27 MARCH 2024
RUSSIA

Sakuopa Kuzunzidwa Ndipo Akusangalala Podziwa Kuti Yehova Awathandiza

YAMBANI

Posachedwapa, Khoti la m’boma la Leninskiy ku Barnaul m’chigawo cha Altai lilengeza chigamulo chake pamlandu wokhudza abale awa: Yuriy Kolotinskiy, Mikhail Reshetnikov, ndi Anatoliy Sarychev. Loya woimira boma pamlanduwu akuyembekezereka kunena chilango chimene akufuna kuti abalewa apatsidwe.

Zokhudza Abalewa

Yuriy Kolotinskiy

Chaka chobadwa: 1955 (ku Moldova)

Mbiri yake: Ankayendetsa mashini amphamvu kwambiri pa mgodi winawake

Anakwatira Nataliya mu 1977

Ankafuna atadziwa chifukwa chimene anthu akuvutikira kwambiri. Anapeza mayankho omveka bwino ochokera m’Baibulo ataphunzira ndi a Mboni za Yehova. Yuriy ndi Nataliya anabatizidwa mu 1995

Zimene Ananena

Kodi ndi nkhani za m’Baibulo ziti zimene zakuthandizani kuzindikira kuti Yehova akukuthandizani?

Nthawi zambiri ndimaganizira nkhani ya Aisiraeli atachoka ku Iguputo. Yehova anawatsogolera ndiponso kuwateteza nthawi yonse imene anali m’chipululu. Ndimaona kuti n’zimenenso akuchitira ineyo. Nthawi iliyonse imene ndauzidwa kuti ndipite kukhoti, ndimaona kuti Yehova akunditsogolera. Ndimaona kuti akundithandiza ndipo ndimakhala wotsimikiza kuti amandikonda komanso andipatsa mphamvu kuti ndipirire komanso kuti ndikhalebe wokhulupirika kwa iye kaya ndikumane ndi zotani. Panopa chikhulupiriro changa ndi cholimba kwambiri kuposa kale ndipo ndikudziwa kuti zimene ndikuchita ndi zolondola. Choncho ndine wokonzeka kuchita zomwe ndingathe kuti nditeteze dzina la Yehova.

Mikhail Reshetnikov

Chaka chobadwa: 1949 (ku Maksiner, m’chigawo cha Kirov)

Mbiri yake: Anali dalaivala wa basi komanso thiraki kwa zaka zoposa 50

Analera mwana wamwamuna komanso wamkazi limodzi ndi mkazi wake woyamba yemwe anamwalira ndi khansa. Anakwatira Antonina mu 2021

Anali ndi mafunso okhudza Baibulo koma sanapeze mayankho kutchalitchi kwawo. Anasangalala atapeza mayankho pambuyo pophunzira ndi a Mboni za Yehova. Anabatizidwa mu 2000

Zimene Ananena

Kodi kusaopa kuzunzidwa kunakuthandizani bwanji?

Atangoyamba kumanga ndi kuika m’ndende abale ndi alongo athu, ndinayamba kupemphera kwa Yehova kuti andipatse nzeru komanso mtima wodziletsa kuti ndithe kudziwa zoyenera kuchita nanenso ndikamadzazunzidwa. Yehova wakhaladi akundithandiza ndipo nthawi zonse amayankha mapemphero anga pa nthawi yoyenera. Sindikukayikira ngakhale pang’ono kuti amakhala nane. Choncho sindikuopa chilichonse chimene akhoti anganene pa mlandu wangawu. Ndikudziwa kuti Yehova andithandiza kukhalabe wokhulupirika.

Anatoliy Sarychev

Chaka chobadwa:1949 (ku Karpovo, m’chigawo cha Altai)

Mbiri yake: Ankagwira ntchito yokonza maonekedwe a zithunzi (graphic designer) kenako anapuma pa ntchito

Anakwatirana ndi Nadezhda mu 1990. Ali ndi mwana wamwamuna mmodzi

A Mboni za Yehova anakambirana naye zokhudza Baibulo atangotuluka kuchipatala pambuyo pochitidwa opaleshoni. Anasangalala kwambiri atamva kuti Yehova adzathetsa zachiwawa komanso mavuto onse. Nadezhda anabatizidwa mu 2001 ndipo Anatoliy anabatizidwa mu 2002

Zimene Ananena

N’chiyani chikukuthandizani kuti muzikhalabe wosangalala?

Ndimaganizira mawu opezeka pa 1 Petulo 3:14 omwe amati: “Koma ngakhale mutavutika chifukwa chochita zinthu mwachilungamo, mumakhalabe osangalala. Musamaope zimene amaopa ndipo musamade nazo nkhawa.” Afarisi ankazunza atumwi chifukwa anakana kusiya kulalikira. Atumwiwa anapirira chifukwa ankaona kuti kunyozedwa chifukwa cha dzina la Yesu ndi chifukwa chokhalira osangalala. Nanenso ndikufuna kutengera chitsanzo chawo. Ndikuona kuti kuzunzidwa si chifukwa chondichititsa kuti ndifooke. M’malomwake ndimalimbikitsidwa kwambiri ndikaganizira kuti ndikutsatira mapazi a Akhristu oyambirira komanso a Yesu Khristu.

Tikuthokoza kwambiri chifukwa chokhala ndi abale omwe akusonyeza kuti ali ndi chikhulupiriro komanso amadalira kwambiri Yehova m’masiku athu ano. Sitikukayikira kuti Yehova apitiriza kuwathandiza chifukwa amakonda komanso sangawaiwale.—Salimo 25:10.

Nthawi ndi Zochitika

25 May 2021

Khoti linatsegulira mlandu Mikhail
27 May 2021

Apolisi anakafufuza kunyumba ya Mikhail. Iye ndi Antonina anafunsidwa mafunso. Mikhail analetsedwa kuyenda maulendo ena
6 October 2022

Khoti linatsegulira mlandu Anatoliy ndi Yuriy ndipo anaphatikiza milandu yawo ndi wa Mikhail
7 October 2022

Anatoliy ndi Yuriy analetsedwa kuyenda maulendo ena
19 January 2023

Milandu yawo inayamba kuzengedwa

Mwina Mungakondenso Kudziwa Izi

NKHANI

Anamangidwa Chifukwa Chotsatira Zimene Amakhulupirira ku Russia

Oimira gulu lina la zachitetezo la FSB anamanga a Dennis Christensen chifukwa chotenga nawo mbali pa msonkhano wa Mboni za Yehova womwe unkachitika mwamtendere mumzinda wa Oryol ku Russia.

NKHANI