GURAANDHALA 13, 2024
RAASHIYAA

Mirga Yihowaa Tajaajiluuf Qabanirratti Xiyyeeffataniiru

BANI

Manni Murtii Koonyaa Vaayiselkooviskii Naannoo Kiraasnoodaar dhimma obboloota keenya Yeevgenii Boochikoo, Vilaadimiir Koolesniikoov, Aleeksii Shuubniikoov, Vitaalii Uushookoovii fi Vaalarii Viichikooyeev irratti murtii dabarsa jedhamee eegama. Abbaan alangaa murtoo akkamii akka isaanirratti dabarsu ammayyuu hin beeksisne.

Ibsa Gabaabaa

Yeevgenii Boochikoo

Bara Dhalootaa: 1975 (Noovooberezooniskii, Naannoo Kiraasnoodaar)

Seenaa Jireenyaa: Injiinara suphaa taʼee hojjeteera

Waaqayyo amantii dhugaa beekuuf akka isa gargaaru kadhate. Bara 1998tti cuuphamee Dhugaa Baatuu Yihowaa taʼe

Bara 2009tti Aanaa wajjin gaaʼela godhate

Dhukkuba kutaalee qaamaa laamshessu qaba

Yaada Dhuunfaa

Qorannoo yakkaa yommuu sirratti geggeeffamuu fi mana murtiitti yommuu dhihaattu maal irratti xiyyeeffatte?

Haala kana keessatti anii fi haati manaa koo maqaa Yihowaatiif ulfina fiduu akka dandeenyu kadhanna turre. Kana gochuufis carraa arganneerra. Namoota qorannaa nu irratti geggeessan keessaa tokko yeroo himata yakkaa jildii hedduudhaan qopheeffame ilaalutti, Dhugaa Baatota Yihowaa ilaalchisee gaaffiiwwan hedduu na gaafate. Jildii himata yakkaa qabatee fi tokkoon isaa fuula 100 hanga 350 qabutu jira ture. Tokkon tokkoon fuulaa irratti maqaan Yihowaa ibsameera. Maqaan isaa akka beekamu gochuu irratti qooda qabaachuu koo akka mirga guddaattan lakkaaʼa.

Vilaadimiir Koolesniikoov

Bara Dhalootaa: 1946 (Yuukreen)

Seenaa Jireenyaa: Loltuu soorama baʼedha. Yeroo booda, industirii albuuda baasu keessa hojjeteera

Bara 1979tti Ziinaʼiidaa wajjin gaaʼela godhate. Ijoollee durbaa lamaa fi ilma tokko godhataniiru. Ziinaʼiidaan bara 2020tti duʼaan boqotte

Waliin taʼanii Dhugaa Baatota Yihowaa wajjin Kitaaba Qulqulluu qoʼatan. Lamaanuu bara 1995tti cuuphaman

Yaada Dhuunfaa

Qorumsi si irra gaʼus gammachuu kee eegdee akka itti fuftu wanti si gargaare maalidha?

Rakkoowwan na irra gaʼan hedduu dandamachuun yeroo hunda salphaa hin turre. Yeroo tokko tokko abdii kanan kutadhu taʼus, miirawwan akkasii akkamitti dandamachuu akkan qabu baradheera. Nan kadhadha, akkasumas barreeffamoota Kitaaba Qulqulluu irratti hundaaʼanii fi of harkaa qabuttin fayyadama. Dinqisiifannaan Dubbii Waaqayyootiif qabu dabaleera, akkasumas yaaddoo koo hunda kadhannaadhaan Yihowaatti himachuun hangam barbaachisaa akka taʼe hubadheera. Duubatti deebiʼee yommuun yaadu, kanaan dura wantoota tokko tokkoof ofuma kootiin furmaata kennuuf yaalaa akkan ture hubadheera. Amma miira koo, yaaddoo fi gammachuu koo Yihowaatti himachuun koo, gammachuu fi nagaa naaf argamsiiseera.

Aleeksii Shuubniikoov

Bara Dhalootaa: 1982 (Nizyiniivaartoviskii, Naannoo Tiyumee)

Seenaa Jireenyaa: Umurii isaa waggaa 16tti lafee dugugguruu isaa irra miidhaa cimaan erga gaʼee booda wiilcheriidhaan deema. Ibsa amansiisaa Kitaabni Qulqulluun waaʼee dhiphinaa kennu baayʼee isa ajaaʼiba

Bara 2008tti cuuphame

Yaada Dhuunfaa

Himata yakkaa si irratti dhihaateen kan kaʼe maal baratteetta?

Muuxannoo obbolootaa fi obboleettotaa yeroo mana murtiitti dhihaatan nagaan akka isaanitti dhagaʼame dubbatanii ibsu yommuun dubbisu, ‘Kun akkamitti taʼuu dandaʼa?’ jedheen gaafadha ture. Garuu yeroon sakattaʼamuu fi qoratamu, yeroon mana murtiitti dhiheeffamuu fi dhugaa baʼu nagaatu natti dhagaʼama ture. Kun Yihowaan na gargaaraa akka jiruu fi qorumsawwan akkasii keessa utuma jiranii gammachuu argachuun akka dandaʼamu naaf mirkaneesseera. Yihowaan deggersa waan naa godhee fi mirga isa tajaajiluu waan naa kenneef guddaan isa galateeffadha.

Vitaalii Uushookoov

Bara Dhalootaa: 1980 (Hootuukii, Riippabliika Adjeeyaa)

Seenaa Jireenyaa: Makaanikii konkolaataa taʼee hojjeteera. Dhugaa kan barate haadha isaa irraati. Keessumaa abdii gara fuulduraa gammachiisaa Kitaaba Qulqulluu keessatti ibsame baayʼee dinqisiifata. Bara 1995tti cuuphame

Bara 2006tti Iriinaa wajjin gaaʼela godhate. Ilmaan lama qabu

Yaada Dhuunfaa

Gidduu gala tursiisa dhaddacha duraa keessatti jabaattee akka dhaabbatu wanti si gargaare maalidha?

Gidduu gala tursiisa dhaddacha duraa keessa gara jiʼa tokkoof walakkaaf yeroon turetti Kitaaba Qulqulluu hin qabun ture. Kanaafuu, caqasootan yaadadhuu fi hiika isaanii yaadannoo irratti barreessuun jalqabe. Kun keessumaa yeroon kophaa koo hidhamee turetti baayʼee na gargaareera. Akkas gochuun koo miira koo qoruuf na gargaareera. Amma caalaatti Yihowaatti dhiʼaadheera, akkasumas qajeelfama Yihowaa hojiirra oolchuuf caalaatti murteesseera.

Vaalarii Viichikooyeev

Bara Dhalootaa: 1973 (Vooyselkii, Naannoo Kiraasnoodaar)

Seenaa Jireenyaa: Mana ijaaramee sadarkaa dhumaa irra jiru bareechee xumuruu irratti hojjeta. Ulaagaa naamusaa olaanaa Kitaaba Qulqulluu keessa jiruu fi Dhugaa Baatonni Yihowaa ulaagaa naamusaa kana hordofuun isaanii baayʼee isa ajaaʼiba. Bara 1999tti cuuphame

Bara 1996tti Iriinaa wajjin gaaʼela godhatan. Ilmaan lamaa fi intala tokko qabu

Yaada Dhuunfaa

Yihowaan qorumsa sirra gaʼe akka dandamattu kan si gargaare akkamitti?

Yihowaan karaa hedduudhaan nama gargaara. Obboloonnii fi obboleettonni koo naaf kadhatu, wanta karaa qaamaa na barbaachisu naaf kennu, akkasumas na jajjabeessu. Yihowaan raajiiwwan Kitaaba Qulqulluu raawwii isaanii argachaa jiranitti fayyadamee, addunyaa haaraan baayʼee dhihoo akka taʼe ifa godheera. Kunis rakkoowwan na irra gaʼaa jiran akkuma hurriitti akkan ilaalu na gargaareera. Karaa adda addaatiin dhufuu dandaʼu, garuu suutuma suuta hirʼachaa fi guutummaatti badaa deemu. Yihowaan hamma yeroo sanaatti humna dandamachuuf na gargaaru waan naa kennuuf guddaan isa galateeffadha.

Yihowaan obboloota kanaa fi obboloota yeroo hundumaa gargaarsa isaa argachuu barbaadan hundaaf, gammachuu fi jabina kennuu isaa akka itti fufu amanannaa guutuu qabna.—Faarfannaa 141:8.

Chaartii Yeroo

Guraandhala 11, 2022

Himanni yakkaa Yeevgenii, Aleeksii, Vitaalii fi Vaalarii irratti baname
Guraandhala 13, 2022

Manni isaanii ni sakattaʼame. Yeevgenii, Aleeksii fi Vitaaliirratti qorannaan ni geggeeffame. Vitaaliin yeroodhaaf gidduu gala tursiisa dhaddacha duraatti ergame
Guraandhala 15, 2022

Vitaaliin gidduu gala tursiisa dhaddacha duraatti ergame
Guraandhala 16, 2022

Yeevgenii fi Aleeksii akka hin imalle dhorkaman
Guraandhala 18, 2022

Vaalariin akka hin imalle dhorkame
Guraandhala 21, 2022

Vilaadimiir irratti himanni yakkaa ni baname
Bitootessa 15, 2022

Vilaadimiir akka hin imalle dhorkame. Himanni yakkaa hundumaa faayila tokko keessatti walitti qabame
Fulbaana 8, 2022

Vitaaliin gidduu gala tursiisa dhaddacha duraatii gadhiifamee akka manaa hin baane dhorkame
Onkoloolessa 10, 2022

Vitaaliin dhorkaan manaa akka hin baane isa irra kaaʼame kaʼee akka hin imalle dhorkame
Caamsaa 31, 2023

Himanni isaan irratti baname mana murtiitti ilaalamuu jalqabe

Kanneen Armaan Gadiis ni Jaallatta Taʼa

ODUU HAARAA

Sababii Amantii Isaaniitiin Hidhamaniiru—Raashiyaa

Dhugaa Baatonni Yihowaa Raashiyaa keessa jiran sababii amantii isaaniitiin hidhamaniiru. Seenaa isaanii dubbisi, maqaa Dhugaa Baatota Yihowaa yeroo ammaatti hidhamanii jiranii ilaali.

ODUU HAARAA