Ena ika2 ni Maji 2024, e caka e dua na soqo ena Vale ni Soqoni e Brisbane, e Ositerelia. E sevutaka kina o Brother Hideyuki Motoi, e lewe ni Komiti ni Tabana e Australasia na ivola i Maciu ena vosa vagalu ni Ositerelia, e dau kilai tale ga me Auslan. Era tiko kina e 159 na tacida, era sema tale ga kina ena internet e le 377 mai Ositerelia, Niusiladi kei Samoa. Oti ga na kena sevutaki sa rawa ni download ena jw.org, kei na JW Library Sign Language.

E rauta ni le 20,000 era vakayagataka na vosa qori e Ositerelia, Niusiladi, Samoa, kei Toga, se na kena e via tautauvata kei na vosa qori. Ena 2001, e vakadewataki kina na imatai ni ivola ena vosa vagalu ni Ositerelia, na brochure Ni Mate e Dua na Wekamu Voleka. Ena Epereli 2023, e tauyavutaki na kena valenivolavola ni vakadewa tu yawa. Nikua, era veiqaravi tiko e voleka ni le 350 na tacida ena dua na ivavakoso vosa vagalu, kei na 18 na iwasewase lalai ena yalava e qarava na vale ni tabana.

Qo na imatai ni ivola ena iVolatabu me vakadewataki ena vosa vagalu ni Ositerelia. E kaya e dua na tacida yalewa: “Na veika e cavuta o Jisu ena nona iVunau ena Ulunivanua e yavutaki ena loloma, qori e tarai au sara ga. Niu sarava ena vosa vagalu ni Ositerelia, e vaka ga ni vosa tiko vei au o Jisu!”

E kaya e dua tale na tacida yalewa didivara ena ivavakoso vagalu e Brisbane: “Ena vukei au na ivola qo meu vakatotomuria vakavoleka na itovo i Jisu, qai gumatua ena cakacaka vakavunau. Vinaka Jiova!”

Eda marautaka na kena sevutaki na ivola i Maciu ena vosa vagalu ni Ositerelia. Eda nuidei tale ga ni na vukei ira e levu mera muria na gaunisala rabalailai e basika ena bula.​—⁠Maciu 7:​13, 14.