Ruum chi reʼ taqeh hermano kʼahchiʼ kikʼiik pan tiʼ kʼaxik, reʼ Sucursal reh Ucrania kow kʼahchiʼ rukamaniik reh rilariik taqeh hermano i wilkeebʼ chupaam i tinamit eh reh ruyeʼariik rukowiil kikʼux. Chupaam chuʼnchel i tinamit wilik taqeh hermano kʼahchiʼ kiyeʼem kikʼux chi ruyeʼariik rukowiil kikʼux taqeh aj qʼorol kʼuhbʼaal i xkikanaaʼ i kipaat. Reʼ i wilih kʼahchiʼ rutoobʼeem taqeh hermano pan uxlabʼal. Pan jenaj yeʼaabʼ ar Ucrania pan tinamit Úzhgorod wilik naa 30 chi hermano i kʼahchiʼ keebʼ chi kahnik chupaam. Pan jenaj yeʼaabʼ reh moloj iibʼ chupaam i yeʼaabʼ reʼreʼ, jenaj hermano inchalik pan Sucursal xqʼorik ruukʼ jenaj hermana, reʼ hermana xuʼqor: «Xwikʼraaj chi reʼ Jehová kʼahchiʼ ruchopom i nuqʼabʼ eh kʼahchiʼ kiin ruqʼahcheem».

Chupaam i 27 tzuhbʼ reh i kiʼilwik reh inkikʼul i tiʼ kʼaxik, wilik naa 100 chi hermano i kʼahchiʼ woʼ kikʼulum rukowiil kikʼux. Reʼ Ígor, jenaj keh i kikamanik kuukʼ i kiʼilwik reh inkikʼul i tiʼ kʼaxik iruqʼor: «Reʼ hin ruchʼihil i wehkʼeen xojelik je pan qapaat noq kʼahchiʼ naq i qʼaqʼinik. Noq wilkooj pan tokoom paat, reʼ taqeh hermano i kiʼilwik reh inkikʼul i tiʼ kʼaxik xojkiyuqʼej reh chi ne kojkamanik kuukʼ. Eh noq hoj naq qʼuhteel, jenaj hermano inkamanik pan Sucursal, atoobʼ ta lahtzʼ woʼ naq wach, xrisaj ruqʼiij eh xojrulaʼineej, eh xojrubʼiraj ruukʼ chuʼnchel rukʼux. Xqikʼraaj chi pan korik iruyeew naq rukʼux chi qiij. Wilik pech maʼxta ne inqabʼan reh taqeh kʼaxkilal, inqʼikraaj qiibʼ jeʼ rukabʼ jenoʼ halakuʼn; maʼ qehtʼal ta naq nikʼwach ne inqakorsaj wach i kʼaxkilal. Noq jeʼreʼ inqakʼul inqapahqaaj reh i Jehová chi ne qojrutobʼeej ruukʼ taqeh kʼaxkilal, eh chupaam i juʼnkʼaam reʼreʼ inqakoj rehtaal chi reʼ i Jehová qojrutobʼeej».

Reh taqeh yeʼaabʼ reh moloj iibʼ i wilkeebʼ ahaʼ wiiʼ wilik qʼaqʼinik, kijibʼ xsacharik kiwach, waxaqiibʼ xiyojibʼik eh 33 xiyojibʼik kʼisiin.

Chuʼnchel i naqilom inchalik ruukʼ taqeh testigo reh Jehová i wilkeebʼ ar Ucrania. Xa reʼ laʼ, wilik i maʼ xqatzʼihbʼaaj taj, ruum chi kʼaxik qʼorik pan juʼjun taqeh yeʼaabʼ chupaam i tinamit. Pan 17 reh mayo reh 2022, reʼ i wilih kʼahchiʼ rukʼulariik ar Ucrania:

• 37 testigo reh Jehová xikimik.

• 74 chi Testigos tiʼ wilkeebʼ.

• 45,253 chi Testigos xkikanaaʼ i kipaat eh xiʼooj pan tokoom yeʼaabʼ, ahaʼ wiiʼ ne inkikoʼleej kiibʼ.

• 418 i paat xisacharik wach.

• 466 i paat xiyojibʼik.

• 1,213 paat xiyojibʼik kʼisiin.

• 4 yeʼaabʼ reh moloj iibʼ xisacharik wach.

• 8 yeʼaabʼ reh moloj iibʼ xiyojibʼik.

• 33 chi yeʼaabʼ reh moloj iibʼ xiyojibʼik kʼisiin.

• Wilik 27 tzuhbʼ chi hermano, reʼ kiʼilwik reh inkikʼul i tiʼ kʼaxik, kʼahchiʼ keebʼ chi kamanik ar Ucrania.

• Reʼ taqeh i kiʼilwik reh inkikʼul i tiʼ kʼaxik, xkitobʼeej 48.806 chi Testigos reh chi ne inkireq jenoʼ yeʼaabʼ ahaʼ wiiʼ ne inkikoʼleej kiibʼ.

• 21.786 chi testigo reh Jehová xkikanaaʼ i tinamit eh kʼahchiʼ kikʼulum kitobʼaal keh i tokoom chi Testigo.