Ofesi ya New York State Energy Research and Development Authority (NYSERDA) yili kupeleka chawanangwa chapadera cha ndalama zakukwana madola 1 miliyoni za ku America ku Ŵakaboni ŵa Yehova, chifukwa cha mapulani ghawemi agho ŵapanga gha ivyo ŵazengenge ku Ramapo. Chawanangwa ichi chapelekeka chifukwa chakuti mapulani gha umo ŵazengerenge ku malo agha ngakuti ghanangenge chilengiwa yayi. a Aka nkhakwamba kuti ku Ramapo panji ku chigaŵa cha Rockland County ŵanthu ŵapokere chawanangwa chapadera nga ni ichi chifukwa cha mapulani ghawemi gha ivyo ŵakukhumba kuzenga.

Keith Cady, uyo wali mu Komiti ya Kuzenga ku malo agha wakayowoya kuti: “Apo tikanozganga mapulani gha umo tamuzengera ku Ramapo, chilato chithu chikaŵa chakuti tileke kusakaza vinthu panji kunanga chilengiwa. Tikakondwa chomene kumanya kuti boma likawona kuyezgayezga kwithu kwakuti tileke kunanga chilengiwa na kutipa chawanangwa chapadera ichi pambere ntchito yithu yakuzenga iyi yindambeko. Ndalama izi tizigwiliskirenge ntchito mwamahara pamoza na vyawanangwa vyose ivyo Ŵakaboni ŵa Yehova ŵakupeleka.”

Chiphalizgano cha Mapulani gha Kazengekero (The Buildings of Excellence Competition) ka nyumba ziwemi ku United States ntchimoza pera mu charu chose ichi. Chiphalizgano ichi chikamba mu March 2019 ndipo kufika pasono ŵapelekapo vyawanangwa 63 pa nkhani ya vyakuzengazenga. Ofesi ya NYSERDA pa webusayiti yawo yili kuyowoya kuti awo ŵali kupika vyawanangwa chifukwa cha mapulani ghawo ghawemi gha kazengero “ŵawovwirenge kuti ŵanyawo ŵasambireko kwa iwo kuti nawo munthazi ŵaleke kunanga mphepo ziwemi para ŵakuzenga.”

Tikuwonga chomene kuti ŵalara ŵa boma ŵali kuwona mapulani yithu yawemi ndipo ivi vili kupeleka uchindami kwa Yehova.—Mateyu 5:16.