BIBLE THLIR DAN

“NUNNA ATANA HLAUHAWM INFIAMNA”—Nunna Atâna Hlauhawm Kawpin I Infiam Ang Em?

“TUN HMAIN MITE CHUAN PARACHUTE AṬANGA ZUAN THLAK TE, TLANG SANG TAK AṬANGA ZUAN THLAK TE, TUI KHAWHTHLA-LENGKIRA LAWNGLENG KHALH TE, LEH HRINGEI SHARK SANGHAPUI AWMNA HMUNA TUI LILUHTUTE CHU A SIRAH ṬHUIN AN LO EN ṬHIN A, TUNAH CHUAN CHUTIANGA TELTUTE CHU AN TAM TULH TULH A NI.”—THE WILLOW GLEN RESIDENT NEWSPAPER.

CHU chuan infiamna lam ngainatu an pung tulh tulh tih a târ lang a ni. Vân sâng aṭanga skydiving te, vûr tlânga lâwn te, parachute-a zuan thlâk te,leh sâng tak * aṭanga zual thlâk ang chi nunna atâna hlauhawm infiamnate chu a lâr chho hlein, mi tam takin an ngaina hle tih a târ lang a ni. Vûr tlânga tawlh te, tlânga thirsakawr khalh te, leh skate chuanna pheikhawkte chu, tlâng khâm sâng tak aṭanga zuan thlâk nâna hmangin mi mal tihtheih chin tâwk aia nasa tih nân an hmang a. Time magazine chuan, chawlhkâr tâwpa infiam thînte leh nun thâpa infiam ṭhînte chuan an phûrna tihso sâng chhoh nân an thiamnate hmangin “nunna atâna hlauhawm infiamna”—mi mal nunna atâna hlauhawm tak infiamna—chu an infiam ṭhîn a ni,” tiin a sawi.

Chu bâkah, chûng infiamnate chuan mahni inhliamnate pawh a thlen a ni. Him taka infiamna tam tak a awm laiin nun atâna hlauhawm infiamnaa an tel avânga inhliam an tam tawlh tawlh a. United States ramah kum 1997 chhûngin skateboarding avânga inhliam chu zaa 33, vûr tlâng tawlhna avânga inhliam chu zaa 31, leh tlâng lâwnna avânga inhliam zaa 20 chu emergency-room-ah dah an ni. Nun atâna hlauhawm infiamna chi danga an tel avângin thi tam tak an awm bawk. Chutianga infiam nuam titute chuan nun atân a hlauhawm tih an hria a. Nun atâna hlauhawm tak vûr tlenga infiam ṭhîn hmeichhe pakhat chuan: “Rilruah tûn ṭum chu nunna ka châng thei tiin ka ngaihtuah reng ṭhîn,” tiin a sawi. Snowboard chuang thiam tak pa pakhat chuan “hliam na tak i neih loh chuan i la zir tam tâwk lo tihna a ni,” tiin a sawi.

Chûng thilte aṭang chuan, engtin nge Kristiante chuan nun atâna hlauhawm infiamna chu an thlîr ang? Nun atâna hlauhawm infiamnaa kan tel dâwn leh dâwn loh chungchânga thu tlûkna siamnaah engtin nge Bible-in min ṭanpui theih? Nunna thianghlimna zahna chungchânga Pathian ngaih dânte ngaihtuahna chuan hêng zawhnate chhânna hre tûrin min ṭanpui ang.

Nunna Chungchâng Pathian Thlîr Dân

Bible chuan Jehova chu “nunna tuikhur,” tiin min hrilh a. (Sâm 36:9) Mihringte a siam mai bâkah, nuam taka nun kan hman theih nâna kan mamawhte chu phal takin min pe a ni. (Sâm 139:14; Tirh. 14:16, 17; 17:24-28) Chuvângin, hmangaih taka min pêkte ngai hlu tûra min beisei chu thil inâwm tak a ni. Israel hnam tâna a pêk Dân leh thu bulte chuan A ngaih dânte hre thiam tûrin min ṭanpui a ni.

Mosia Dân chuan mi chu mi dangte nunna vênghim tûrin a phût a. Chu dân chu kan zawm loh avânga miin nunna a chân a nih chuan tualthattu anga ngaih kan ni ang. Entîr nân, in thar satu chu a in chung leh bang hual vêl chu pala hung tûra phût a ni a. Chu dân a zawm loh avânga tuemaw tla palh a, a thi a nih chuan in neitu chuan thisen mawh chu a phur ang. (Deuteronomy 22:8) Rin loh takin sebâwngpain mi a sîkhlum chuan bawngneitu chuan mawh a phur lo vang a. Mahse, sebâwngpa chu nunna atân a hlawhawmin, a neitu pawh hriattîr a nih a; mahse, ani chuan ṭha taka sebâwngpa chu a enkawl a, a khung loh avânga tuemaw a silum a nih chuan, sebâwng neitu chu thisen mawhphurtu anga ngaih a ni ang a, tihhlum theih a ni. (Exodus 21:28, 29) Jehova chuan nunna chu a ngaihhlut êm avângin a Dân pêkah chuan nunna chhanhim leh venhim a duhzia chiang takin a târ lang a ni.

Pathian chhiahhlawh rinawmte chuan chûng thu bulte chu nun atâna hlauhawm thiltihte nên a inkungkaih tih an hria a. Bible ziak pakhatah chuan Davida’n “Bethlehem-a tuichhunchhuah tui, kulh kawngkhâr kianga mi,” in a châk thu a sawi a. Chutih hun lai chuan Bethlehem chu Philistia mite thuneihna hnuaiah a awm a ni. Davida ngenna hretu a sipai huaisen pathumte chuan Philistia mite riah hmun chu tâwn tlangin, kulh kawngkhâr bula Bethlehem-a tuichhunchhuaha tui chu va chawiin Davida hnênah an rawn thlen a. Engtin nge Davida’n a chhân lêt? Tui chu a in lo, chu aiin, leiah a leih bua a. Ani chuan: “Hei hi ka in loh tûrzia mai chu: hêng thih huama inpehote thisen chu ka in dâwn em ni? Thih huama inpein an rawn la a ni si a,” a ti a ni. (1 Chronicles 11:17-19) Davida chuan a lungawihna tûrin an nun a thâp tih a hre ngei ang.

Inlârna pakhatah chuan Diabola’n Isua chu Pathian biak in chhîp aṭanga ṭum thla tûra hrilh a, vântirhkohte’n inhliam lo tûrin an vênghim ang che tia a thlêm khân, Isua chuan chutiangin a chhâng lêt a ni. Isua chuan: “Lalpa i Pathian fiah suh,” tiin a chhâng a. (Matthaia 4:5-7) Ni e, Davida leh Isua chuan nun atâna hlauhawm thei thilah ṭûl lo taka inhman chu Pathian mithmuhah a dik lo tih an hre chiang hle.

An entawn tûr siamte chu rilruah vawng tlatin, heti hian kan ngaihtuah thei a ni: ‘Nun atâna hlauhawm infiamna, a nih loh leh infiamna hlauhawm tak anga kan ngaih tûrte chu eng ang infiamnate nge ni? Intihhlimna pângngai tak pawh ni se, eng ang infiamna hi nge nun atâna hlauhawm thei a, hlauhawm lo thei tih chungchângah engtin nge thu tlûkna kan siam ang?’ tiin.

Nun Hlauhawma Dah Chu A Manhla Em?

Kan tui zâwng infiamnate chu ngun taka ngaihtuahin kan enfiah tûr a ni. Entîr nân, heti hian kan inzâwt thei a ni: ‘He infiamna avâng hian mi eng zât nge chesual tawh? Inhliam lo tûrin zir ngun emaw, invênhimna hmanraw emaw a mamawh em? Ka tlu palh emaw, rin loh takin ka zuang palh emaw, a nih loh leh ka invênhimna hmaraute a chhe palh emaw a nih chuan eng thil nge thleng thei? Hliam tê nau mai nge ni ang a, hliam na tak, a nih loh leh nun chânna hial pawh a thlen zâwk?’ tiin.

Intihhlimnaa ṭûl taka nun thâpna chuan Kristian dikte chu Jehova nêna an inlaichînna a nghawng theih bâkah, kohhrana chanvo hlu an dawnna tûr pawh a dâl thei a ni. (1 Timothea 3:2, 8-10; 4:12; Tita 2:6-8) Intihhliamna thiltiha kan tel hunah pawh, Kristiante chuan Siamtuin nunna chu thil thianghlim anga a thlîr dân chu an ngaihtuah tûr a ni tih a chiang hle.

[Footnote]