MARSO 8, 2022
UKRAINE
UPDATE #1 | Makka-aya-aya i Wawwaragi Tam Maski Mariga i Situasion ta Ukraine
Mazziga la’ nga mazziga i situasion na wawwaragi tam ta siudad ira na Mariupol, Kharkiv, Hostomel, anna ta tanakuan paga megafu ta ari magiggimmang i pabbomba ta Ukraine. Tanga-ligguan ngana nga ari makapanaw i karuan ta basement da onu ta nattaguadda ira. Megafu tatun, baddi ngana laman i suplay da tu makan, anna mariga gapa nga kontakan i wawwaragi ira megafu ta problema ta kuryente, Internet, anna ta signal ira na cellphone.
Kaddaraddam ta natay i 28-anios nga elder nga si Brother Dmytro Rozdorskyi nga taga-Myrnohrad megafu ta grabe i nikabigag na turi ta nakebatay yayya tu bomba. Ipakimallo tam danuri natayan anna i wawwaragi tam ta lugar ira nu sitaw grabe i pabbomba.—2 Tesalonica 3:1.
Base ta report turi ta Marso 7, 2022, yaw i paddia-paddian na wawwaragi ta Ukraine:
Situasion na Wawwaragi Tam
2 nga publisher i natay
8 nga publisher i nabigaran anna natakitan
20,617 nga publisher i nanaw ta gibbalayadda tapenu magali ta mas safe nga lugar ta nasiodda
25 nga balay i nadabba
29 nga balay i nadara-daral
173 nga balay i baddi laman i daral na
5 nga Kingdom Hall i nadaral
Panguffun ta Wawwaragi
27 nga Disaster Relief Committee (DRC) i mangasikasu ta wawwaragi tam ta Ukraine
6,548 nga publisher i inuffunan na DRC ira tapenu makaleg tu mas safe nga paddianan
7,008 nga publisher i nagali ta tanakuan nga nasion anna uuffunan ira na kapangngurug da
1 nga Assembly Hall anna 30 nga Kingdom Hall ta western Ukraine, gitta na ta Chernevtsi, Ivano-Frankivsk, Lviv, anna ta Transcarpathian region ira i neprepara tapenu paddianan na refugee ira