13 GASHYANTARE 2024
U BURUSIYA

Bibanze ku nshingano bafite yo gukorera Yehova

FUNGURA

Urukiko rw’akarere ka Vyselkovskiy ruherereye mu gace ka Krasnodar, vuba aha ruzatangaza umwanzuro warwo mu rubanza ruregwamo umuvandimwe Yevgeniy Bochko, Vladimir Kolesnikov, Aleksey Shubnikov, Vitaliy Ushakov na Valeriy Vechkayev. Nta gihano umushinjacyaha arabasabira.

Icyo twabavugaho

Yevgeniy Bochko

Igihe yavukiye: 1975 (Novoberezansky, mu gace Krasnodar)

Ibimuranga: Yari injeniyeri mu bijyanye no kwita ku bikoresho

Yasenze Imana ayisaba kumufasha kumenya idini ry’ukuri. Yabatijwe mu mwaka wa 1998.

Yashakanye na Anna mu mwaka wa 2009

Arwaye indwara ifata ubwonko n’uruti rw’umugongo

Ibyo yavuze

Ni ikihe kintu cy’ingenzi wakomezaga kwibandaho mu gihe cy’iperereza no mu rubanza?

Muri ibyo bihe, njye n’umugore wanjye twasenze Yehova tumusaba ko twahesha ikuzo izina rye. Kandi rwose twabonye uburyo bwo kubikora. Hari igihe umwe mu bashinzwe iperereza yarimo gusuzuma inyandiko z’urubanza rwacu maze atubaza ibibazo byinshi ku birebana n’Abahamya ba Yehova. Izo nyandiko zari 17 kandi ari nini, ku buryo buri nyandiko yari ifite amapaji ari hagati ya 100 na 350. Hafi ya buri paji hagaragaragaho izina rya Yehova. Rwose twishimiye kuba twaragize uruhare mu gutuma iryo zina rimenyekana.

Vladimir Kolesnikov

Igihe yavukiye: 1946 (Muri Ukraine)

Ibimuranga: Yahoze ari umusirikare. Nyuma yaho, yakoze mu bijyanye no gucukura amabuye y’agaciro

Yashakanye na Zinaida mu mwaka wa 1979. Bafite abakobwa babiri n’umuhungu umwe. Zinaida yapfuye mu mwaka wa 2020

We n’umugore we bigiye Bibiliya hamwe n’Abahamya ba Yehova. Babatijwe mu mwaka wa 1995

Ibyo yavuze

Ni iki cyagufashije gukomeza kurangwa n’icyizere nubwo wahuye n’ibigeragezo?

Buri gihe ntibiba byoroshye guhangana n’ibibazo byinshi nk’ibyo mpura na byo. Nubwo rimwe na rimwe njya numva nacitse intege, namenye icyo nakora ngo mpangane n’ibyo bitekerezo. Ndasenga kandi ngakoresha ibitabo by’imfashanyigisho za Bibiliya mfite. Narushijeho gukunda Ijambo ry’Imana kandi ndushaho gusobanukirwa ukuntu ari iby’ingenzi gusenga Yehova, mubwira ibintu byose bimpangayikishije. Nashubije amaso inyuma, mbona ko mu bihe byahise najyaga nshaka kwikemurira ibibazo ku giti cyanjye. Ariko ubu, kubwira Yehova uko niyumva, ibimpangayikishije n’ibinshimishije bituma numva nyuzwe kandi ntuje.

Aleksey Shubnikov

Igihe yavukiye: 1982 (Nizhnevartovsk, mu ntara ya Tyumen)

Ibimuranga: Agendera mu igare ry’abafite ubumuga, kubera ko igihe yari afite imyaka 16 yakoze impanuka ituma amugara. Yashimishijwe n’ukuntu Bibiliya itanga ibisobanuro byumvikana neza ku birebana n’imibibabaro duhura na yo

Yabatijwe mu mwaka wa 2008

Ibyo yavuze

Kuba ukurikiranwa mu nkiko ni iki byakwigishije?

Iyo nabaga nsoma inkuru z’ibyabaye ku bavandimwe na bashiki bacu, maze nkumva bavuga ko iyo babaga bari mu rukiko babaga bafite amahoro, numvaga ibyo bidashoboka. Ariko igihe bazaga kudusaka, bakanjyana kumpata ibibazo kandi nkajya mu rukiko ngiye gutanga ubuhamya, numvise nanjye ntuje. Ibyo byanyeretse ko Yehova yamfashaga kandi rwose birashoboka kunyura mu bigeragezo, ukabivamo ufite ibyishimo. Nshimira Yehova cyane kuba yaramfashije kandi akemera ko mukorera.

Vitaliy Ushakov

Igihe yavukiye: 1980 (Khatukay, muri Repubulika ya Adygeya)

Ibimuranga: Yari umukanishi. Mama we ni we watumye amenya ukuri. By’umwihariko yashimishijwe n’isezerano Bibiliya itanga ku birebana n’igihe kizaza gishimishije. Yabatijwe mu mwaka wa 1995

Yashakanye na Irina mu mwaka wa 2006. Bafite abahungu babiri

Ibyo yavuze

Ni iki cyagufashije kwihangana igihe wari ufunzwe by’agateganyo?

Ngifungwa namaze ukwezi n’igice nta Bibiliya mfite. Ubwo rero nafashe ikaye, nandika imirongo yose nashoboraga kwibuka maze nandika n’icyo ntekereza kuri buri murongo. Ibyo byaramfashije cyane cyane igihe nabaga ndi muri kasho ya jyenyine, kuko byatumye mbasha gutegeka ibyiyumvo byanjye. Ubu narushijeho kuba incuti ya Yehova kurusha mbere hose kandi numva nari yemeje kurushaho gukurikiza ubuyobozi atanga.

Valeriy Vechkayev

Igihe yavukiye: 1973 (Vyselki, mu gace ka Krasnodar)

Ibimuranga: Akora mu bijyanye no gutunganya imbere mu mazu. Yashishikajwe n’amahame yo muri Bibiliya agenga imyitwarire n’ukuntu Abahamya ba Yehova bayakurikiza mu mibereho yabo. Yabatijwe mu mwaka wa 1999

Yashakanye na Irina mu mwaka wa 1996. Bafite abana babiri b’abahungu n’umukobwa umwe

Ibyo yavuze

Ni mu buhe buryo Yehova yagufashije kwihangana muri ibi bihe?

Yehova amfasha mu buryo butandukanye. Abavandimwe na bashiki bacu banzirikana mu masengesho yabo, bakampa ibyo nkeneye kandi bakanampumuriza. Nanone binyuriye mu buhanuzi bwo muri Bibiliya bugenda busohora, Yehova atwereka rwose ko isi nshya iri bugufi cyane. Ibyo bituma mbona ko ibigeragezo mpanganye na byo muri iki gihe, ari nk’ibicu. Ibicu byose ntibimeze kimwe kandi ntibingana, ariko ntibinahoraho kandi bigeraho bikagenda. Nshimira Yehova ko ampa imbaraga maze nkihangana.

Twizeye tudashidikanya ko Yehova azakomeza guha ibyishimo n’imbaraga aba bavandimwe hamwe n’abandi bose bakomeza kumuhungiraho.—Zaburi 141:8.

Uko ibintu byagiye bikurikirana

Ku itariki ya 11 Gashyantare 2022

Yevgeniy, Aleksey, Vitaliy na Valeriy batangiye gukurikiranwaho ibyaha
Ku itariki ya 13 Gashyantare 2022

Ingo zabo zarasatswe. Yevgeniy, Aleksey na Vitaliy bajyanywe guhatwa ibibazo. Vitaliy yafunzwe by’agateganyo
Ku itariki ya 15 Gashyantare 2022

Vitaliy bamwohereje mu kigo yagiye gufungirwamo by’agateganyo
Ku itariki ya 16 Gashyantare 2022

Yevgeniy na Aleksey bamenyeshejwe ko batemerewe kurenga agace batuyemo
Ku itariki ya 18 Gashyantare 2022

Valeriy na we yamenyeshejwe ko atemerewe kurenga agace atuyemo
Ku itariki ya 21 Gashyantare 2022

Vladimir yatangiye gukurikiranwaho ibyaha
Ku itariki ya 15 Werurwe 2022

Vladimir na we yamenyeshejwe ko atemerewe kurenga agace atuyemo. Ibirego byabo byahurijwe hamwe
Ku itariki ya 8 Nzeri 2022

Vitaliy yarafunguwe, ariko akomeza gufungishwa ijisho
Ku itariki ya 10 Ukwakira 2022

Vitaliy yavaniweho gufungishwa ijisho ariko amenyeshwa ko atemerewe kurenga agace atuyemo
Ku itariki ya 31 Gicurasi 2023

Ni bwo urubanza rwatangiye

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU