Ŵakaboni ŵa Yehova masauzandi ghanandi ŵachali mu vigaŵa ivyo nkhondo yasuzga chomene ku Ukraine, nkhondo iyi yikamba pa February 24, 2022. Kuti ŵalongore chitemwa cha paubali, ŵabali 21 ŵakufuma mu misumba ya ku Ukraine, wa Kremenchuk na Poltava ŵakujipeleka kuluta ku vigaŵa ivyo nkhondo yanunkha kuti ŵakaponoske ŵanyawo na kuŵapa vinthu vyakukhumbikwa.

Mu masabata 6 pera, ŵenda maulendo pafupifupi 80 ndipo tingati ni mtunda wa makilomita pafupifupi 50,000 kuluta ku malo agho nkhondo yasuzga chomene, nga nkhu Kharkiv, ndipo ŵaponoska ŵabali na ŵadumbu pafupifupi 400.

Kufika pasono, ŵapelekera chakurya chakukwana matani 23, munkhwala, mafuta gha galimoto, na vinyake vyakukhumbikwa. Pambere ŵandanyamuke, ŵabali aŵa ŵakusanda dankha kuti ŵawone msewu uwemi uwo ŵangenda mwakuti ŵaleke kwenda ku vigaŵa ivyo nkhondo yikuŵa mukati. Ulendo umoza ungatora maora 19 chifukwa ŵabali aŵa ŵakuyimanga mu malo ghakusechera kuti galimoto zawo ŵaziseche.

Apo ŵakwenda kuluta ku malo agha, ndege zankhondo zikuŵa kuti zikuduka. Ŵabali aŵa ŵakuwonanga nyumba, magalimoto na ŵakasinja awo ŵaphuliskika na mabomba. Nyengo zinyake, ŵabali ŵakupulika charu chikusunkhunyika chifukwa cha mabomba agho ghaphulika kufupi nawo.

Pa April 2, 2022, Roman wakalutanga kukapeleka vyakukhumbikwa ku ŵabali na ŵadumbu ku Kharkiv, apo wakawona kuti mabomba ghanandi ghamba kuphulika mu misewu. Wakabisama dankha mu nyumba yapafupi. Pamanyuma pa maminiti 30, wakasanga kuti msewu uwo wakatenge wende waphuliskika.

Pakuyowoyapo za umo vinthu vikaŵira, Volodymyr, yumoza wa madirayivara agho ghakujipeleka wakati: “Tikulomba kwa Yehova kanandi waka kuti tisankhe vinthu mwamahara.”

Oleksandr na muwoli wake, Valentyna, ŵakakhalanga ku Kharkiv lumoza na ŵapapi ŵawo awo mbachekuru. Apo nkhondo yikaŵa mukati, ŵakawonanga kwizira pa windo lawo kuti mabomba ghakuphulika pafupi waka panji mamita pafupifupi 100. Pakuti ŵakaŵavya galimoto, pakaŵa pakusuzga kuti ŵachimbire.

Kweni ŵabali ŵakiza kuti ŵazakaŵaponoske. Oleksandr wakati: “Tikalomba kwa Yehova na kumuwonga chifukwa cha ŵabali awo ŵakiza kuzakatovwira.”

Vasyl, muwoli wake Natalia, na ŵana ŵawo ŵatatu ŵakabisama mu kachipinda kapasi ka nyumba yawo kwa mazuŵa ghanandi. Pa February 29, 2022, bomba likaphulika pafupi na nyumba yawo uku iwo ŵachali kubisama. Nkhongono ya bomba ili yikasakaza nyumba yawo. Vasyl wakukumbuka chiwawa chikuru icho chikapulikikwa, kweniso umo magesi ghakazimwira mu nyumba yawo.

Nkhondo yati yatunako, mbumba iyi yikasamira mu kachipinda kapasi kanyake mu nyumba yapafupi. Pa March 3, 2022, ŵabali ŵakayisanga mbumba iyi ndipo ŵakayisamuskira ku chigaŵa icho vinthu vili makorako mu charu chenechichi.

Vasyl wakulongosora umo wakajipulikira mbumba yake yati yafika ku chigaŵa icho vinthu vikaŵako makora, wakati: “Tikamuwonga chomene Yehova. Pamanyuma pa mazuŵa ghanandi, tikaryaso chakurya chamise mu mtende kwambura kufipa mtima na nkhani ya chivikiliro cha ŵana ŵithu.”

Oleksandr, yumoza mwa awo ŵakujipeleka kovwirapo, wakuti ntchito ya kuponoska ŵanji yikupeleka ukaboni wakuti ŵanthu ŵa Yehova mbakukolerana. Iyo wakati: “Ivi vyanovwira kumanya kuti Yehova wakuŵapwelelera nadi ŵanthu ŵake. Para nkhuwona waka umo ŵabali na ŵadumbu aŵa ŵaliri ŵakuwonga, nkhuŵa wakukondwa chomene.”

Tikuŵawonga chomene ŵabali ŵithu awo ŵakulongora chikanga aŵa, ndipo tikulomba kuti Yehova watumbike mzimu wawo wakujipata.—Ŵaroma 12:10.