Beinte-singko na ka tuig nga may opisyal nga website sa Internet ang mga Saksi ni Jehova. Sang Nobiembre 1997, ginpakilala sang Ang Aton Ministeryo sa Ginharian ang aton bag-o nga website nga watchtower.org. Ginsambit ini sa artikulo nga “Ang Maayong Balita sa Internet.” Ang artikulo nagsiling: “Ang Sosiedad nagbutang sa Internet sing pila ka sibu nga impormasyon tuhoy sa mga pagtuluuhan kag mga hilikuton sang mga Saksi ni Jehova. . . . Ang katuyuan sang aton Web site amo ang pagpaposible nga matigayon sang publiko ang impormasyon sa elektroniko nga paagi.”

Sugod sina nga tion, ma-download na sang publiko sa watchtower.org ang pila ka tract, brosyur, kag mga artikulo sang Lalantawan kag Magmata! Ang website nga watchtower.org nangin available sa publiko sang Enero 15, 1997. Dayon ang jw-media.org nangin available sang 1999. Naghatag ini sang sibu nga mga impormasyon sa media parte sa mga hitabo nga nagadalahig sa mga Saksi ni Jehova, lakip ang mga kaso sa korte kag iban pa nga mga hilikuton sang organisasyon.

Sang 2005, nangin available ang jw.org, kag sang ulihi gingamit ini para ma-download sang mga tawo ang pila ka publikasyon kag mga audio recording.

Sang Agosto 2012, ining tatlo ka website gintingob sa ginpanami pa gid nga jw.org. Parte sa sining gin-update nga website, ang aton Disiembre 2012 nga Ang Aton Ministeryo sa Ginharian nagsiling: “Mga 33 porsiento sang populasyon sang kalibutan ang nagagamit sing Internet. Nangin panguna ini nga galamiton agod makatigayon sing impormasyon, ilabi na para sa mga pamatan-on. . . . Ang maayong balita mahimo na mapalab-ot sa mga tawo nga diutay lang ang kahigayunan nga makabati sing mensahe sang Ginharian.”

Mas nagdamo ang unod kag mas madamo nga mga tawo ang nalab-ot sang JW.ORG. Nagdugang ang mga artikulo, audio, kag mga video sa sini nga website. Ang mga publikasyon ma-download na sa 411 ka lenguahe. Pagligad sang pila ka tuig, pagkatapos nga ginpanami ini sang 2012, ang mga literatura sa jw.org available na sa sobra 1,000 ka lenguahe, lakip ang 100 ka sign language. Amo ini ang una nga website nga available ang impormasyon sa 1000 ka lenguahe.

Sang tion sang COVID-19 nga pandemic, mas madamo pa gid ang naggamit sang JW.ORG. Nakabulig gid ini sang gin-untat ang face-to-face nga miting sang mga kongregasyon kag mas mabudlay na mag-print kag magpanagtag sang mga publikasyon. Ang pinakamadamo nga nagbisita sa aton website natabo sang Abril 7, 2020, nga adlaw sang Memoryal sang kamatayon ni Jesus. Ang narekord nga kadamuon sobra pito ka milyon. Sang 2020 naman, sobra isa ka bilyon ang nagbisita sa website samtang 800 ka milyon lang sang 2019. Sugod sang Enero 2022, sobra tatlo ka milyon ang average nga nagabisita kada adlaw sa website.

Ang sibu nga impormasyon nga makita sa jw.org nakabulig para madula sang mga tawo ang ila diskriminasyon sa mga Saksi ni Jehova. Halimbawa, si Tenesha Gordon nagsiling: “Nanamian ako kay kahapos lang ma-access ang impormasyon parte sa mga Saksi, pareho sang kon sin-o sila, ano ang ila ginapatihan, kag kon ano ang basihan sang ila mga ginapatihan. Nakabulig ini para maklaruhan ako sa akon sala nga pagpati parte sa ila.

Nabawtismuhan si Tenesha sang 2017. Isa na sia subong ka commuter Bethelite sa Jamaica.

Si Brother Clive Martin, nga amo ang overseer sang department nga naga-maintain sang website, nagsiling: “Makalilipay gid makita nga ginagamit ni Jehova ang jw.org para malab-ot sang maayong balita sang Ginharian sang Dios ang madamo nga tawo nga sarisari ang gindak-an sa tanan nga bahin sang kalibutan.”

Nagapasalamat gid kita kay Jehova sa sini nga website nga padayon nga nagabulig sa aton sa pagbantala nga hilikuton. Nagabulig man ini sa aton nga mangin updated sa pag-uswag sang organisasyon kag nagahiusa sang tanan nga kauturan sa bilog nga kalibutan para sa kadayawan ni Jehova.—Salmo 145:1, 2.