E situashon na Ukrania ta keda masha difísil. P’esei, e sukursal di Ukrania ta hasi èkstra esfuerso pa bishitá e rumannan pa asina animá nan. Vários ruman hòmber ta trahando duru pa hasi bishita di animashon na míles di ruman ku a haña nan ta muda pa motibu di e guera. E bishitanan ei ta dunando bon resultado. Un miembro di Komité di Sukursal a bishitá algun ruman na parti wèst na Ukrania. Despues di e bishita, un ruman muhé ku ta kedando ku 30 otro ruman na un Salòn di Reino na Uzhgorod a bisa: “M’a sinti komo si fuera Yehova a duna mi un brasa duru.”

E ruman hòmbernan ta hasiendo nan bèst pa animá mas o ménos 100 ruman ku ta forma parti di e Komiténan di Ousilio. Ihor, un miembro di un Komité di Ousilio a bisa: “Ta despues ku ami ku mi kasá a haña nos ta muda i keda na kas di algun ruman, mi a haña e asignashon pa sirbi den e Komité. Un biaha, ora nos tabata bastante kansá, un miembro di Komité di sukursal ku tambe tabata bastante okupá a duna nos un bishita di animashon. El a skucha nos ku masha atenshon. Nos por a mira ku e tabata masha interesá den nos. Tin biaha, nos ta sinti manera ta mucha nos ta i ku nos tin masha poko kontrol riba nos situashon. Pero, ora nos ta sinti nos asina, sin sa kiko pa hasi, nos ta resa pa Yehova guia nos. Hopi bes, nos ta mira kon Yehova ta yuda nos.”

Nos por bisa lo siguiente tokante e Salònnan di Reino den e áreanan di guera: 4 Salòn a ser destruí kompletamente, 8 a haña hopi daño i 33 a haña daño leve.

E siguiente sifranan ta for di un informe ku nos a haña di Ukrania te ku 17 di mei 2022. E sifranan akí ta basá riba informe verídiko di nos rumannan na Ukrania. Sinembargo, posiblemente, e sifranan ta hopi mas haltu. Nos no tin tur sifra, pasobra ta difísil pa mantené kontakto ku nos rumannan na tur parti di Ukrania.

• 37 publikadó a muri

• 74 publikadó a ser heridá

• 45.253 publikadó a bandoná nan kas pa bai otro lugá di e pais ku ta mas safe

• 418 kas a ser destruí

• 466 kas tin daño grandi

• 1.213 kas tin daño leve

• 4 Salòn di Reino ta kompletamente destruí

• 8 Salòn di Reino tin daño grandi

• 33 Salòn di Reino tin daño leve

• Tin 27 Komité di Ousilio na Ukrania

• E komiténan a yuda 48.806 publikadó haña otro lugá mas safe pa keda

• 21.786 publikadó a hui pa otro pais. Einan, nos rumannan ta yudando e publikadónan ei