ME 23, 2024
RUSIA

‘E Tiko Vata kei au o Jiova’

SARAVA/ROGOCA

Ena vakarau tauca na mataveilewai na Urupskiy District Court of the Karachayevo-Circassian Republic mai Rusia, na lewa me baleti Brother Aleksey Pasynkov. E se bera ni tukuna o dauveibeitaki na kena itotogi.

Kena iTukutuku

Aleksey Pasynkov

Sucu: 1988 (Moscow, Yasayasa o Moscow)

Me baleti koya: E susugi koya ga o tinana. E palama, e dau ukutaka tale ga na lomanivale

Ni yabaki tini, sa tekivu vulica o tinana na iVolatabu kei ira na iVakadinadina i Jiova. E qoroya na nodra doka na iVakadinadina i Jiova na iVolatabu kei na nodra dauloloma. A papitaiso o tinana ena 2000, o Aleksey ena 2002

Rau vakamau kei Yuliya ena 2013. E dua na luvedrau tagane e lokiloki

Ka e Tukuna

Na tikinivolatabu cava e vakayaloqaqataki kemudrau vakaveiwatini mo drau vosota?

Au dau vakasamataka vakatitobu na 1 Korinica 10:13, e kaya: “E sega ni dua na veivakatovolei e yacovi kemuni me duatani mai na kena era dau sotava na kena vo. Ia e dau dina na Kalou ena nona vosa, oya ni na sega ni vakalaiva moni sotava na ka ni veivakatovolei oni na sega ni taqea rawa. Ni oni vakatovolei, ena vakarautaka tale ga na sala moni vosota rawa kina.” Ena vica na yabaki sa oti, dua na ka neirau vakatovolei vakaveiwatini. E sucu na luvei keirau qai tauvi koya na mate ni vakasama. Sa yabaki walu qo, ia e vinakati me dua e tiko ga vata kei koya. Ena 2021, rau coqa vakacalaka na itubutubu nei watiqu. E mate o tamana, ena vuku ni mavoa sa yalani tale ga na ka e rawa ni cakava o tinana. Oti qori keirau sa tekivu tusaqati sara. Au raica ena tikinivolatabu qori ni ka ni veivakatovolei au sotava tiko, e tiki ni ituvaki ni bula eda sa tu kina nikua. Ia keirau vakila ena levu na gauna ni volekati keirau o Jiova, e veivakayaloqaqataki me keirau vosota tiko. Au vinakata sara ga me wali na leqa qo ena kena gauna totolo. Ia au nuidei ni na tiko vata kei au o Jiova ke balavu mada ga na veivakatovolei au sotava.

Se mani veivakatovolei cava eda sotava, eda vakavinavinaka ni noda ivakaruru o Jiova eda marau ni vakararavi vua.—Same 5:11.

Veitaravi ni Gauna

Noveba 23, 2021

Era lai vesuki Aleksey na vakailesilesi ena vanua ni nona cakacaka, oti ra lai vaqaqara e nona vale
Tiseba 8, 2022

Beitaki ni daubasulawa
Maji 3, 2023

iKarua ni gauna e caka kina na vaqaqara e nona vale. Rau vakatarogi o Aleksey kei Yuliya
Maji 31, 2023

Caka na vaqaqara ena vale nei tinai Aleksey kei ira na mataveitacini
Okotova 4, 2023

Vakatabui me gole ina dua tale na vanua
Tiseba 14, 2023

Tekivu veilewaitaki

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU