Muʼ bʌ i yʌl jiñi Biblia

¿Chuqui miʼ yʌl jiñi Biblia chaʼan jiñi alas tac muʼ bʌ i yʌcʼ ti wocol laj cuxtʌlel?

«ILI ORA YONLEL LAC PIʼɅLOB MACH COJACH MIʼ QʼUELOB TAC ALAS MUʼ BɅ I YɅCʼOB TI WOCOL I CUXTɅLEL, MUQʼUIX I MELOB JAʼEL. CHEʼ BAJCHEʼ JIÑI MUʼ BɅ I CHOCOB JUBEL I BɅ TI PARACAÍDAS, MUʼ BɅ I CʼɅJQUELOB MAJLEL TI WITS BAQUI WEN WOCOL TAC, O MUʼ BɅ I ÑUMELOB TI JAʼ TI JUMPʼEJL ALɅ LANCHA BAQUI WEN PʼɅTɅL I CABɅL XAJLEL YICʼOT AN MUʼ BɅ I CHAʼLEÑOB ÑUXIJEL BAQUI AN CABɅL TIBURÓN». (ILI JIÑɅCH TSAʼ BɅ I YɅLɅ JIÑI PERIÓDICO THE WILLOW GLEN RESIDENT).

MUʼ bʌ i yʌl ili periódico, miʼ yʌqʼueñonla laj qʼuel chaʼan ñumen añix lac piʼʌlob muʼ bʌ i melob bajcheʼ jiñi. Jiñi alas tac muʼ bʌ i yʌcʼob ti wocol i cuxtʌlel muqʼuix i wen mejlel ili ora. Cheʼ jaʼel, cabʌl alas miʼ mejlel baqui an cabʌl hielo i miʼ cʼʌñob tac muʼ bʌ i yʌcʼob ti wocol i cuxtʌlel, an yambʌ alas muʼ bʌ i cʼʌñob bicicleta tac chaʼan miʼ cʼʌjquelob majlel ti jiñi wits baqui wen wocol tac. An tac yambʌ alas bʌbʌqʼuen bʌ, pero añʌch muʼ bʌ i melob. Muʼ bʌ i yʌl jiñi revista Time, jiñʌch chaʼan jiñi alas tac muʼ bʌ i yʌcʼ ti wocol i cuxtʌlel lac piʼʌlob cabʌlix muʼ bʌ i mulañob i mel come miʼ ñaʼtañob chaʼan miʼ poj sʌtob i bʌqʼuen i miʼ yʌqʼueñob i tijicñʌyel.

Tiʼ caj jiñi alas tac cabʌl lac piʼʌlob an i tajayob wocol. Ti jujumpʼejl qʼuin yonlel miʼ lowob i bʌ tiʼ caj chaʼan bajcheʼ miʼ chaʼleñob alas tac. Ti 1997, ti jiñi hospital tac yaʼ ti Estados Unidos miʼ wen cʼotelob muʼ bʌ i lowob i bʌ. Jiñi 33% tiʼ caj miʼ cʼʌñob jiñi patineta, i jiñi 31% ti caj miʼ chaʼleñob alas baqui an cabʌl hielo i jiñi 20% tiʼ caj miʼ cʼʌjquelob ti wits tac baqui wen wocol tac. Añʌch chuqui ñumen tsʌts bʌ ujtem tiʼ caj jiñi alas tac come an am bʌ i sʌtʌyob i cuxtʌlel. Muʼ bʌ i chaʼleñob tac jiñi alas tac yujilob chaʼan miʼ mejlel i sʌtob i cuxtʌlel. Juntiquil xʼixic muʼ bʌ ti alas baqui an cabʌl hielo tsiʼ yʌlʌ: «Cujil chaʼan iliyi miʼ mejlel i tsʌnsañon». I yambʌ wen yujilʌch bʌ alas ti hielo jaʼel tsiʼ yʌlʌ: «Mi maʼan mi lac low lac bʌ, yom i yʌl chaʼan maʼañic woli lac chaʼlen wersa».

Chaʼan jiñi tsaʼix bʌ laj qʼuele, jiñi xñoptʼañonbʌla, ¿bajcheʼ yilal yom mi laj qʼuel jiñi alas tac cheʼ bʌ bajcheʼ jiñi? ¿Bajcheʼ miʼ coltañonla jiñi Biblia chaʼan mi laj cʌn mi yomʌch mi la cotsan lac bʌ ti jiñi alas tac? Chaʼan mi lac tajben i jacʼbal ili cʼajtiya tac, laʼ laj qʼuel bajcheʼ yilal miʼ qʼuel Dios jiñi laj cuxtʌlel.

¿Bajcheʼ yilal miʼ qʼuel Dios jiñi cuxtʌlel?

Jiñi Biblia miʼ cʌntesañonla chaʼan Jehová jiñʌch baqui tilem laj cuxtʌlel (Salmo 36:9). Jehová mach cojach tsiʼ meleyonla tsiʼ yʌqʼueyonla jaʼel chuqui i cʼʌjñibal bʌ lac chaʼan chaʼan mi lac ñusan lac bʌ (Salmo 139:14; Hechos 14:16, 17; 17:24-28). Jin chaʼan, Jehová yom chaʼan mi laj cʌntan jiñi lac majtan tsaʼ bʌ i yʌqʼueyonla, jiñi laj cuxtʌlel. Jiñi mandar yicʼot jiñi principio tac tsaʼ bʌ i yʌqʼue jiñi tejclum Israel miʼ pʌsbeñonla bajcheʼ yilal miʼ qʼuel Dios jiñi laj cuxtʌlel.

Jiñi mandar tsaʼ bʌ aqʼuenti Moisés miʼ yʌl chaʼan jujuntiquil an tiʼ wenta miʼ cʌntan jiñi i piʼʌlob. Mi maʼañic miʼ jacʼ i mi an majqui miʼ sʌt i cuxtʌlel jin miʼ yʌqʼuentel tiʼ mul miʼ tsaʼ chʌmi jiñi i piʼʌl come maʼañic tsiʼ jacʼʌ jiñi mandar tsaʼ bʌ subenti. Jumpʼejl ejemplo, jiñi i yum otot yom miʼ joy mʌc jiñi i yotot yaʼ ti chan chaʼan maʼañic majqui miʼ yajlel, mi mach cheʼic miʼ mel, miʼ yʌqʼuentel tiʼ mul mi an majqui tsaʼ yajli i miʼ chʌmel (Deuteronomio 22:8). Mi juncojt wacax miʼ jatsʼ o miʼ tsʌnsan juntiquil lac piʼʌl, maʼañic i mul jiñi i yum mi mach yujilic mi jontol. Pero miʼ jiñi i yum yujilʌch chaʼan jontol i tsaʼʌch subenti pero maʼan chuqui tsiʼ mele, tajol miʼ tsʌnsʌntel jaʼel come yujilʌch chaʼan jontol (Éxodo 21:28, 29). Jiñi mandar tsaʼ bʌ i yʌcʼʌ Jehová tsiquilʌch chaʼan miʼ qʼuel ti ñuc jiñi cuxtʌlel.

Jiñi xucʼul bʌ i wiñicob Jehová yujilobʌch chaʼan jiñi principio tac mucʼʌch i coltañob jaʼel chaʼan mach yomic miʼ yʌcʼob ti wocol i cuxtʌlel yicʼot i cuxtʌlel yambʌlob. Jumpʼejl relato am bʌ yaʼ ti Biblia miʼ yʌl chaʼan David yom i jap jiñi jaʼ am bʌ ti jiñi pozo yaʼ ti Belén, tejclum am bʌ tiʼ wenta jiñi filisteojob. Cheʼ bʌ jiñi uxtiquil i wiñicob tsiʼ yubiyob chaʼan yom i jap jiñi jaʼ, tsaʼ ochiyob majlel baqui jijlemob jiñi filisteojob chaʼan miʼ chʼʌmob tilel jiñi jaʼ i mi yʌqʼueñob i jap David. ¿Chuqui tsiʼ mele David? Maʼañic tsiʼ japʌ, tsiʼ beqʼue, i tsiʼ yʌlʌ: «Mach mejlic c jap ili jaʼ. ¿Muʼ ba mejlel c japbeñob i chʼichʼel jini winicob tsajniyoʼ bʌ baʼ bʌbʌqʼuen miʼ chʌmelob?» (1 Crónicas 11:17-19). David maʼañic miʼ ñumel tiʼ pensar chaʼan miʼ yʌcʼ ti wocol i wiñicob tiʼ cajach chaʼan chuqui yom.

Cheʼ bajcheʼ tsiʼ mele David, cheʼʌch tsiʼ mele Jesús jaʼel, cheʼ bʌ jiñi Diablo tiʼ sube chaʼan miʼ choc jubel i bʌ yaʼ ti templo chaʼan miʼ qʼuel mi mucʼʌch caj i chujquel ti jiñi ángelob, Jesús tsiʼ jacʼbe jiñi Diablo: «Mach a qʼuelben i pusicʼal jiñi a Dios Jehová» (Mateo 4:5-7). David yicʼot Jesús tsaʼ cʼoti i cʌñob chaʼan Dios mach weñic miʼ qʼuel cheʼ bʌ miʼ yʌlol ajqʼuel ti wocol jiñi cuxtʌlel.

Cheʼ bajcheʼ jiñi ejemplo tac tsaʼix bʌ laj qʼuele, miʼ mejlel laj cʼajtiben lac bʌ: «¿Bajcheʼ miʼ mejlel j cʌn chaʼan jiñi alas mucʼʌch i mejlel i yʌcʼon ti wocol? An alas mach bʌ bʌbʌqʼuentic, pero jiñi lac piʼʌlob miʼ ñumelob ti pʼis bajcheʼ miʼ chaʼleñob alas, ¿bajcheʼ yom mi lac ñaʼtan joñonla chaʼan maʼañic mi lac ñumel ti pʼis?».

¿Yom ba mi la cʌcʼ lac bʌ ti wocol?

Chaʼan mi lac ñaʼtan i jacʼbal ili cʼajtiya, ñucʌch i cʼʌjñibal cheʼ mi lac wen qʼuel bajcheʼ yilal bʌ alas mi laj cajel. Jumpʼejl ejemplo, miʼ mejlel laj cʼajtiben lac bʌ: «¿Am ba majqui wen lojwem tiʼ caj ili alas? ¿Cujilʌch ba jiñi alas yicʼot añʌch ba c chaʼan muʼ bʌ j cʼʌn chaʼan maʼañic mic low c bʌ? ¿Chuqui i wocolel mi tsaʼ yajliyon tiʼ caj mach weñic tsaʼ c chaʼle alas? ¿Maʼan ba mi caj c taj wocol o muʼ ba i mejlel c sʌt j cuxtʌlel?».

Mi juntiquil xñoptʼan miʼ yʌcʼ ti wocol i cuxtʌlel tiʼ caj chaʼan alas, miʼ mejlel i yʌcʼ ti wocol cheʼ bajcheʼ an yicʼot Jehová, i cheʼ jaʼel tajol maʼañic miʼ mejlel i taj i yeʼtel ti congregación (1 Timoteo 3:2, 8-10; 4:12; Tito 2:6-8). Jin chaʼan, cheʼ bʌ juntiquil xñoptʼan yom i chaʼlen alas o i mel i ñusaqʼuin, yom miʼ ñaʼtan bajcheʼ yilal miʼ qʼuel Jehová jiñi laj cuxtʌlel.