Sang Mayo 18, 2024, ang mga branch facility sa Chelmsford, England, gindedikar paagi sa isa ka pamulongpulong nga ginhatag ni Brother Kenneth Cook, Jr., nga miembro sang Nagadumala nga Hubon. May kabilugan nga 1,518 ka kauturan ang nag-attend sa sining dedication program sa apat ka auditorium sa propiedad sang branch. Ara man ang pila ka miembro sang Nagadumala nga Hubon kag mga helper sa ila mga committee. May ara man 10,085 nga nag-tie in sa programa paagi sa videoconference sa mga Assembly Hall kag sa mga Bible educational center sa sarisari nga mga lugar sa Ireland kag sa United Kingdom. Lakip sa mga nag-attend ang sobra 3,000 sa mga 11,000 ka kauturan nga nagbulig sa konstruksion sini nga branch.

Pagkasunod nga adlaw, may kabilugan nga 172,834 ang nag-enjoy sa espesyal nga programa nga gin-broadcast sa 1,821 ka kongregasyon sa bilog nga teritoryo nga sakop sang branch.

Sa mga semana antes sang dedication, ang mga bisita nga gin-imbitahan ginhatagan sang tsansa nga maka-tour sa mga pasilidad sang branch. May ginhimo nga interactive nga mga exhibit para mabal-an sang mga bisita kon ano ang ginahimo sa Bethel para suportahan ang pagbantala nga hilikuton kag pabakuron ang mga kongregasyon sa teritoryo nga sakop sang branch kag sa bilog nga kalibutan. Halimbawa, ginpakita sang Regional Video Team ang kada process sa paghanda sang base sa Biblia nga mga video kag gin-agda ang mga bisita nga magtan-aw sa isa ka live nga pag-shooting.

Dugang pa sa sini nga mga activity, madamo nga kauturan ang nag-enjoy sa pila ka educational tour sa gua sang Bethel. Nalakip sa sini ang pagkadto sa historic nga mga lugar sa siudad sang London kag sa banwa sang Kent para magtuon sing dugang parte sa kasaysayan sang Biblia sa England.

Parte sa exciting nga mga natabo sa bilog nga semana, si Brother Richard Cook, miembro sang Branch Committee sa Britain, nagsiling: “Kanami gid makita sang paghiusa sang mga kauturan halin sa bilog nga kalibutan sa sining espesyal nga okasyon. Nagdayaw gid kami kon paano kami ginbuligan ni Jehova nga malampuwasan ang mga kabudlayan samtang ginaorganisar ining makalilipay nga pagdedikar sa branch para maghatag sang kadayawan sa iya ngalan.”

‘Nagakalipay gid’ kita upod sa aton mga kauturan sa mga teritoryo nga sakop sang branch sa Britain kay ining matahom nga mga branch facility nadedikar na subong sa aton Dios, nga si Jehova.—Nehemias 12:43.