13 FEBRUARIE 2024
RUSLAND

Gefokus op die eer om Jehovah te dien

SPEEL

Die Wiselkofski-distrikshof van die Krasnodar-gebied sal binnekort sy uitspraak gee in die saak teen broer Jefgeni Botjko, Wladimir Kolesnikof, Aleksei Sjoebnikof, Witali Oesjakof en Waleri Wetjkajef. Die aanklaer het nog nie ’n spesifieke vonnis aangevra nie.

Profiel

Jefgeni Botjko

Gebore: 1975 (Nowoberezanski, Krasnodar-gebied)

Agtergrond: Het as ’n instandhoudingsingenieur gewerk

Het tot God gebid vir hulp om die ware godsdiens te identifiseer. Gedoop as een van Jehovah se Getuies in 1998

Trou met Anna in 2009

Gediagnoseer met veelvuldige sklerose

Persoonlike kommentare

Waarop het jy gefokus terwyl jy deur hierdie kriminele ondersoek en verhoor gegaan het?

Regdeur hierdie proses het ek en my vrou gebid dat ons eer op Jehovah se naam kan bring. En ons het die geleentheid gekry om dit te doen. Terwyl een van die speurders besig was om deur al die dokumente van die kriminele saak te gaan, het hy ons baie vrae oor Jehovah se Getuies gevra. Daar is 17 dokumente in die saak en elkeen is tussen 100 en 350 bladsye lank. Op amper elke bladsy verskyn Jehovah se naam. Dit is ’n groot voorreg om ’n deel daaraan te hê om sy naam bekend te maak.

Wladimir Kolesnikof

Gebore: 1946 (Oekraïne)

Agtergrond: Het afgetree uit die weermag. Het later in die mynwese gewerk

Trou met Zinaida in 1979. Hulle het twee dogters en ’n seun. Zinaida is in 2020 oorlede

Het as ’n paartjie die Bybel saam met Jehovah se Getuies gestudeer. Albei is in 1995 gedoop

Persoonlike kommentare

Wat het jou gehelp om jou vreugde te behou ten spyte van die moeilike tye wat jy deurmaak?

Dit is nie altyd maklik om die baie uitdagings wat ek het, te hanteer nie. Alhoewel ek partykeer mismoedig word, het ek geleer hoe om sulke gevoelens te oorkom. Ek bid en maak gebruik van die Bybelpublikasies wat beskikbaar is. My waardering vir God se Woord het groter geword, en ek het geleer hoe belangrik dit is om tot Jehovah te bid en hom van al my bekommernisse te vertel. As ek terugdink, besef ek dat ek in die verlede probeer het om dinge op my eie op te los. Om nou met Jehovah oor my gevoelens, my bekommernisse en my vreugde te praat, gee vir my ’n gevoel van tevredenheid en stabiliteit.

Aleksei Sjoebnikof

Gebore: 1982 (Nizjnewartofsk, Tjoemen-streek)

Agtergrond: In ’n rolstoel ná ’n ernstige ruggraatbesering toe hy 16 jaar oud was. Is beïndruk deur die Bybel se logiese verduideliking oor swaarkry

Gedoop in 2008

Persoonlike kommentare

Wat het jy geleer as gevolg van die kriminele vervolging wat jy deurmaak?

Wanneer ek ondervindinge gelees het van broers en susters wat gesê het dat hulle vrede gedurende hulle verhoor ervaar het, het ek gewonder: ‘Hoe is dit moontlik?’ Maar toe ek ondersoek en ondervra is en hof toe moes gaan en ’n getuienis moes gee, het ek vrede gehad. Dit is vir my ’n bewys dat Jehovah my help en dat dit moontlik is om deur sulke moeilike tye met vreugde te gaan. Ek is baie dankbaar dat Jehovah my ondersteun en vir die eer om hom te dien.

Waleri Wetjkajef

Gebore: 1973 (Wiselki, Krasnodar-gebied)

Agtergrond: Doen binnenshuise afwerking. Is beïndruk deur die hoë sedelike standaarde in die Bybel en hoe Jehovah se Getuies daarvolgens lewe. Gedoop in 1999

Trou met Irina in 1996. Hulle het twee seuns en ’n dogter

Persoonlike kommentare

Hoe help Jehovah jou om hierdie moeilike tyd te verduur?

Jehovah help my op baie maniere. My broers en susters bid vir my en het my materieel en emosioneel ondersteun. En deur die vervulling van Bybelprofesieë maak Jehovah dit duidelik dat sy nuwe wêreld naby is. Dit het veroorsaak dat ek die probleme wat ek nou het, soos wolke beskou. Hulle kom in verskillende vorme en groottes, maar hulle sal uiteindelik weggaan en heeltemal verdwyn. Ek is dankbaar dat Jehovah in die tussentyd my die krag gee om te volhard.

Ons is oortuig dat Jehovah sal aanhou om vreugde en krag te gee aan hierdie broers en almal wat aanhou om op hom vir ondersteuning te vertrou. – Psalm 141:8.

Tydlyn

11 Februarie 2022

Kriminele saak word teen Jefgeni, Aleksei, Witali en Waleri gemaak
13 Februarie 2022

Huise word deursoek. Jefgeni, Aleksei en Witali word ondervra. Witali word in ’n tydelike detensiesentrum geplaas
15 Februarie 2022

Witali word na ’n detensiesentrum voor sy verhoor gestuur
16 Februarie 2022

Jefgeni en Aleksei word onder reisbeperkings geplaas
18 Februarie 2022

Waleri word onder reisbeperkings geplaas
21 Februarie 2022

Kriminele saak word teen Wladimir gemaak
15 Maart 2022

Wladimir word onder reisbeperkings geplaas. Kriminele sake word gekombineer
8 September 2022

Witali word uit aanhouding voor sy verhoor vrygelaat en onder huisarres geplaas
10 Oktober 2022

Witali word uit huisarres vrygelaat en onder reisbeperkings geplaas
31 Mei 2023

Kriminele verhoor begin

Jy sal dalk ook hiervan hou

NUUSBERIGTE

In die tronk weens hulle geloof – Rusland

Jehovah se Getuies in Rusland is in die tronk weens hulle geloof. Vind uit wat hulle geskiedenis is, en kry ’n lys van al die Getuies wat tans in die tronk is.

NUUSBERIGTE