Bamunyinefwe na bankashi abekala mu musumba wa Mariupol, uwa Kharkiv, uwa Hostomel, na mu misumba imbi balekwata amafya ayakalamba pa mulandu wa mabomba ayalepuulika mu Ukraine. Bamo no mulungu ulapwa ukwabula ukufuma mu mayanda yabo. Ifya kulya bakwete filepwa, kabili apo amalaiti takuli e lyo na Intaneti na netiweki pa mafone yaliya, ici cilelenga cileyafya ukulanshanya na aba bamunyinefwe na bankashi.

Ku ca bulanda munyinefwe Dmytro Rozdorskyi, uuli ne myaka 28 uwikala ku Myrnohrad kabili eluda, alifwa pa mulandu wa kuti alinyatile pa kapata akamucenene icabipisha. Tulepepelako bonse abafwililwe abatemwikwa babo na ba bwananyina abali mu ncende umo amabomba yalepuulika.—2 Abena Tesalonika 3:1.

Pa 7 March 2022, iyi e mpendwa iyo batumine ukufuma ku Ukraine:

• Bakasabankanya babili balifwa

• Bakasabankanya 8 balicenekwa

• Bakasabankanya 20,617 balifulumuka mu mayanda yabo kabili baleikala ku ncende shimbi ukuliko bwino mu Ukraine mwine

• Amayanda 25 yalionaikilila fye

• Amayanda 29 yalionaika

• Amayanda 173 yalionaikako panono

• Amayanda ya Bufumu 5 yalionaika

• Balipanga Amakomiti ya Kwafwilisha Abaponenwe na Masanso Ayakalamba (DRCs) ayali 27 mu Ukraine

• Bakasabankanya 6,548 balibafwa kuli iyi komiti ukusanga umwakwikala umo bengacingililwa

• Bakasabankanya 7,008 balifulumukila ku fyalo fimbi kabili balebafwa ku ba bwananyina

• Icikuulwa ca Kulonganinamo Ukulongana Kukalamba cimo na Mayanda ya Bufumu 30 ku masamba ya Ukraine, pamo nga ayaba mu citungu ca Chernevtsi, ica Ivano-Frankivsk, ica Lviv, ne ca Transcarpathia baliyapekanya ukupokelelamo abalefulumuka pa mulandu wa nkondo