Sang Mayo 26, 2024, gin-release ni Brother Abdiel Worou, miembro sang Branch Committee sa West Africa, ang Bag-ong Kalibutan nga Badbad Sang Cristianong Griegong Kasulatan sa Fon nga lenguahe sa isa ka espesyal nga programa sa isa ka Assembly Hall sa Abomey, Benin. Sa kabilugan, 920 ka kauturan ang nag-attend sa programa sing face-to-face. May 6,188 man nga naka-tie in paagi sa videoconference. Ginpanagtag ang naimprinta nga mga kopya sang Cristianong Griegong Kasulatan sa mga nag-attend sa programa. Nangin available man ini dayon nga ma-download sa audio kag digital nga pormat.

Indi magnubo sa duha ka milyon ka tawo nga nagahambal sang Fon ang nagaistar sa Benin, pati ang sobra 4,000 ka kauturan nga nagaalagad sa 84 ka kongregasyon kag mga group nga nagahambal sang Fon. Pagkatapos sang release sang The Bible—The Good News According to Matthew sang 2022, amat-amat man nga nangin available sa digital nga pormat ang iban pa nga libro sang Cristianong Griegong Kasulatan.

Upod sa aton mga kauturan nga nagahambal sang Fon, nagapasalamat kita kay Jehova bangod nangin available na ang iya Pulong sang kamatuoran sa madamo nga tawo nga gusto gid magsunod sa iya maalamon nga mga laygay subong.—Juan 17:17.