Hivi karibuni, makutaniko yote yanazungumza Kiebrania katika eneo la ofisi ya tawi ya Israel yalipata habari kwamba Biblia Takatifu—Tafsiri ya Ulimwengu Mpya iliyo kamili katika mfumo wa kidijitali itapatikana katika Kiebrania cha kisasa kuanzia Mei 2, 2022 ili iweze kupakuliwa. Nakala zilizochapishwa zitapatikana mnamo Septemba 2022.

Toleo hili linaunganisha tafsiri ya Maandiko ya Kiebrania iliyotolewa mwaka wa 2020 pamoja na tafsiri iliyorekebishwa ya Maandiko ya Kigiriki cha Kikristo. Hii ndiyo mara ya kwanza kwa Tafsiri ya Ulimwengu Mpya kupatikana katika Kiebrania cha kisasa katika buku moja. Tafsiri ya Maandiko ya Kiebrania katika Kiebrania cha kisasa inawasaidia wasomaji kufahamu maana ya maandishi ya kale yaliyoongozwa na roho, ambayo siku hizi wasomaji wengi hawayaelewi kwa urahisi.

Mshiriki wa kikundi cha tafsiri alisema hivi: “Wasomaji wetu hawawezi kupata kwa urahisi tafsiri za Biblia za Kiebrania cha kisasa, hasa za Maandiko ya Kiebrania. Hivyo, tunafurahi kupokea Biblia nzima ya Tafsiri ya Ulimwengu Mpya iliyo na vipengele vingi maridadi, hasa marejeo yake mengi ya pambizoni, ambayo yatatusaidia sana kuielewa Biblia.”

Mshiriki mwingine wa kikundi cha tafsiri alisema hivi: “Tunamshukuru sana Yehova kwa zawadi hii. Kwa Mashahidi wa Yehova na watu wengine wanaozungumza Kiebrania, itakuwa rahisi zaidi kusitawisha uhusiano wa karibu na wenye uchangamfu pamoja na Baba yetu wa mbinguni.”​—Yakobo 4:8.