13 FEBROARY 2024
ROSIA

Notadidin-dry Zareo hoe Voninahitra ny Manompo An’i Jehovah

HANDEFA

Tsy ho ela ny Fitsaram-paritr’i Vyselkovskiy, any amin’ny Faritr’i Krasnodar dia hamoaka didy momba an’ireto rahalahy ireto: Yevgeniy Bochko, Vladimir Kolesnikov, Aleksey Shubnikov, Vitaliy Ushakov, ary Valeriy Vechkayev. Mbola tsy nolazain’ny mpampanoa lalàna hoe inona no sazy homena an-dry zareo.

Ilay voampanga

Yevgeniy Bochko

Teraka: 1975 (tany Novoberezansky, any amin’ny Faritr’i Krasnodar)

Mombamomba azy: Injeniera mpikojakoja milina

Nivavaka tamin’Andriamanitra mba hahita ny fivavahana marina. Natao batisa tamin’ny 1998, dia lasa Vavolombelon’i Jehovah

Nanambady an’i Anna tamin’ny 2009

Tratran’ny aretin’ny rafi-pitatitra

Resadresaka nifanaovana taminy

Anaovana famotorana ianao izao sady miakatra fitsarana satria lazaina hoe nanao heloka bevava. Inona anefa no tena ataonao ao an-tsaina?

Mivavaka foana izahay mivady mba hampian’i Jehovah hanome voninahitra ny anarany. Dia tena nahavita nanao an’izany izahay. Nanontany zavatra maromaro momba ny Vavolombelon’i Jehovah ny iray tamin’ireo mpanao famotorana tamin’izy nandinika an’ireo antontan-taratasy be dia be momba anay. Antontan-taratasy miisa 17 ilay izy, dia 100 pejy ny sasany, fa ny hafa maherin’izay, ary nisy aza nahatratra 350 pejy. Nisy an’ilay anarana hoe Jehovah foana, saika isaky ny pejy tsirairay. Tena voninahitra be ho anay ilay hoe mba afaka nampahafantatra ny anaran’i Jehovah.

Vladimir Kolesnikov

Teraka: 1946 (tany Ukraine)

Mombamomba azy: Miaramila taloha fa efa nisotro ronono. Niasa tamina orinasa mpitrandraka harena an-kibon’ny tany tatỳ aoriana

Nanambady an’i Zinaida tamin’ny 1979. Roa vavy sy lahy iray ny zanany. Maty tamin’ny 2020 i Zinaida

Niara-nianatra Baiboly tamin’ny Vavolombelon’i Jehovah izy mivady. Samy vita batisa tamin’ny 1995 ry zareo

Resadresaka nifanaovana taminy

Inona no nanampy anao ho faly foana na dia miaritra fitsapana aza?

Be dia be ny olana atrehiko, dia tsy mora foana ny mizaka an’ilay izy. Tsoriko hoe kivy aho indraindray, fa lasa hitako anefa ny fomba handresena an’izany. Mivavaka aho dia mamaky an’izay boky ara-baiboly ananako. Vao mainka tiako izao ny Tenin’Andriamanitra. Nianarako koa hoe tena ilaina ny tsy manafina na inona na inona amin’i Jehovah rehefa mivavaka aminy. Taloha aho niezaka nitady vahaolana irery indraindray rehefa nanana olana, fa amin’izao lasa resahiko amin’i Jehovah daholo ny any am-poko sy izay zavatra mampanahy ahy sy mahafaly ahy. Lasa milamin-tsaina aho sady faly rehefa avy manao an’izany.

Aleksey Shubnikov

Teraka: 1982 (tany Nizhnevartovsk, any amin’ny Faritr’i Tyumen)

Mombamomba azy: Nisy naratra be tao amin’ny hazondamosiny tamin’izy 16 taona, dia tsy maintsy mampiasa seza misy kodiarana izy. Nampiaiky azy hoe mitombina tsara ny fanazavan’ny Baiboly momba ny fijaliana

Natao batisa tamin’ny 2008

Resadresaka nifanaovana taminy

Inona no zavatra nianaranao amin’izao ianao ampangaina hoe nanao heloka bevava izao?

Taloha aho rehefa namaky tantarana rahalahy na anabavy niteny hoe nilamin-tsaina izy na dia niaritra fitsapana aza, dia hozy foana aho hoe: ‘Izany koa ve dia marina?’ Fa izaho mihitsy anefa tatỳ aoriana no niaina an’ilay izy tamin’izaho nosavan’ny polisy, dia avy eo nalaina am-bavany sady niakatra fitsarana. Nilamina tsara ny saiko. Tony tsara hoatr’izany koa aho rehefa tsy maintsy niresaka ny zavatra inoako teny amin’ny fitsarana. Tena tsapako hoe nanampy ahy i Jehovah, dia afaka ny ho faly aho na dia miaritra fitsapana hoatr’ireny aza. Tena misaotra an’i Jehovah aho fa nampiany sady nomeny tombontsoa miavaka hoe hanompo azy.

Vitaliy Ushakov

Teraka: 1980 (tany Khatukay, any amin’ny Repoblikan’i Adygeya)

Mombamomba azy: Mpanamboatra fiara no asany. Ny reniny no nahalalany ny fahamarinana ao amin’ny Baiboly. Ilay fampanantenan’ny Baiboly hoe mbola ho sambatra ny olombelona no tena tiany. Natao batisa tamin’ny 1995

Nanambady an’i Irina tamin’ny 2006. Roa lahy ny zanany

Resadresaka nifanaovana taminy

Inona no nanampy anao hiaritra tamin’ianao notanana am-ponja vonjimaika talohan’ny nitsarana anao?

Tamin’izaho vao notanana am-ponja vonjimaika, dia tsy nanana Baiboly aho nandritra ny iray volana sy tapany. Dia nosoratako tao anaty karine daholo izay andinin-teny tadidiko. Nosoratako tao koa ny hevitro momba ny andinin-teny tsirairay. Tena nahasoa ahy izany tamin’izaho natoka-monina satria nanampy ahy handinika ny tany am-poko. Vao mainka aho izao akaiky an’i Jehovah. Lasa vonona kokoa hanaraka ny tari-dalany aho ato am-poko.

Valeriy Vechkayev

Teraka: 1973 (tany Vyselki, any amin’ny Faritr’i Krasnodar)

Mombamomba azy: Rehefa misy trano aorina, dia mamita an’izay pitsipitsiny faramparany ao anatiny no asany. Nahavariana azy ny nahita hoe tsy misy tsara noho ny fitsipiky ny Baiboly. Hitany koa hoe miavaka ny Vavolombelon’i Jehovah satria tena mankatò an’ireny fitsipika ireny. Natao batisa tamin’ny 1999

Nanambady an’i Irina tamin’ny 1996. Roa lahy sy vavy iray ny zanany

Resadresaka nifanaovana taminy

Ahoana no anampian’i Jehovah anao hahazaka an’izao fitsapana iaretanao izao?

Mahita fomba be dia be anampiana ahy i Jehovah. Mivavaka ho an’ahy, ohatra, ny mpiara-manompo, dia manome an’izay zavatra ilaiko. Ampaherezin-dry zareo koa aho. Nahariharin’i Jehovah koa hoe efa kely sisa dia ho tonga ilay tontolo vaovao nampanantenainy. Marina izany satria efa be dia be ny faminanian’ny Baiboly tanteraka. Nisy vokany tamiko izany satria lasa nataoko ao an-tsaina hoe hoatran’ny rahona ny fitsapana iaretako. Ngezabe ny sasany, dia ny sasany kely. Tsy mitovy daholo koa ilay izy. Tsy maintsy hihena tsikelikely anefa ireny, dia tsy hisy intsony amin’ny farany. Misaotra an’i Jehovah aho hoe omeny hery hiaretana foana mandra-pahatongan’izany.

Matoky isika hoe hataon’i Jehovah foana izay hahatonga an’ireo rahalahy ireo ho faly sy hatanja-tsaina. Dia tsy ry zareo ihany fa izay olon-kafa rehetra miantehitra amin’i Jehovah.—Salamo 141:8.

Zava-nitranga

11 Febroary 2022

Nampangaina ho nanao heloka bevava i Yevgeniy, Aleksey, Vitaliy, ary Valeriy
13 Febroary 2022

Nosavana ny tranon-dry zareo, dia nalaina am-bavany i Yevgeniy sy Aleksey ary Vitaliy. Notanana vonjimaika tao amin’ny efitra iray i Vitaliy
15 Febroary 2022

Notanana am-ponja vonjimaika i Vitaliy
16 Febroary 2022

Tsy nahazo nanao dia lavitra i Yevgeniy sy Aleksey
18 Febroary 2022

Tsy nahazo nanao dia lavitra i Valeriy
21 Febroary 2022

Nampangaina hoe nanao heloka bevava i Vladimir
15 Martsa 2022

Tsy nahazo nanao dia lavitra i Vladimir. Natambatra ho lasa iray ny heloka niampangana azy sy ireo rahalahy hafa
8 Septambra 2022

Tsy notanana am-ponja intsony i Vitaliy saingy nambenana tao an-tranony
10 Oktobra 2022

Tsy nambenana tao an-tranony intsony i Vitaliy saingy tsy nahazo nanao dia lavitra
31 Mey 2023

Nanomboka ny fitsarana an-dry zareo

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO