PEBRERO 13, 2024
RUSSIA

Nakapokus sa Kadungganan sa Pag-alagad kay Jehova

I-PLAY

Sa indi madugay, ipahibalo sang Vyselkovskiy District Court of the Krasnodar Territory ang desisyon sini sa kaso nanday Brother Yevgeniy Bochko, Brother Vladimir Kolesnikov, Brother Aleksey Shubnikov, Brother Vitaliy Ushakov, kag Brother Valeriy Vechkayev. Wala pa sang ginsiling ang piskal kon ano nga sentensia ang gusto niya sa sini nga kaso.

Impormasyon Parte sa Ila

Yevgeniy Bochko

Natawo: 1975 (Novoberezansky, Krasnodar Territory)

Biograpiya: Nag-obra sia bilang maintenance engineer

Nangamuyo sia sa Dios nga makita ang matuod nga relihion. Nabawtismuhan sia bilang isa sa mga Saksi ni Jehova sang 1998

Napangasawa niya si Anna sang 2009

Na-diagnose sia nga may multiple sclerosis

Ang Iya Ginsiling

Ano ang pinakaimportante sa imo samtang ginaatubang mo ini nga imbestigasyon kag hearing?

Halin sang nagsugod ini nga kaso, ginapangamuyo namon sang akon asawa nga madayaw namon ang ngalan ni Jehova. Kag nahimo gid namon ina. Sang ginarebyu sang isa ka imbestigador ang mga materyal para sa kaso, ginpamangkot niya kami sing pila ka beses parte sa mga Saksi ni Jehova. May ara sang 17 ka dokumento sa sini nga kaso, ang kada isa may 100 asta 350 ka pahina. Sa halos kada pahina, mabasa ang ngalan ni Jehova. Daku gid nga kadungganan nga makapakigbahin sa pagpakilala sang iya ngalan.

Vladimir Kolesnikov

Natawo: 1946 (Ukraine)

Biograpiya: Nagretiro sia sa pagkasoldado. Sang ulihi, nag-obra sia sa isa ka minahan

Napangasawa niya si Zinaida sang 1979. May duha sila ka bata nga babayi kag isa ka bata nga lalaki. Napatay si Zinaida sang 2020

Dungan sila nga mag-asawa nga nagpa-Bible study upod sa mga Saksi ni Jehova. Nabawtismuhan sila sang 1995

Ang Iya Ginsiling

Ano ang nakabulig sa imo para padayon nga mangin malipayon bisan pa sang mga kabudlayan?

Indi gid pirme mahapos atubangon ang madamo nga problema. Bisan pa kon kaisa ginaluyahan ako, natun-an ko kon paano atubangon ini nga balatyagon. Nagapangamuyo ako kag ginabasa ko gid ang mga base sa Biblia nga mga publikasyon nga mabaton ko. Nagdugang pa gid ang akon apresasyon sa Pulong sang Dios, kag natun-an ko nga importante gid nga mangamuyo kay Jehova kag isugid sa iya ang tanan ko nga kabalaka. Sang una, narealisar ko nga ginsolbar ko ang mga problema sa akon lang kaugalingon. Subong, ang pagsugid kay Jehova sang akon nabatyagan, mga kabalaka, kag kalipay naghatag gid sa akon sang kasiguruhan kag kalinong.

Aleksey Shubnikov

Natawo: 1982 (Nizhnevartovsk, Tyumen Region)

Biograpiya: Naga-wheelchair na lang sia pagkatapos sang isa ka serioso nga spinal injury sang 16 anyos sia. Nagdayaw sia sa klaro nga paathag sang Biblia parte sa pag-antos

Nabawtismuhan sia sang 2008

Ang Iya Ginsiling

Ano ang natun-an mo bangod sang imo kaso?

Sang nabasahan ko ang eksperiensia sang mga kauturan nga nagsiling nga nakabatyag sila sang kalinong sang gina-hearing sila, namensar ako, ‘Paano ina natabo?’ Pero sang gin-raid ang amon balay kag gin-interogar ako kag sang kinahanglan ko magkadto sa korte para magpanaksi, nakabatyag ako sang kalinong. Ginpamatud-an sini nga ginabuligan ako ni Jehova kag natun-an ko nga maatubang ko ini nga kabudlayan sing malipayon. Nagapasalamat gid ako sa bulig ni Jehova kag sa kadungganan nga maalagad sia.

Vitaliy Ushakov

Natawo: 1980 (Khatukay, Republic of Adygeya)

Biograpiya: Nag-obra sia bilang mekaniko. Natun-an niya ang kamatuoran halin sa iya nanay. Nanamian gid sia sa promisa sang Biblia nga may malipayon nga palaabuton. Nabawtismuhan sia sang 1995

Napangasawa niya si Irina sang 2006. May duha sila ka bata nga lalaki

Ang Iya Ginsiling

Ano ang nakabulig sa imo nga makabatas sa prisuhan samtang nagahulat sang pag-hearing sa imo?

Sa sulod sang isa ka bulan kag tunga nga ara ako sa detention center, wala ako sang Biblia. Gani, ginsulat ko ang mga teksto nga madumduman ko sa isa ka notebook lakip ang mga napamalandungan ko sa kada isa sini. Nakabulig gid ini sang ginbartolina ako. Nakabulig ini nga mausisa ko ang akon ginabatyag. Subong, mas nangin suod pa gid ako kay Jehova kag mas determinado ako nga sundon ang iya mga sugo.

Valeriy Vechkayev

Natawo: 1973 (Vyselki, Krasnodar Territory)

Biograpiya: Nagaobra sia bilang interior finisher. Nagdayaw sia sa mataas nga talaksan sa moral nga mabasa sa Biblia kag kon paano ini ginasunod sang mga Saksi ni Jehova. Nabawtismuhan sia sang 1999

Napangasawa niya si Irina sang 1996. May duha sila ka bata nga lalaki kag isa ka bata nga babayi

Ang Iya Ginsiling

Paano ka ginbuligan ni Jehova para masarangan mo ini nga kabudlayan?

Ginabuligan ako ni Jehova sa madamo nga paagi. Ginapangamuyo ako sang mga kauturan kag ginahatagan nila ako sang materyal kag emosyonal nga suporta. Kag paagi sa katumanan sang mga tagna sa Biblia, ginapakita ni Jehova nga malapit na lang gid ang bag-ong kalibutan. Bangod sini, ginatan-aw ko ang akon mga kabudlayan nga daw mga panganod. May sarisari ini nga korte kag kadakuon, pero sa ulihi nagakadula ini. Nagapasalamat ako kay Jehova kay ginahatagan niya ako sang kusog nga makabatas subong.

Nagasalig kita nga padayon ni Jehova nga hatagan sang kalipay kag kusog ini nga mga brother kag ang tanan nga padayon nga nagasalig sa iya bulig.—Salmo 141:8.

Time Line

Pebrero 11, 2022

Ginsugdan ang kaso kontra kay Yevgeniy, Aleksey, Vitaliy, kag Valeriy
Pebrero 13, 2022

Gin-raid ang ila mga balay. Si Yevgeniy, Aleksey, kag Vitaliy gin-interogar. Ginbutang si Vitaliy sa temporary detention center
Pebrero 15, 2022

Gindala si Vitaliy sa pretrial detention center
Pebrero 16, 2022

Ginbutangan sang restriksion ang pagbiyahe ni Yevgeniy kag Aleksey
Pebrero 18, 2022

Ginbutangan sang restriksion ang pagbiyahe ni Valeriy
Pebrero 21, 2022

Ginsugdan ang kaso kontra kay Vladimir
Marso 15, 2022

Ginbutangan sang restriksion ang pagbiyahe ni Vladimir. Gintingob ang ila mga kaso
Septiembre 8, 2022

Ginpagua si Vitaliy sa pretrial detention pero gin-house arrest gihapon
Oktubre 10, 2022

Wala na gin-house arrest si Vitaliy pero ginbutangan sang restriksion ang iya pagbiyahe
Mayo 31, 2023

Ginsugdan ang hearing

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE