Era rarawataka na iVakadinadina i Jiova e Rusia ni vakatabuya na Mataveilewai Cecere nodra sokalou. Na lewa e tauca o Turaganilewa Yuriy Ivaneko ena ika20 ni Epereli, e vakatabui kina nodra cakacaka na isoqosoqo vakalawa kece ni iVakadinadina i Jiova e Rusia. Ia e tiko ena mataveilewai qori na tabana e dau dikeva na vakatulewa sa tau oti. Eratou na rogoca tale na nodra kerekere na iVakadinadina i Jiova e tolu na turaganilewa ena ika17 ni Julai, 2017.

Era kerea na iVakadinadina i Jiova me veisautaki na lewa kece sa tau oti. Era kaya ni lasu na ivakadinadina, era sega tale ga ni dau vakavuna na tikoyavavala. E vakabibitaki tale ga ena kerekere qo ni tautauvata na ka era beitaki kina ena gauna qo kei na kena era vakayagataka na vakailesilesi ni matanitu mera vakacacani kina na iVakadinadina i Jiova ena Matanitu Cokovata makawa kei Rusia. Toso na gauna, era vakadonui tale, e vakalasui tale ga ena ka era beitaki kina. Kena ikuri, e vakabibitaki ena kerekere qo ni lewa sa tau e beci kina na galala ni sokalou e vakamatatataki tu ena lawa ni vanua o Rusia kei na veidinadinati ena veimatanitu.

E veivakaleqai na lewa sa tau oti, nira vakacacani na iVakadinadina i Jiova me vaka ena veiliutaki vaKominisi. Era beitaki ira na iVakadinadina i Jiova na vakailesilesi ni matanitu ni vakavuna na tikoyavavala nodra cakacaka, levu era vakatalai mai vanua ni cakacaka, era vakamadualaki ira na gone na qasenivuli e matadra na vo ni gone, era vakacacana na Vale ni Soqoni o ira na veitovaki, era vakama tale ga na nodrau vale e rua na iVakadinadina i Jiova.

Era nuitaka na iVakadinadina i Jiova e veiyasa i vuravura ni na dikeva tale na Mataveilewai Cecere e Rusia na lewa sa tau oti qai veisautaka mera taqomaki kina na iVakadinadina i Jiova e kea kei na galala ni nodra sokalou.