Del Febrero 24, 2022, ya principia el guerra na Ukraine. Miles del maga Testigo de Jehova el ta esta siempre na maga lugar donde ta sucede el guerra. Por causa na diila amor, tiene 21 hermano estaba na maga ciudad de Kremenchuk y Poltava el ya anda na ese maga lugar para salva con el diila maga hermano y hermana, y para lleva ayuda.

Adentro de seis semana, este maga hermano ya puede ya man viaje maga 80 beses. Todo-todo, ya puede ya sila viaja maga 50,000 kilometro para anda na maga bien afectao lugar igual na Kharkiv y salva con el cerca 400 hermano y hermana.

Na presente, ya puede ya sila lleva 23 tonelada de comida. Mas pa, tiene tambien medicina, gasolina y otro pa necesidad. Antes el cada viaje, el maga hermano ta plaña enbuenamente si onde sila pasa para queda sila lejos na peligro y para evita con el maga lugar donde tiene guerra. Tiene vez, el un viaje ta llega maga 19 hora cay ta chequia con el coche del maga hermano si ta pasa sila na maga checkpoint.

Mientras ta viaja sila, tiene maga eroplano ta bula arriba. Ya puede mira el maga hermano maga building que ya queda destrozao por causa na bomba y maga bungcao tanque de guerra y coche. Tiene vez, ta puede sinti el maga hermano que tan uyuk el tierra cay tiene maga bomba que ya rebenta cerca kanila.

Del Abril 2, 2022, ta prepara si Roman para lleva ayuda na maga hermano y hermana na Kharkiv cuando ya principia cae el manada missile na camino. Ya anda le esconde na un building. Despues del 30 minuto, ya puede le mira que ya queda destrozao por causa na bomba el camino onde era le pasa.

Si Volodymyr, uno del maga driver, ya habla acerca na peligro que ta enfrenta sila: “Pirmi kame ta reza con Jehova que dale kanamon sabeduria para puede kame hace maga justo decision.”

Si Oleksandr y el de suyu mujer, si Valentyna, ta queda na Kharkiv junto con el maga de edad mayores de Oleksandr. Mientras ta continua el guerra, ta puede sila oi maga rebentada que maga 100 metro lang estaba na bentana del diila casa. Cay nuay sila coche, gendeh sila puede sale alla.

Despues, ya llega el maga hermano para anda saca kanila. “Ya reza kame con Jehova y ya rindi gracias con ele por causa na maga hermano quien ya ayuda kanamon,” ya habla Oleksandr.

Si Vasyl, de suyu mujer que si Natalia y el diila tres anak ya esconde na basement del diila casa por cuanto dia. Del Febrero 28, 2022, ya rebenta el un bomba cerca na diila casa. Por causa con aquel, ya queda destrozao el diila casa. Ya habla si Vasyl que bien suena el rebentada y ya apaga el todo luz na basement.

Cuando ya menora un poco el guerra, el diila familia ya cambia na basement del un building cerca kanila. Del Marzo 3, 2022, ya llega el maga hermano y ya lleva con este familia na un lugar na nacion que lejos na peligro.

Ya relata si Vasyl si cosa le ya sinti cuando ya puede salva con el diila familia: “Ta rindi gayot kame gracias con Jehova. Despues de aquel bien dificil semana, por primer vez, ya puede kame cena que gendeh tan lingasa acerca na seguridad del diamon maga anak.”

Si Oleksandr, uno del maga driver, ya habla que el maga viaje que ya hace sila para salva con el maga hermano y hermana ta dale prueba que tiene unidad entre na maga siervo de Jehova. “Ya ayuda este conmigo para realiza si paquemodo ta cuida si Jehova con el de suyu maga siervo,” ya habla le. “Ya queda gayot yo alegre cuando ya puede yo mira que ta aprecia gayot el maga hermano y hermana con el cosa kame ya hace.”

Ta rindi kita gracias con este maga animoso hermano y ta reza kita que bendici si Jehova con el diila sacrificio.—Roma 12:10.