ላይ ያለህን እምነት ያጠናከረልህ እንዴት ነው?

ሁላችንም በክርስቲያናዊ ጦርነት ላይ እየተካፈልን ነው። ይሖዋ ሁሉንም ነገር ይቆጣጠራል። እሱ እያዘጋጀንና እያስተማረን ነው፤ አስፈላጊ ሲሆን ደግሞ ለየት ባለ መንገድ ጥንካሬ ይሰጠናል። ይሖዋ በጥንት ጊዜ የነበሩ አገልጋዮቹ ፈተና ሲያጋጥማቸው ታማኝ እንዲሆኑ ረድቷቸው ነበር፤ እኛንም ይረዳናል። . . . እያንዳንዳችን ከአምላክ ጋር ያለንን የግል ዝምድና ለማጠናከር በየዕለቱ ጥረት ማድረግ አለብን።

ይሖዋ ለውድ ወንድሞቻችንና ለታማኝ አገልጋዮቹ በሙሉ “ታማኝ ፍቅር” ማሳየቱን እንደሚቀጥል እርግጠኞች ነን።—ዘፍጥረት 39:21