Ena June 2022, e tuvanaki me vakavinakataki kina na vale taba va ena valenivolavola ni tabana e Angola. Ena biu kina eso tale na rumu kei na ofisi, me rawa nira cakacaka qai tiko kina na tacida era veiqaravi ena valenivolavola ni tabana. A se tara sara ena 2003 na valenivolavola ni tabana. Gauna qo, sa sega ni levu na rumu me rauti ira e 207 na lewenivuvale e Peceli.

Eso gona na lewenivuvale era sa rede qai vinakati me tara eso tale na rumu. Ena Tiseba 2021, era volia na tacida e dua na tabavale. E voleka ga ena vanua e tiko kina na valenivolavola ni tabana.

Ena tiko kina e 57 na rumu kei na 60 na ofisi. Ena vakarautaki ena veirumu qori na vanua ni cakacaka, eso na ofisi era na cakacaka e vicavata na tacida ena dua ga na rumu ia eso tale era na cakacaka yadudua na tacida ena nodra dui ofisi. Ena tara tale ga kina e dua na rumu ni bose, kei na dua tale na rumu e rawa ni vakayagataki ena levu na ka (multipurpose rooms). Ena biu ena ofisi na lalaga ena rawarawa ni luva se sema tale.

E namaki mera toki na lewenivuvale e Peceli era rede tiko ena gauna qo ena Feperueri 2024.

E kaya o Samuel Campos e lewe ni Komiti ni Tabana e Angola: “Dua na ka neitou masulaka qai cakacaka vata kei ira na tacida ena Tabana ni Tarataravaki e Veiyasa i Vuravura (Worldwide Design/Construction) ena kena vaqarai eso na itikotiko. E sauma sara ga o Jiova na neitou masu ni keitou sa volia qai vakavinakataka na tabavale qo.”

E sivia na 160,000 na dautukutuku e Angola. Ena yabaki sa oti, era tiko ena iVakananumi e sivia ni le 400,000. Ra qai caka vuli iVolatabu na dautukutuku vei ira e sivia na le 200,000. Eda nuidei ni na vakalougatataka o Jiova na vakavinakataki ni tabavale me rawa ni tokoni kina na cakacaka ni Matanitu ni Kalou.—1 Veigauna 29:16.