10 MAI 2022
RUSSIE

NSANGU YA YIMPA | Mpangi Galina Abrosimova kena kununga kubanga na yandi

KUWA NA

Na kilumbu ya 11 août 2022, tribinale ya kizunga ya Nizny Novgorod mangaka kutadila diaka diambu ya mpangi Galina Abrosimova mutindu yandi lombaka yau. Yakena kulomba ve yandi kuenda na buloko samu na ntangu yayi

Na kilumbu ya 6 mai 2022, tribinale ya mbanza ya Sovietskiy na Nizhny Novgorod tubaka ti mpangi ya nketo Galina Abrosimova salaka diambu ya yimbi mpe bamezengila yandi kitumbu ya bamvula 6 na buloko. Yandi kuenda ntete ve na buloko yango.

Badati ya mambu kuminaka yandi

Kilumbu ya 4 juin 2019

Bantu yina kesalaka baankete bandaka kusosasosa Bambangi ya Yehova na kizunga ya Nizhny Novgorod. Bafundaka bau samu bavuandaka sala balukutakanu, kukongola makabu, mpe kukindisa bantu yankaka bakota na nkubukulu mosi ya dibundu yina pekisamaka
Kilumbu ya 17 juillet 2019

Bapolisi kotaka na kingolo mpe sosasosaka na bayinzo 35 ya mabuta ya Bambangi ya Yehova. Bakangaka mpangi Galina mpe batulaka yandi na mua buloko samu na bilumbu zole
Kilumbu ya 19 octobre 2021

Tribinale bandaka kusambisa mpangi Galina

Mambu yina metadila yandi

Galina Abrosimova

Kubutuka: 1966 (na Prigorodnoye, na kizunga ya Penza)

Disolo ya luzingu: Yandi kezolaka kusala batriko mpe broderie. Yandi vuandaka sala lokola pharmacienne. Na manima ya kubaka pansion, yandi kumaka sala lokola assistante na yinzo yina baketungaka bilele. Yandi kele na bana zole

Ntangu bakala na yandi kufuaka, yandi vuandaka kukiyuvusa biuvu mingi. Yandi bandaka kulonguka Biblia samu na kubaka bamvutu na biuvu na yandi. Kumona mutindu Mpova ya Nzambi kele puelele mpe malongi na yau ya mfunu simbaka mpenza ntima na yandi. Yandi bakaka mbotama na 2000

Mambu yina yandi metuba

Yinki sadisaka nge nge nunga wonga na nge na kutubaka na ntuala ya tribinale?

Kusamba na ntuala ya tribinale vuandaka diambu ya ntete mpe ya yimpa samu na munu. Munu lombaka na bankundi na munu nionso basambila samu na munu samu munu nunga wonga na munu. Mpangi mosi ya bakala yina bamezengilaka deja kitumbu tindilaka munu letre mosi. Yandi sonikaka: “Nge fueti tudila kaka Yehova ntima . . . nge kemona mutindu nge kebaka kiyenge ya ntima.” Munu kele mpenza na kiyenge na ntangu yayi. Kusamba samu na mbala ya ntete, kele lokola beto mekutana na muntu samu na mbala ya ntete na kisalu ya kusamuna. Beto kezabaka ve muntu yina kezibudila nge porte. Kasi na manima porte mezibuka, mpe mbala mingi beto kesololaka mbote.

Beto mendimisama ti Yehova ketatamana kupesa bampangi na beto ya babakala mpe ya banketo na Russie kibakala ya ‘kutelema na ntuala ya baguvernere mpe bantinu samu na kupesa kimbangi.’—Marko 13:9.

NEWS RELEASES