Më 9 dhjetor 2016 Komisioni Kombëtar për të Drejtat e Njeriut i Koresë së Jugut (Komisioni) paraqiti opinionin e tij për ankesat që po shqyrton Gjykata Kushtetuese. Ai analizonte të drejtën për të refuzuar shërbimin ushtarak për arsye ndërgjegjeje. Duke arsyetuar mbi standardet e fundit për të drejtat e njeriut, Komisioni arriti në përfundimin se kjo është një e drejtë themelore që nuk mund të kufizohet dhe që qeveria duhet ta mbrojë.

Është domethënëse që Komisioni vendosi se kjo e drejtë themelore e njeriut është «arsye e vlefshme» për të mos bërë ushtrinë. Komisioni i bëri thirrje qeverisë që nëpërmjet miratimit të «një shërbimi civil alternativ të dobishëm për shoqërinë» të shmangë përplasjen midis standardeve të kushtetutës për lirinë e ndërgjegjes dhe detyrimit të shërbimit ushtarak.

Sipas Komisionit është komplet e kotë t’i burgosësh ata që nuk kryejnë ushtrinë për shkak të ndërgjegjes. Në opinionin që paraqiti, thuhej: «Qëllimi i ndëshkimit është të ndalojë ose të parandalojë krimet. Por, shumica e atyre që nuk kryejnë ushtrinë për arsye ndërgjegjeje nuk pendohen dhe s’heqin dorë nga vendimi nga frika se mos ndëshkohen. . . . Ja pse ndëshkimi është i kotë.»

Komisioni ripërsëriti vendimin e 26 dhjetorit 2005 se Republika e Koresë duhet të sigurojë një shërbim alternativ që të mos ketë përplasje midis të drejtës për të refuzuar në bazë të ndërgjegjes dhe detyrimit për të mbrojtur kombin. * Në përputhje me detyrimin e tij për të mbështetur të drejtat e njeriut, Komisioni ia paraqiti këtë opinion Gjykatës Kushtetuese që ta shqyrtojë para se të marrë vendimin.

Duke komentuar mbi vendimin e Komisionit, profesori i juridikut Jae-seung Lee, pohoi: «Nëse qeveria e Koresë së Jugut vendos ta respektojë ‘të drejtën universale të njeriut’ për të refuzuar ushtrinë për arsye ndërgjegjeje, atëherë mund të aplikojë shërbimin civil alternativ. Po e bëri këtë, i sugjeroj të shqyrtojë me kujdes standardet ndërkombëtare për shërbimin civil alternativ që ky program të dalë sa më i suksesshëm.»

Dae-il Hong, zëdhënës i Dëshmitarëve të Jehovait në Korenë e Jugut, tha: «Që nga gushti 2012, kur Gjykata Kushtetuese e shqyrtoi sërish këtë çështje, janë burgosur më se 2.000 të rinj Dëshmitarë të Jehovait. Mezi presim që Gjykata Kushtetuese të marrë një vendim në përputhje me standardet ndërkombëtare që respektojnë jetën dhe paqen. Shpresojmë që burgosjet të marrin fund dhe të rinjtë Dëshmitarë të mund t’i shërbejnë komunitetit pa shkelur ndërgjegjen.»