Nuʼudar situasaun susar kontinua iha Ukránia, sukursál Ukránia hakaʼas an liután atu tau matan didiʼak ba Jeová nia bibi sira. Irmaun sira neʼebé simu knaar neʼe serbisu badinas atu vizita irmaun-irmán rihun ba rihun neʼebé halai ona ba área seluk. Vizita neʼe lori benefísiu barak. Irmaun ida husi Komisaun Sukursál vizita irmaun-irmán sira neʼebé halai ona ba parte oeste iha Ukránia. Depois simu vizita neʼe, irmán ida neʼebé hela iha Reuniaun-Fatin iha sidade Uzhgorod hamutuk ho irmaun-irmán sira maizumenus naʼin-30 dehan: “Haʼu sente hanesan Jeová lolo liman hodi hakoʼak haʼu.”

Irmaun sira mós hakaʼas an atu vizita irmaun maizumenus naʼin-100 neʼebé serbí nuʼudar membru ba Komisaun ba dezastre hamutuk 27. Irmaun ida husi Komisaun ba dezastre naran Ihor dehan: “Bainhira haʼu simu knaar atu serbí iha komisaun neʼe, haʼu-nia feen no haʼu halai ona ba fatin seluk no hela iha uma ida. Kuandu ami sente kole liu no la iha forsa, irmaun ida neʼebé serbí iha Komisaun ba Sukursál buka tempu hodi vizita ami maski nia rasik mós okupadu, no nia rona didiʼak mai ami. Ami sente nia interese duni ba ami.” Ihor mós dehan: “Dala ruma mosu situasaun neʼebé halo ita sente hanesan bebé neʼebé labele halo buat ida no ita la hatene dalan atu rezolve, só deʼit bele halo orasaun ba Jeová, maibé iha situasaun hanesan neʼe, dala barak ita bele haree Jeová nia liman ajuda ita.”

Toʼo agora Reuniaun-Fatin 4 mak rahun hotu, 8 hetan estragu boot, no 33 hetan estragu uitoan.

Iha loron 17 Maiu 2022, iha relatóriu foun kona-ba Ukránia. Númeru sira-neʼe bazeia ba relatóriu sira neʼebé konfirma ona husi irmaun sira iha neʼebá. Maibé, karik sei iha barak liután, tanba susar atu komunika ho área hotu iha Ukránia.

• Irmaun-irmán naʼin-37 mate

• Irmaun-irmán naʼin-74 hetan kanek

• Irmaun-irmán naʼin-45.253 husik sira-nia uma hodi halai ba fatin seluk neʼebé seguru liu

• Uma 418 rahun hotu

• Uma 466 hetan estragu boot

• Uma 1.213 hetan estragu uitoan

• Reuniaun-Fatin 4 rahun

• Reuniaun-Fatin 8 hetan estragu boot

• Reuniaun-Fatin 33 hetan estragu uitoan

• Komisaun ba dezastre hamutuk 27 mak ajuda daudaun iha Ukránia

• Komisaun ba dezastre ajuda irmaun-irmán naʼin-48.806 atu hetan hela-fatin iha área neʼebé seguru liu

• Irmaun-irmán naʼin-21.786 halai ona ba nasaun seluk no irmaun-irmán husi nasaun sira-neʼe ajuda sira