Pa 25 aña caba, testigonan di Jehova tin un website riba Internet. Nos a anuncia e website watchtower.org na publico den un articulo di Nos Ministerio di Reino di november 1997. E articulo a bisa: “Sociedad a pone algun informacion exacto tocante e creencia y actividadnan di testigonan di Jehova riba Internet ... E proposito di nos website no ta pa presenta publicacionnan nobo, sino pa haci informacion disponibel na e publico den forma electronico.”

For di e tempo ey, hende por a download algun tratado, foyeto y articulo di E Toren di Vigilancia y Spierta! for di watchtower.org. E website watchtower.org tabata disponibel pa publico for di 15 di januari 1997. Despues, na aña 1999, e website jw-media.org a bira disponibel. Eynan, e miembronan di prensa por a haya noticia veridico tocante testigonan di Jehova. E website ey tabatin, entre otro, noticia tocante asunto legal y otro desaroyo den nos organisacion.

Na aña 2005, jw.org a bira disponibel pa publico. Poco despues, hende por a cuminsa download algun publicacion y grabacion for di e website ey.

Den luna di augustus 2012, jw.org a haya un diseño nobo, y el a reemplasa e otro websitenan cu nos tabatin. Nos Ministerio di Reino di december 2012 a bisa lo siguiente tocante jw.org: “Un tercera parti di e poblacion mundial ta uza Internet. Pa hopi hende, specialmente hobennan, Internet a bira e fuente principal di informacion ... Pa medio di e website aki, e bon noticia ta yega na areanan di mundo caminda hende tin masha tiki chens di tende e mensahe di Reino.”

Despues cu JW.ORG a bira disponibel, mas informacion y publicacion a bira disponibel riba e website, entre otro, informacion skirbi, grabacion y video. E tempo ey, e website tabatin publicacion disponibel pa download na 411 idioma. Mas o menos 7 aña despues cu e website a haya su diseño nobo, JW.ORG tabatin literatura na 1.000 idioma, incluso 100 idioma di seña. Esey tabata algo historico.

JW.ORG tabata hopi util durante e pandemia di COVID-19. Mas y mas hende tabata subi riba nos website despues cu nos a stop di bay reunion en persona y cu a bira mas dificil pa print y distribui literatura. Dia 7 di april 2020 tabatin Conmemoracion di Cristo Su Morto. Riba e dia ey, tabata prome biaha cu e website a haya mas cu 7 miyon bishitante riba un dia. (E cantidad di bishitante ey ta basa riba loke nan ta yama na Ingles unique visitors.) Na 2020, e website a haya mas cu un mil miyon (1.000.000.000) bishitante. Esey ta hopi mas cu na 2019. E aña ey tabatin 800 miyon bishita. Desde januari 2022, na averahe, e website ta haya 3 miyon bishitante pa dia.

E website ta yuda hende haya informacion corecto tocante testigonan di Jehova. Esey ta yuda caba cu hopi prehuicio cu ta existi contra testigonan di Jehova. Por ehempel, Tenesha Gordon a bisa: “M’a gusta con facil tabata pa mi haya informacion tocante Testigonan riba e website. Mi por a haya sa ken testigonan di Jehova ta, kico nan ta kere aden y e base pa nan creencianan. Esey a yuda mi compronde cu algun di e cosnan cu mi tabata pensa tocante testigonan di Jehova no ta berdad.”

Tenesha a batisa na 2017. Awor, e ta traha na e oficina di sucursal na Jamaica.

Ruman Clive Martin ta superintendente di e departamento cu ta mantene e website. El a bisa: “Ta masha bunita pa mira con Jehova a uza jw.org pa yuda asina tanto hende te na e partinan mas leu di Tera haya e bon noticia tocante e Reino di Dios.”

Nos ta masha agradecido cu Jehova a duna nos jw.org pa yuda nos predica, yuda nos keda na altura di cambio den nos organisacion y yuda nos keda uni cu nos rumannan rond mundo. E website aki ta alaba nos Dios Jehova.—Salmo 145:1, 2.