Ata mambu ke landa kukuma mpasi na insi Ukraine, Betele ya Ukraine ke landa kusala ngolo sambu bampangi ya kele na insi yai kulanda kubaka kikesa na kimpeve. Bo ke lembika bampangi-babakala ti bampangi-bankento yina me tina na babwala ya nkaka ya insi yai mpi bo ke pesa bo kikesa na nzila ya Biblia. Bansamuni yai ke bakila baviziti yango mambote mingi na kimpeve. Mu mbandu, mpangi mosi ya Komite ya Filiale kwendaka kutala bampangi-babakala mpi bankento yina tinaka bitumba mpi kwendaka na westi ya Ukraine. Mpangi-nkento mosi ya ke vanda sambu na mwa ntangu na Nzo mosi ya Kimfumu na Oujhorod ti bampangi-babakala mpi bampangi-bankento ya nkaka 30 tubaka na nima ya viziti yina nde: “Yo vandaka bonso nde Yehowa me baka mono na maboko na yandi mpi yandi ke yamba mono ngolo.”

Bampangi ke sala mpi ngolo sambu na kusala baviziti yina na bampangi ya kikesa kiteso ya 100 yina ke salaka na Bakomite 27 ya Ke Sadisaka Bantu Yina Me Bwila Mpasi. Ihor ke salaka na Komite mosi na kati ya Bakomite yina. Yandi ke tuba nde: “Ntangu mono kumaka kusala na Komite ya Ke Sadisaka Bantu Yina Me Bwila Mpasi, mono ti nkento na mono, beto katukaka dezia mpi beto kumaka kuvanda na nzo mosi buna. Kilumbu mosi, beto vandaka dezia ya kulemba. Kansi mpangi mosi ya Komite ya Filiale zwaka ntangu ya kukwisa kutala beto ata yandi vandaka ti mambu mingi ya kusala. Yandi widikilaka beto na dikebi yonso. Beto bakisaka nde yandi vandaka kusosa kibeni kuzaba mutindu beto kele.” Ihor ke tuba diaka nde: “Kana nge kele na ntwala ya diambu mosi ya ke sala nde nge vanda bonso mwana ya fioti, diambu ya kele nde nge ke zaba diaka ve ata kima, mpi ya nge ke zaba ve inki nge fwete sala mpi nde kima mosi mpamba ya kusala kele kulomba lutwadisu ya Yehowa, mbala mingi, beto ke monaka mutindu Yehowa ke salaka mambu sambu na beto.”

Sambu na Banzo ya Kimfumu yina kele na babwala yina bitumba ke salama, 4 bukanaka, 8 bebaka ngolo mpi 33 bebaka ve ngolo.

Na Kizole 17 mai 2022, bo pesaka beto rapore ya bantalu yai ya katukaka na Ukraine. Beto me pesa bantalu yai na kutadila bansangu ya kieleka ya me katuka na bampangi yina kele kisika mambu yango ke salama. Kansi, bantalu ya kieleka lenda vanda ya kumata sambu kulanda kusolula ti bampangi ya kele na babwala yonso ya insi Ukraine kele mpasi.

• Bampangi 37 ya ke longaka nsangu ya mbote (bansamuni) fwaka

• Bansamuni 74 lwalaka

• Bansamuni 45 253 yambulaka banzo na bo mpi kwendaka na bisika yina bitumba vandaka ve

• Banzo 418 bukanaka

• Banzo 466 bebaka ngolo

• Banzo 1 213 bebaka ve ngolo

• Banzo 4 ya Kimfumu bukanaka

• Banzo 8 ya Kimfumu bebaka ngolo

• Banzo 33 ya Kimfumu bebaka ve ngolo

• Bakomite 27 ya Ke Sadisaka Bantu Yina Me Bwila Mpasi ke sadisa bampangi na Ukraine

• Bakomite Yina Ke Sadisaka Bantu Yina Me Bwila Mpasi me sadisa bampangi 48 806 ya ke longaka nsangu ya mbote (bansamuni) na kuzwa bisika ya kuvanda na babwala yina bitumba kele ve

• Bansamuni 21 786 me tina na bansi ya nkaka mpi kuna bampangi na bo Bambangi ya Yehowa ke sadisa bo