Lokola mambu ya mpasi kena kutatamana na Ukraine, filiale ya Ukraine buelaka diaka bangolo samu na kusadisa bampangi na buala yango. Bankulutu ya buala ya mvimba kena kusala kisalu ya ngolo samu na kupesa lusadusu na mafunda ya bampangi yina tinaka na bisika yankaka ya buala. Balukindusu ya kimpeve yina bampangi bakaka natinaka bau mambote mingi. Na manima, ntangu mpangi mosi ya komite ya filiale kuendaka tala bampangi ya babakala mpe ya banketo yina tinaka na ouest ya Ukraine, mpangi mosi ya nketo yina kena kuvuanda kintuadi na bampangi kana 30 na Yinzo ya Kimfumu mosi samu na mua ntangu na mbanza ya Uzhgorod tubaka: “Munu kukimonaka lokola Yehova bakaka munu na maboko na yandi mpe yandi meyamba munu.”

Bampangi kena kusala diaka kisalu ya ngolo samu na kutanina bampangi pene ya 100 yina kena kusala na kibakala nionso na bakomite 27 samu na kupesa lusadusu. Ihor, mpangi mosi ya komite samu na kupesa lusadusu, metuba: “Ntangu bapesaka munu kiyekua ya kusala na komite samu na kupesa lusadusu, munu mpe nketo na munu beto kuendaka vuandaka deja na yinzo mosi. Ntangu beto lembaka mpenza nzutu, mpangi ya komite ya filiale mosi, yina kevuandaka na mambu mingi ya kusala, bakaka ntangu ya kukuiza tala beto mpe yandi kuwaka beto na dikebi nionso. Beto monaka mpenza dikebi yina yandi tudilaka beto.” Ihor mebuela: “Ntangu beto mekutana na diambu yina kena kukumisa beto lokola bana fioti, beto kena kuzaba ve diambu ya kusala, beto kena kumona ve solision samu na diambu yango mpe beto kena kusambila kaka Yehova samu yandi tuadisa diambu yango, mbala mingi beto kemonaka diboko na yandi kena kusadisa beto.”

Samu na yina metadila Bayinzo ya Kimfumu yina kele na bisika yina mvita kele, Bayinzo ya Kimfumu 4 kubuaka, 8 bebisamaka ngolo, mpe 33 bebisamaka ngolo ve.

Tii na kilumbu ya 17 mai 2022, beto bakaka bantalu yayi melanda na Ukraine. Bantalu yango mekatuka na balapolo yina beto bakaka na bampangi ya Ukraine. Kasi bantalu ya kedika lenda vuanda mingi kuluta, samu beto kele na mukakatano ya kusolola na bampangi yina kele na bizunga nionso ya buala yango.

• Bansamuni 37 kufuaka

• Bansamuni 74 lualaka

• Bansamuni 45 253 tinaka bayinzo na bau samu na kukuenda na bisika yina mekondua bivonza

• Bayinzo 418 kubuaka

• Bayinzo 466 bebisamaka ngolo

• Bayinzo 1 213 bebisamaka ngolo ve

• Bayinzo ya Kimfumu 4 kubuaka

• Bayinzo ya Kimfumu 8 bebisamaka ngolo

• Bayinzo ya Kimfumu 33 bebisamaka ngolo ve

• Bakomite samu na kupesa lusadusu 27 kena kusala na Ukraine

• Bakomite samu na kupesa lusadusu sadisaka bansamuni 48 806 samu babaka bisika ya kuvuanda yina kele ve na bivonza

• Bansamuni 21 786 tinaka na babuala yankaka mpe bampangi na bau Baklisto kena kupesa bau lusadusu