I te 18 no Me 2024, ua avarihia te mau paturaa apî o te Betela i Chelmsford i Beretane. Na taeae Kenneth Cook, mero o te Tino aratai, i vauvau i te oreroraa parau avariraa. Ua putuputu 1 518 taeae e tuahine i roto e maha vahi rururaa i te mau paturaa o te Betela no te porotarama avariraa. Ua tae atoa e rave rahi mero o te Tino aratai, oia atoa te mau tauturu o ta ratou mau tomite. Hau atu, ua apiti 10 085 taata i te porotarama na roto i te ravea roro uira i roto i te mau Piha tairururaa e te mau pû haapiiraa bibilia i Irelane e i te Hau amui no Beretane. I rotopu i te 11 000 taeae e tuahine tei apiti i te paturaa o te Betela, hau atu 3 000 taata tei putuputu mai i te mau vahi tairururaa no te fanaˈo i te porotarama.

Te mahana i muri iho, ua fanaˈo 172 834 taeae e tuahine i te hoê porotarama taa ê tei niuhia i nia i te Bibilia. Ua haapurorohia te reira i 1 821 amuiraa i te tuhaa fenua o te Betela.

Hoê hebedoma hou a tupu ai te avariraa, ua nehenehe te mau taeae e tuahine tei titau-manihini-hia e mataitai i te mau paturaa o te Betela. Ua faanahohia te mau faaiteiteraa no te faataa i te mau taeae e tuahine eaha te ohipa e ravehia ra i te Betela, no te turu i te pororaa e no te faaitoito i te mau amuiraa i te tuhaa fenua o te Betela e na te ao atoa nei. Ei hiˈoraa, ua faataa te pǔpǔ e haapao ra i te tuhaa video eaha te titauhia no te faaineine i te hoê video niuhia i nia i te Bibilia. Ua titau manihini atoa ratou i te mau taeae e tuahine ia mataitai i te haruharuraa o te hoê video.

Hau atu â, ua fanaˈo e rave rahi taeae e tuahine i te tahi atu mau tere mataitairaa i rapaeau i te Betela. Ei hiˈoraa, ua tere ratou na te oire Lonedona no te mataitai i te mau vahi tuiroo o tera oire. Ua haere atoa ratou i te tuhaa fenua o Kent no te haapii atu â no nia i te aamu o te Bibilia i Beretane.

A feruri ai i te mau tupuraa faahiahia tei faanahohia i te roaraa o te hebedoma, ua na ô taeae Richard Cook, mero o te Tomite amaa o te Betela no Beretane: “Mea faahiahia ia ite e ua tae mai te mau taeae e tuahine na te ao atoa nei no tera tupuraa taa ê roa. I te roaraa o te faaineineraa o tera tupuraa taa ê, auê i te oaoa ia ite nafea Iehova i faaore ai i te mau fifi atoa. Maoti ta ˈna tauturu, ua nehenehe matou e faanaho i te avariraa o te mau paturaa apî o te Betela ma te faahanahana i to ˈna iˈoa.”

Mai te mau taeae e tuahine no Beretane, ‘oaoa rahi’ atoa matou no tera mau paturaa apî nehenehe mau o tei pûpûhia na to tatou Atua ra o Iehova.—Nehemia 12:43.