Mantang nagpapadagos an masakit na sitwasyon sa Ukraine, urog pang isinagibo kan sangay sa Ukraine an paghihinguwang mapasturan an mga tugang sa nasyon na iyan. Maigot na isinasagibo kan mga may katungdan na brother sa bilog na nasyon an pagpapastor na iyan sa rinibong mga parahayag na napiritan na humali sa saindang sadiring lugar. Talagang nakikinabang an mga tugang sa nakakapakusog na mga pagdalaw na iyan. Pagkatapos na dalawon kan sarong miyembro kan Komite kan Sangay sa Ukraine an mga tugang na refugee sa sulnupan na parte kan nasyon, sarong sister na temporaryong nagdadagos sa sarong Kingdom Hall sa siyudad nin Uzhgorod kaiba an mga 30 iba pa, an nagsabi: “Pagmati ko garo ako kinukugos ni Jehova.”

Pinagmamaigutan man kan mga brother na pasturan an mga 100 na makusog an buot na mga miyembro kan 27 Disaster Relief Committee (DRC). Si Ihor, na sarong miyembro kan DRC, nag-istorya: “Kan asignaran ako na maglingkod sa DRC, nakikidagos na kami kaidto ni agom sa ibang harong ta napiritan naman kaming maghali sa harong mi. Kan medyo grabe na su kapagalan mi, sarong miyembro kan Komite kan Sangay, na dawa sibot-sibot man, an nagtao nin panahon para bisitahon kami asin talagang nagdangog siyang marhay samo. Namatian mi na nagmamalasakit siyang marhay samo.” Sinabi pa ni Ihor: “Pag nasa sitwasyon kita na pagmati ta garo kita mga umboy, na mayo nin ano man na kontrol sa satong sitwasyon, saka pag mayo kitang maisip na solusyon tapos an magigibo ta lang iyo na mamibi ki Jehova para sa paggiya, sa parati nahihiling ta kun paano siya minahiro para tabangan kita.”

Kun manungod sa kamugtakan kan mga Kingdom Hall na harani sa lugar na pinaggigiyerahan, 4 an biyong nagkagaraba, 8 an grabe an destroso, saka 33 an dikit sana an destroso.

Sa pinakahuring total kan Mayo 17, 2022, naresibi hali sa Ukraine an minasunod na report. An mga bilang na ini base sa kumpirmadong mga report hali sa mga tugang niyato duman. Alagad an aktuwal na bilang posibleng mas halangkaw pa huling dipisil an komunikasyon sa gabos na lugar sa Ukraine.

• 37 tugang an nagadan

• 74 tugang an nalugadan

• 45,253 na tugang an nagharali sa saindang harong asin nagpasiring sa mas ligtas na mga lugar

• 418 harong an nagkagaraba

• 466 na harong an grabe an destroso

• 1,213 na harong an dikit sana an destroso

• 4 na Kingdom Hall an nagkagaraba

• 8 Kingdom Hall an grabe an destroso

• 33 na Kingdom Hall an dikit sana an destroso

• 27 DRC an nagtatabang sa Ukraine

• 48,806 na tugang an tinabangan kan mga DRC na makahanap nin mas ligtas na madadagusan

• 21,786 na tugang an nagdurulag pasiring sa ibang mga nasyon asin tinatabangan kan mga kapagtubod niyato