MAYO 23, 2022
UKRAINE
UPDATE #8 | Agar-ari ti Nainkabsatan nga Ayat iti Laksid ti Agtultuloy a Krisis Idiay Ukraine
Agtultuloy a Panangliwliwa ken Panangparegta Bayat nga Agtultuloy ti Gubat
Bayat a kumarkaro ti situasion idiay Ukraine, ad-adda met nga ikagkagumaan dagiti responsable a kakabsat iti sangay ti mangliwliwa ken mangparegta kadagiti rinibu a kakabsat a nagkamang iti dadduma a paset ti pagilian. Mabembenepisiaran dagiti kakabsat kadagitoy nga urnos. Kalpasan ti ibibisita ti maysa a miembro ti Komite ti Sangay kadagiti nagbakuit a kakabsat iti makinlaud a paset ti Ukraine, kuna ti maysa a sister a temporario a nagkamang iti Kingdom Hall iti siudad ti Uzhgorod a kadua ti agarup 30 pay a kakabsat: “Nariknak a kasla ar-arakupennak ni Jehova.”
Ikagkagumaan met dagitoy a kakabsat a liwliwaen ken paregtaen ti agarup 100 a natutured a miembro ti 27 a Disaster Relief Committee (DRC). Inyestoria ni Ihor, a miembro ti DRC: “Idi naawisak nga agserbi iti DRC, addakamin iti sabali a balay ta nagbakuitkami ken baketko. Idi mariknamin ti bannog, maysa a miembro ti Komite ti Sangay, nga adu met ti ar-aramidenna, ti nangiwaya a mangbisita ken dumngeg kadakami. Nariknami a talaga nga interesado iti kasasaadmi.” Intuloy ni Ihor: “Kadagiti situasion a kaslakami ubing nga awan gawgawayna, ken kasla awanen ti makitami a solusion, ken ti maaramidanmi laengen ket agkararag ken Jehova nga iwanwannakami, kanayon a makitami ti imana nga agtigtignay tapno tulongannakami.”
No maipapan kadagiti Kingdom Hall nga adda iti asideg ti paggugubatan, 4 ti interamente a nadadael, 8 ti nakaro ti dadaelna, ken 33 ti saan unay a nadadael.
Dagiti bilang iti baba manipud Ukraine ket naibasar iti report agingga idi Mayo 17, 2022. Dagitoy a bilang ket naibasar iti kompirmado a report dagiti kakabsat sadiay. Ngem posible a nangatngato pay ti aktual a bilang gapu ta narigat a kontaken dagiti kakabsat iti amin a rehion ti pagilian.
Epektona Kadagiti Kakabsat
37 a kakabsat ti natay
74 a kakabsat ti nadangran
45,253 a kakabsat ti nangpanaw iti balbalayda ken nagkamang iti nataltalged a lugar iti pagilian
418 a balay ti interamente a nadadael
466 a balay ti nakaro ti dadaelna
1,213 a balay ti saan unay a nadadael
4 a Kingdom Hall ti interamente a nadadael
8 a Kingdom Hall ti nakaro ti dadaelna
33 a Kingdom Hall ti saan unay a nadadael
Naited a Tulong
27 a Disaster Relief Committee (DRC) ti tumultulong idiay Ukraine
48,806 a kakabsat ti tinulongan ti DRC a makabirok iti nataltalged a pagyanan
21,786 a kakabsat ti nagkamang iti dadduma a pagilian ken tultulongan dagiti kakabsat sadiay