အင်တာနက်မှာ ယေဟောဝါသက်သေတွေရဲ့ တရားဝင်ဝက်ဘ်ဆိုက်ရှိနေတာ ၂၅ နှစ်တိုင်ခဲ့ပါပြီ။ ၁၉၉၇ ခုနှစ်၊ နိုဝင်ဘာလထုတ် ကျွန်ုပ်တို့၏နိုင်ငံတော်ဓမ္မအမှု စာစောင်ရဲ့ “အင်တာနက်ပေါ်က သတင်းကောင်း” ဆောင်းပါးမှာ ဝက်ဘ်ဆိုက်အသစ် watchtower.org ကို မိတ်ဆက်ဖော်ပြခဲ့တယ်။ ဆောင်းပါးမှာ အခုလိုရှင်းပြထားတယ်- “ယေဟောဝါသက်သေတွေရဲ့ ယုံကြည်ချက်နဲ့ လုပ်ဆောင်မှုတွေအကြောင်း တိကျတဲ့အချက်အလက်တွေကို အင်တာနက်ပေါ်မှာ တင်ထားပါတယ်။ . . . ဝက်ဘ်ဆိုက်လုပ်ရတဲ့ရည်ရွယ်ချက်က စာပေအသစ်တွေတင်ဖို့ မဟုတ်ပါဘူး။ သတင်းအချက်အလက်တွေကို အီလက်ထရောနစ်ပုံစံနဲ့ လူတွေ ဖတ်နိုင်ဖို့ပါ။”

အဲဒီအချိန်ကစပြီး watchtower.org ဝက်ဘ်ဆိုက်မှာ ဝေစာ၊ စာစောင်၊ ကင်းမျှော်စင်နဲ့ နိုးလော့ ဆောင်းပါးတချို့ကို ကူးယူနိုင်ခဲ့တယ်။ watchtower.org ဝက်ဘ်ဆိုက်ကို ၁၉၉၇ ခုနှစ်၊ ဇန်နဝါရီ ၁၅ ရက်မှာ စဖွင့်ခဲ့တယ်။ ၁၉၉၉ ခုနှစ်မှာ jw-media.org ဝက်ဘ်ဆိုက်ကို ဖွင့်တယ်။ ဥပဒေရေးရာကိစ္စ၊ အဖွဲ့အစည်းရဲ့လုပ်ဆောင်မှုစတဲ့ ယေဟောဝါသက်သေတွေအကြောင်း လတ်တလောဖြစ်ရပ်တွေကို မီဒီယာသမားတွေ မှန်မှန်ကန်ကန်သိနိုင်ဖို့ သတင်းတွေကို jw-media.org ဝက်ဘ်ဆိုက်မှာ တင်ပေးတယ်။

၂၀၀၅ ခုနှစ်မှာ jw.org ဝက်ဘ်ဆိုက်ကို ဖွင့်ခဲ့ပြီး နောက်ပိုင်းမှာ စာအုပ်စာပေနဲ့ အသံဖိုင်တွေကို ကူးယူနိုင်ဖို့ ပြင်ဆင်ပေးခဲ့တယ်။

၂၀၁၂ ခုနှစ်၊ ဩဂုတ်လမှာ ပြန်လည်မွမ်းမံထားတဲ့ jw.org ဝက်ဘ်ဆိုက်ထဲ ဝက်ဘ်ဆိုက်သုံးခုစလုံးကို ပေါင်းလိုက်တယ်။ အဲဒီအကြောင်းကို ၂၀၁၂ ခုနှစ်၊ ဒီဇင်ဘာလထုတ် ကျွန်ုပ်တို့၏နိုင်ငံတော်ဓမ္မအမှု စာစောင်မှာ အခုလိုဖော်ပြခဲ့တယ်- “ကမ္ဘာ့လူဦးရေရဲ့ သုံးပုံတစ်ပုံလောက်က အင်တာနက်ကို အသုံးပြုကြတယ်။ လူများစွာအတွက်၊ အထူးသဖြင့် လူငယ်တွေအတွက် အင်တာနက်ဟာ သတင်းအချက်အလက်ရှာယူရာရင်းမြစ် ဖြစ်လာတယ်။ . . . သတင်းကောင်းရောက်ဖို့မလွယ်တဲ့ ဒေသမှာနေထိုင်သူတွေကို သတင်းကောင်းကြားသိစေနိုင်တယ်။”

JW.ORG ဝက်ဘ်ဆိုက်မှာ အကြောင်းအရာတွေ ပိုစုံလာတယ်။ စာအုပ်စာပေ၊ အသံဖိုင်၊ ဗီဒီယိုတွေ ပိုများလာတယ်။ ဘာသာစကား ၄၁၁ မျိုးနဲ့ စာပေတွေကို ကူးယူနိုင်တယ်။ ဝက်ဘ်ဆိုက်ကို ပြန်လည်ဖန်တီးခဲ့တဲ့ ၂၀၁၂ ခုနှစ်ကနေ ၇ နှစ်အကြာဖြစ်တဲ့ ၂၀၁၉ ခုနှစ်မှာတော့ စာပေတွေကို လက်သင်္ကေတပြဘာသာစကား ၁၀၀ အပါအဝင် ဘာသာစကားပေါင်း ၁၀၀၀ ကျော်နဲ့ ရရှိနိုင်ပြီ။ ဘာသာစကားအများဆုံးနဲ့ဖတ်ရှုနိုင်တဲ့ ဝက်ဘ်ဆိုက်ပါပဲ။

ကိုဗစ် ၁၉ ကပ်ရောဂါဖြစ်လာတော့ JW.ORG ဝက်ဘ်ဆိုက် ပိုအသုံးဝင်လာတယ်။ လူကိုယ်တိုင်တက်ရောက်တဲ့ အစည်းအဝေးတွေကို ရပ်နားလိုက်ရလို့၊ စာပေတွေကို ပုံနှိပ်ထုတ်ဝေဖို့၊ ဝေငှဖို့ ပိုခက်လာလို့ ဝက်ဘ်ဆိုက်အသုံးပြုမှု ပိုများလာတယ်။ ၂၀၂၀ ပြည့်နှစ်၊ ဧပြီ ၇ ရက်၊ ယေရှုရဲ့ သေခြင်းသတိရအောက်မေ့ရာပွဲမှာ ဝက်ဘ်ဆိုက်ကို ဝင်ရောက်ကြည့်ရှုသူပေါင်း ၇ သန်းကျော်ရှိခဲ့လို့ အများဆုံးစံချိန်တင်ခဲ့တယ်။ ၂၀၁၉ ခုနှစ်မှာ ဝင်ရောက်ကြည့်ရှုမှုပေါင်း သန်း ၈၀၀ ရှိခဲ့ပြီး ၂၀၂၀ ပြည့်နှစ်မှာတော့ သန်းတစ်ထောင်ကျော်သွားတယ်။ ၂၀၂၂ ခုနှစ်၊ ဇန်နဝါရီလကစပြီး တစ်ရက်ကို ပျမ်းမျှ သုံးသန်းလောက် ဝင်ရောက်ကြည့်ရှုကြတယ်။

jw.org ဝက်ဘ်ဆိုက်မှာ တင်ထားတဲ့ သတင်းမှန်တွေကိုဖတ်လို့ ယေဟောဝါသက်သေတွေအကြောင်း မဟုတ်မမှန်သတင်းတွေ မှားတယ်ဆိုတာ လူတွေ သိလာကြတယ်။ ဥပမာတစ်ခုကတော့ တန်နက်ရှာ ဂေါ်ဒင် ဖြစ်တယ်။ သူ အခုလို ပြောပြတယ်- “ယေဟောဝါသက်သေတွေက ဘယ်သူတွေလဲ၊ ဘာကိုယုံကြည်ကြသလဲ၊ သူတို့ယုံကြည်ချက်က ဘယ်အပေါ်အခြေခံသလဲ စတဲ့အကြောင်းအရာတွေကို လွယ်လွယ်ကူကူဖတ်ရှုနိုင်လို့ ကျွန်မ သဘောကျမိတယ်။ ယေဟောဝါသက်သေတွေအပေါ် အမြင်မှားတာကို ချေဖျက်နိုင်ခဲ့တယ်။”

၂၀၁၇ ခုနှစ်မှာ တန်နက်ရှာ နှစ်ခြင်းခံတယ်။ အခု ဂျမေကာနိုင်ငံက ဗေသလမှာ အချိန်ပိုင်းလုပ်အားပေးနေပါတယ်။

ဝက်ဘ်ဆိုက်ပြုပြင်ထိန်းသိမ်းရေးဆိုင်ရာဌာန ကြီးကြပ်မှူး ညီအစ်ကို ကလိုက်ဖ် မာတင် အခုလိုပြောပြတယ်- “ယေဟောဝါဘုရားက jw.org ကို သုံးပြီး ကမ္ဘာ့ဒေသအသီးသီးမှာနေတဲ့ နောက်ခံအမျိုးမျိုးက လူတွေကို ဘုရားနိုင်ငံတော်သတင်းကောင်း ကြားသိစေတယ်။ ဒါကို မြင်ရတာ တကယ်ဝမ်းသာစရာပဲ။”

ဝက်ဘ်ဆိုက်က ကျွန်တော်တို့ကို ဟောပြောခြင်းလုပ်ငန်းမှာ ကူညီပေးတယ်၊ အဖွဲ့အစည်းရဲ့ပြီးမြောက်အောင်မြင်မှုတွေကို မြင်တွေ့စေတယ်၊ ကမ္ဘာတစ်ဝန်းက ညီအစ်ကို/မတွေနဲ့ ရင်းနှီးစေတယ်။ ဒါတွေအားလုံးအတွက် ယေဟောဝါဘုရားကို ကျေးဇူးတင်ချီးမွမ်းပါတယ်။—ဆာလံ ၁၄၅:၁၊ ၂။