Maelfu ya ndugu na dada zetu bado wako katika maeneo yaliyoathiriwa zaidi na vita vikali ambavyo vimekuwa vikiendelea nchini Ukrainia tangu Februari 24, 2022. Kikundi cha ndugu 21 kutoka majiji ya Kremenchuk na Poltava, wanaonyesha upendo wa kweli. Ndugu hao wako tayari kusafiri hadi kwenye maeneo ya vita ili kuwaokoa ndugu na dada zao na kupeleka misaada.

Ndani ya majuma sita, ndugu hao wamefanya safari 80 za kwenda na kurudi. Kwa msingi huo ni kama wamesafiri umbali wa kilomita 50,000 kwenda kwenye maeneo yaliyoathiriwa sana na vita kama vile Kharkiv, na wamewaokoa ndugu na dada karibu 400.

Kufikia sasa, wamesafirisha tani 23 za chakula, na pia dawa, petroli, na mahitaji mengine. Kabla ya kuanza kila safari, ndugu hao hupanga kwa uangalifu njia watakayopita ili wawe salama, huku wakijaribu kuepuka maeneo yenye mapambano makali. Safari moja inaweza kuchukua hadi saa 19 kwa sababu ndugu zetu wanalazimika kusimama kwenye vituo vya ukaguzi ili magari yao yakaguliwe.

Wakiwa safarini, ndege za kivita zinapaa angani. Ndugu hao wanashuhudia majengo yaliyolipuliwa, magari ya vita, na magari ya kawaida yaliyoharibiwa. Wakati mwingine, ndugu zetu wanahisi ardhi ikitetemeka mabomu yanapolipuka.

Aprili 2, 2022, Roman alikuwa akijiandaa kupeleka misaada kwa akina ndugu na dada walio Kharkiv, kisha makombora yakaanza kuanguka barabarani kama mvua. Alijificha katika jengo lililokuwa karibu na hapo. Baada ya nusu saa, aliona kwamba barabara aliyotaka kupitia ilikuwa imelipuliwa.

Mmoja wa madereva wanaojitolea anayeitwa Volodymyr, alisema hivi kuhusu hali hatari wanazokabili: “Tunamwomba Yehova mara nyingi atusaidie kufanya maamuzi yenye hekima.”

Oleksandr na mke wake, Valentyna, pamoja na wazazi wa Oleksandr wenye umri mkubwa waliishi Kharkiv. Vita vilipokuwa vikiendelea, wangeweza kuona kupitia madirisha ya nyumba yao milipuko iliyokuwa umbali wa mita 100 tu. Kwa kuwa hawakuwa na gari hawangeweza kukimbia.

Kisha akina ndugu wakaja kuwaokoa. Oleksandr alisema hivi: “Tulisali na kumshukuru Yehova kwa ajili ya akina ndugu waliofika kutusaidia.”

Vasyl, na mke wake, Natalia, walijificha pamoja na watoto wao watatu katika chumba cha chini ya ardhi katika nyumba yao kwa siku kadhaa. Februari 29, 2022, bomu lililipuka karibu na nyumba yao. Mlipuko huo uliharibu nyumba yao. Vasyl anakumbuka kishindo cha mlipuko na taa zote za chumba cha chini zikazimika.

Mapambano yalipopungua kidogo, familia hiyo ilienda kujificha kwenye chumba kingine cha chini katika jengo la karibu. Machi 3, 2022, ndugu zetu walipata familia hiyo na kufaulu kuwapeleka sehemu nyingine yenye usalama zaidi.

Vasyl anaeleza jinsi alivyohisi familia yake ilipookolewa na kupelekwa kwenye sehemu salama. Alisema hivi: “Tunamshukuru sana Yehova. Kwa mara ya kwanza tumekula mlo wa jioni kwa amani bila wasiwasi kuhusu usalama wa watoto wetu baada ya juma moja katika eneo la vita ambalo machoni petu lilikuwa kama majuma kadhaa.”

Oleksandr, ambaye ni mmoja wa madereva hao alieleza kwamba safari hizo za uokoaji zimekuwa uthibitisho wa umoja miongoni mwa watu wa Yehova. Alisema hivi: “Hili limenisaidia kutambua jinsi Yehova anavyowatunza watu wake. Ninafurahi sana kuona nyuso zenye shukrani za waamini wenzangu.”

Tunathamini kazi ambayo ndugu zetu wanafanya kwa ujasiri, na tunasali kwamba Yehova aendelee kubariki roho yao ya kujidhabihu.​—Waroma 12:10.