Niadtong Mayo 18, 2024, ang mga pasilidad sa sangang buhatan sa Chelmsford, England, gi-dedicate panahon sa pakigpulong ni Brader Kenneth Cook, Jr., usa ka membro sa Nagamandong Lawas. Mitambong sa programa sa dedication ang 1,518 ka igsoon diha sa upat ka awditoryum sa sangang buhatan. Mitambong pod ang pipila ka membro sa Nagamandong Lawas ug ang pipila ka katabang sa ilang mga komite. Naa poy 10,085 ka igsoon nga nanambong via videoconference diha sa mga Assembly Hall ug Bible educational center sa lainlaing bahin sa Ireland ug United Kingdom. Apil sa mga nanambong ang kapig 3,000 sa mga 11,000 ka igsoon nga mitabang sa pagtukod sa sangang buhatan.

Pagkaugma, 172,834 ang nanambong sa espesyal nga espirituwal nga programa nga gi-broadcast ngadto sa 1,821 ka kongregasyon sa tibuok branch territory.

Sa semana una pa ang dedication, ang giimbitar nga mga bisita gipa-tour sa mga pasilidad sa sangang buhatan. Naay giorganisar nga interactive nga mga eksibit aron ipakita sa mga bisita ang trabaho nga ginahimo sa Bethel sa pagsuportar sa mga buluhaton sa Gingharian sa branch territory ug sa tibuok kalibotan. Pananglitan, gipakita sa Regional Video Team kon sa unsang paagi nila ginahimo ang salida nga binase sa Bibliya ug gipatan-aw pod nila sa mga bisita ang live set dihang mag-film.

Gawas pa niini nga mga aktibidad, na-enjoy sa daghang igsoon ang pipila ka educational tour sa gawas sa Bethel. Apil ani ang pagsuroy sa makasaysayanhong mga lokasyon sa siyudad sa London ug sa probinsiya sa Kent aron makakat-og dugang bahin sa kasaysayan sa Bibliya sa England.

Sa paghinumdom sa maong eksayting nga semana, si Brader Richard Cook, membro sa Branch Committee sa Britain, miingon: “Makapalipay kaayong makita ang mga igsoon gikan sa lainlaing bahin sa kalibotan nga mianhi para niining espesyal kaayo nga okasyon. Nahingangha mi kon giunsa pagtangtang ni Jehova ang mga babag aron molampos ang pag-organisar sa malipayong dedication sa sangang buhatan alang sa kahimayaan sa iyang ngalan.”

Kinasingkasing tang miduyog sa dakong kalipay sa mga igsoon sa branch territory sa Britain karon nga na-dedicate na kining nindot nga mga pasilidad ngadto sa atong Diyos, si Jehova.—Nehemias 12:43.