የካቲት 13, 2024
ሩሲያ

ይሖዋን ማገልገል በሚያስገኘው ክብር ላይ አተኩረዋል

አጫውት

በክራስኖዳር ግዛት የሚገኘው የቭይሴልኮቭስኪ አውራጃ ፍርድ ቤት፣ በወንድም ዬቭጌኒ ቦችኮ፣ ቭላድሚር ኮሌስኒኮቭ፣ አሌክሴ ሹብኒኮቭ፣ ቪታሊ ኡሻኮቭ እና ቫለሪ ቬችካዬቭ ክስ ላይ በቅርቡ ውሳኔ እንደሚያስተላልፍ ይጠበቃል። አቃቤ ሕጉ እንዲተላለፍባቸው የሚፈልገውን ብይን ገና አላሳወቀም።

አጭር መግለጫ

ዬቭጌኒ ቦችኮ

ትውልድ፦ 1975 (ኖቮቤሬዛንስኪ፣ ክራስኖዳር ግዛት)

ግለ ታሪክ፦ የጥገና መሐንዲስ ሆኖ ይሠራ ነበር

እውነተኛውን ሃይማኖት ለማግኘት እንዲረዳው ወደ አምላክ ይጸልይ ነበር። በ1998 ተጠምቆ የይሖዋ ምሥክር ሆነ

በ2009 አናን አገባ

መልቲፕል ስክሌሮሲስ የተባለ ከባድ የጤና እክል አለበት

የሰጠው ሐሳብ

በዚህ የወንጀል ምርመራና የፍርድ ሂደት ወቅት ትኩረትህ ያረፈው በምን ላይ ነው?

በዚህ ሂደት ሁሉ እኔና ባለቤቴ ጸሎታችን ለይሖዋ ስም ውዳሴ ማምጣት እንድንችል ነው። ደግሞም አጋጣሚው ተከፍቶልናል። አንደኛው መርማሪ የክስ ፋይሉን በሚያገላብጥበት ጊዜ ስለ ይሖዋ ምሥክሮች ብዙ ጥያቄ ጠየቀን። የክስ ፋይሉ፣ እያንዳንዳቸው ከ100 እስከ 350 ገጽ ያላቸው 17 ሰነዶችን የያዘ ነው። በእያንዳንዱ ገጽ ላይ ማለት ይቻላል፣ የይሖዋ ስም ይገኛል። ስሙን ለማሳወቅ የበኩላችንን ማድረግ በመቻላችን ክብር ይሰማናል።

ቭላድሚር ኮሌስኒኮቭ

ትውልድ፦ 1946 (ዩክሬን)

ግለ ታሪክ፦ ከጦር ሠራዊቱ በጡረታ የተገለለ ነው። በኋላ ላይ፣ ማዕድን ማውጫ ውስጥ ይሠራ ነበር

በ1979 ከዚናይዳ ጋር ትዳር መሠረተ። ሁለት ሴቶችና አንድ ወንድ ልጅ አፍርተዋል። ዚናይዳ በ2020 ሕይወቷ አልፏል

ባልና ሚስቱ ከይሖዋ ምሥክሮች ጋር መጽሐፍ ቅዱስን አጠኑ። ሁለቱም በ1995 ተጠመቁ

የሰጠው ሐሳብ

ብዙ መከራ እየደረሰብህ ቢሆንም አዎንታዊ አመለካከት ይዘህ እንድትቀጥል የረዳህ ምንድን ነው?

ያጋጠሙኝን ችግሮች መቋቋም ከባድ የሚሆንበት ጊዜ አለ። አንዳንዴ የተስፋ መቁረጥ ስሜት ቢሰማኝም ይህን ስሜት ማሸነፍ የሚቻልበትን መንገድ ተምሬያለሁ። እጸልያለሁ፤ እንዲሁም ባሉኝ መንፈሳዊ ዝግጅቶች እጠቀማለሁ። ለአምላክ ቃል ያለኝ አድናቆት ጨምሯል፤ እንዲሁም ሐሳቤን ሁሉ ለይሖዋ በጸሎት መናገር ምን ያህል ጠቃሚ እንደሆነ ተመልክቻለሁ። መለስ ብዬ ሳስብ፣ ለነገሮች መፍትሔ ለመስጠት የምሞክረው በራሴ ነበር። አሁን ግን ስሜቴን፣ ጭንቀቴንና ደስታዬን ለይሖዋ እነግረዋለሁ፤ ይህም እርካታና መረጋጋት ሰጥቶኛል።

አሌክሴ ሹብኒኮቭ

ትውልድ፦ 1982 (ኒዥኔቫርቶቭስክ፣ ትዩሜን ክልል)

ግለ ታሪክ፦ የ16 ዓመት ልጅ ሳለ በጀርባ አጥንቱ ላይ በደረሰበት ከባድ ጉዳት የተነሳ ያለተሽከርካሪ ወንበር መንቀሳቀስ አይችልም። መጽሐፍ ቅዱስ ስለ መከራ የሚሰጠው አሳማኝ ማብራሪያ ልቡን ነካው

በ2008 ተጠመቀ

የሰጠው ሐሳብ

በዚህ የምርመራ ሂደት ማለፍህ ምን አስተምሮሃል?

ወንድሞችና እህቶች ችሎት ፊት ሲቀርቡ ውስጣዊ ሰላም እንደተሰማቸው የሚገልጹ ተሞክሮዎችን ሳነብ ‘ይህ እንዴት ይሆናል?’ ብዬ አስብ ነበር። ነገር ግን ቤቴ ሲፈተሽ፣ ምርመራ ሲደረግብኝና ችሎት ፊት ቀርቤ ስመሠክር እኔም ይህ ሰላም ነበረኝ። ይህም ይሖዋ እየረዳኝ እንደሆነና ደስታዬን ጠብቄ ይህን ፈተና ማለፍ እንደምችል አረጋግጦልኛል። ይሖዋ ስለሚደግፈኝና እሱን የማገልገል ክብራማ መብት ስለሰጠኝ በጣም አመስጋኝ ነኝ።

ቪታሊ ኡሻኮቭ

ትውልድ፦ 1980 (ኻቱካይ፣ አዲጌያ ሪፑብሊክ)

ግለ ታሪክ፦ መካኒክ ነበር። እውነትን ያስተማረችው እናቱ ናት። በተለይ መጽሐፍ ቅዱስ የወደፊቱ ጊዜ አስደሳች እንደሚሆን የሚናገረው ተስፋ ማረከው። በ1995 ተጠመቀ

በ2006 ኢሪናን አገባ። ሁለት ወንዶች ልጆች አሏቸው

የሰጠው ሐሳብ

ማረፊያ ቤት ሳለህ እንድትጸና የረዳህ ምንድን ነው?

ማረፊያ ቤት እንደገባሁ ለአንድ ወር ተኩል ያህል መጽሐፍ ቅዱስ አልነበረኝም። ስለዚህ የማስታውሳቸውን ጥቅሶች እንዲሁም በእያንዳንዱ ጥቅስ ላይ ያለኝን ሐሳብ ማስታወሻ ደብተር ላይ ጻፍኩ። እንዲህ ማድረጌ በተለይ ለብቻዬ በታሰርኩበት ወቅት ጠቅሞኛል። አሉታዊ ስሜቶችን መቆጣጠር እንድችል ረድቶኛል። አሁን ወደ ይሖዋ ይበልጥ ቀርቤያለሁ፤ ልቤም አመራሩን ለመከተል ይበልጥ ንቁ ሆኗል።

ቫለሪ ቬችካዬቭ

ትውልድ፦ 1973 (ቭይሴልኪ፣ ክራስኖዳር ግዛት)

ግለ ታሪክ፦ የቤት ፊኒሺንግ ባለሙያ ነው። መጽሐፍ ቅዱስ ውስጥ የሚገኙት ላቅ ያሉ የሥነ ምግባር መሥፈርቶች እንዲሁም የይሖዋ ምሥክሮች እነዚህን መሥፈርቶች በሕይወታቸው ተግባራዊ ማድረጋቸው ትኩረቱን ሳበው። በ1999 ተጠመቀ

በ1996 ኢሪናን አገባ። ሁለት ወንዶችና አንዲት ሴት ልጅ አሏቸው

የሰጠው ሐሳብ

ይሖዋ ይህን አስቸጋሪ ሁኔታ እንድትቋቋም የረዳህ እንዴት ነው?

ይሖዋ በብዙ መንገዶች ይረዳኛል። ወንድሞችና እህቶች ይጸልዩልኛል፤ እንዲሁም በስሜትም ሆነ በቁሳዊ ድጋፍ ያደርጉልኛል። ይሖዋ የመጽሐፍ ቅዱስ ትንቢቶች እንዲፈጸሙ እያደረገ ነው፤ ይህም አዲሱ ሥርዓት በጣም እንደቀረበ ግልጽ አድርጎልኛል። ስለዚህ አሁን እየደረሱብኝ ያሉትን ፈተናዎች እንደ ደመና ነው የማያቸው። በተለያየ መልክና መጠን ሊመጡ ይችላሉ፤ ሆኖም መበታተናቸውና እንደ ጉም በንነው መጥፋታቸው አይቀርም። እስከዚያው ግን ይሖዋ ለመጽናት የሚያስችል ብርታት ስለሚሰጠኝ አመስጋኝ ነኝ።

ይሖዋ ለእነዚህ ወንድሞችም ሆነ የእሱን ድጋፍ ለሚሹት ሁሉ ደስታና ብርታት መስጠቱን እንደሚቀጥል አንጠራጠርም።—መዝሙር 141:8

የክሱ ሂደት

የካቲት 11, 2022

ዬቭጌኒ፣ አሌክሴ፣ ቪታሊ እና ቫለሪ የክስ ፋይል ተከፈተባቸው
የካቲት 13, 2022

ቤቶቻቸው ተፈተሹ። ዬቭጌኒ፣ አሌክሴ እና ቪታሊ ምርመራ ተደረገባቸው። ቪታሊ ጣቢያ እንዲቆይ ተደረገ
የካቲት 15, 2022

ቪታሊ ማረፊያ ቤት ገባ
የካቲት 16, 2022

ዬቭጌኒ እና አሌክሴ የጉዞ ገደብ ተጣለባቸው
የካቲት 18, 2022

ቫለሪ የጉዞ ገደብ ተጣለበት
የካቲት 21, 2022

ቭላድሚር የክስ ፋይል ተከፈተበት
መጋቢት 15, 2022

ቭላድሚር የጉዞ ገደብ ተጣለበት። ክሳቸው በአንድ መዝገብ ተጠቃለለ
መስከረም 8, 2022

ቪታሊ ከማረፊያ ቤት ተለቀቀ፤ ከዚያም የቁም እስረኛ ተደረገ
ጥቅምት 10, 2022

ቪታሊ ከቁም እስር ተፈታ፤ ከዚያም የጉዞ ገደብ ተጣለበት
ግንቦት 31, 2023

ክሳቸው በፍርድ ቤት መታየት ጀመረ

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች