ME 27, 2024
IROGO MAI VEIYASA I VURAVURA
Vakatabui na Valenivolavola ni Tabana e Peritania
Ena ika18 ni Me 2024, e vakatabui kina na valenivolavola ni tabana e Chelmsford, e Igiladi. E solia na ivunau o Brother Kenneth Cook, Jr, e lewe ni iLawalawa Dauvakatulewa. Era le 1,518 na tacida era tiko ena porokaramu ena va na valenisoqo lelevu e taukena na vale ni tabana. E ratou tiko tale ga kina eso na lewe ni iLawalawa Dauvakatulewa kei ratou na dauveivuke ena Komiti. Era sema tale ga mai e le 10,085 ena sala ni veitaratara ena internet mai na Vale ni Soqoni Lelevu kei na vanua ni vuli vakalou ena veivanua e Ailadi kei Peritania. Era tiko tale ga kina e le 11,000 na tacida era veivuke ena kena taravaki na valenivolavola ni tabana, rauta ni le 3,000 mai vei ira na tacida qori era bolecakacaka.
Era vakatudaliga na tacida ni caka tiko na vunau ena Vale ni Soqoni e East Pennine e Rotherham, e Igiladi
Ena siga tarava e rauta ni le 172,834 era marautaka na porokaramu vakaivolatabu e kaburaki ena sivia na 1,821 na ivavakoso ena yalava e qarava na valenivolavola ni tabana.
Ni vo e dua na macawa, e soli na galala vei ira na sureti mai mera sarasara ena valenivolavola ni tabana. Na vanua ni sarasara qori, e vakarautaki me vukei ira na vulagi mera kila na cakacaka e vakayacori e Peceli me tokoni kina na cakacaka vakavunau kei na sala era vakayaloqaqataki kina na ivavakoso ena veiyasai vuravura. Kena ivakaraitaki, era vakaraitaka na Tabana ni Vidio na iwalewale ni kena caka na iyaloyalo vakaiVolatabu era qai sureti na vulagi mera sarava sara ga na kena katoni e dua na iyaloyalo ena gauna sara ga e vakayacori tiko kina.
iMawi: E vakarautaka tiko e dua na tacida yalewa na vakalomavinaka. iMatau: Era vakaraitaka tiko na Tabana ni Vidio na kena dau katoni na iyaloyalo ena isoqosoqo
Era vakaraica tiko na mataveitacini na volavola kilai levu ena papa qele e vakatokai me Cyrus Cylinder nira sarasara tiko ena Vale ni iyaya maroroi e Peritania e Lodoni, mai Igiladi
Era marautaka tale ga vakalevu na mataveitacini na gade ena so tale na vanua ni sarasara ena taudaku kei Peceli. Qori e okati kina na vanua ni sarasara makawa ena siti e Lodoni kei na so na vanua e Kent, mera vulica eso tale na itukutuku vakaiVolatabu makawa e Igiladi.
E kaya o Brother Richard Cook e Lewe ni Komiti ni Vale ni Tabana e Peritania, me baleta na gauna marautaki qori: “E talei dina nida raica ira na tacida nira gole vata mai e veiyasai vuravura mera mai duavata ena soqo bibi qo. Dina ni vakilai na dredre ena kena tuvanaki na soqo qo, keimami qoroya na nona tokoni keimami tiko ga o Jiova, qai lagiti tiko ga kina na yacana.”
Eda duavata kei ira na tacida ena Valenivolavola ni Tabana e Peritania nida ‘marau vakalevu’ ni sa mai vakatabui na vale totoka qo vua na noda Kalou, o Jiova.—Niemaia 12:43.
Rawa ni o Wilika Tale ga
TARATARAVAKI
iTaba mai Peritania iWasewase 9 (Seviteba 2019 ina Feperueri 2020)
Wilika na kena taravaki, kei na nodra tekivu vakayagataka na lewenivuvale e Peceli na nodra itikotiko vou.
