Biiblã sẽn yete

Reem nins sẽn tõe n wa ne sãmpogrã: Y tõe n deem-b lame bɩ?

“RŨNDÃ-RŨNDÃ, TÕND SƲKÃ NEB WƲSG BASA ZĨ-N-GETẼ WÃ TƖ LEBG BÃMB MENSÃ N NA N YƖK SƖLG PƲGẼ NE PARASIT N SIGI, N NA N DƲ TẼN-LUG-LUG ZUGU, N NA N KẼ KOOM-KOGLG N TŨ KOOM SẼN ZOET NE PÃNG N SIGDA, WALL B KẼ KOOM SẼN PID NE RẼKẼ-RÃMB PƲGẼ.”—YAA ZƲRNALL B SẼN BOOND TƖ WILLOW GLEN RESIDENT N YEEL WOTO.

GOM-KÃENSÃ wilgda bũmb neb wʋsg sẽn wae n maand yĩn-wɩsgrã wɛɛngẽ. Neb wʋsg sẽn nong reem wala yɩk silg pʋg ne parasit n sigã, rʋ galaas sẽn yaa wa tãngã, la reem ning b sẽn boond tɩ so de baazã a wilgdame tɩ rũndã-rũndã nebã nonga reem sẽn tõe n tũ ne b yõore. Bũmb nins b sẽn tar n salgd galaasã zug n sigdã, wiid nins b sẽn tar n kẽnd tãensẽ wã, bõn-pakls nins sẽn tar nao tɩ b tar n deemdẽ wã, la neooda nins sẽn tar naoã maaname sẽn na yɩl tɩ ned tõog n maan bũmb sẽn yɩɩd a pãnga, wala yi tãng sẽn yaa sel zug n sigi, n dʋ tãng sẽn yaa lug-lug zugu, wall a yɩk zĩig sẽn yaa zãntg wʋsg n sigi. Yaa wa zʋrnall a ye (Time) sẽn yeelã. Neb wʋsg sẽn nong reem nins sẽn tõe n wa ne sãmpoagã, rat n yeel tɩ reem nins sẽn kɩtd tɩ ned vɩɩm be yell pʋgẽ wã, wilgdame tɩ neb milyõ-rãmb reemda ne kũumã. “Sẽn deemd-b reem-kãensã sẽn ne tɩ b vɩɩmã bee yell pʋgẽ wã kẽesd-b-la rabeem tɩ b tʋmd ne b minimã wʋsgo. Rẽ kɩtdame tɩ sẽn maand-b rẽ wakat-wakat balã, ne sẽn dɩk-b rẽ tɩ lebg b tʋʋmdã getẽ tɩ b maanda bũmb sẽn yɩɩd b pãnga.”

La baa ne neb wʋsg sẽn nong reem-kãensa wã, sãmpoagã sõor tara paasgo. Neb wʋsg n pogl reem sẽn pa maneg n yaa wẽng pʋgẽ, b sẽn maan tɩ loog noor yĩnga. Yʋʋmd 1997 wã, Etazĩni soolmã pʋgẽ, neb sẽn kẽng logtor yir ne sãmpogre, b sẽn deem ne bõn-pakls nins sẽn tar nao wã yĩngã sõor paasa 33 koabg zugu. Sã n yaa ne sẽn pogl-b ne bũmb nins b sẽn tar n salgd galaasã zug n sigdã, bãmb sõorã paasa 31 koabg zugu, tɩ sẽn dʋ-b tãens n poglã sõor paas 20 koabg zugu. Sã n yaa ne reem a taaba, wẽnemã yɩɩda woto. Neb nins sẽn lʋɩt n kiidẽ wã sõorã sẽn paasdã wilgda rẽ. Neb nins sẽn deemd reem-kãensã mii woto fãa. Pag a ye sẽn deemd reem a woto buud yeelame yaa: “Wakat fãa, mam tagsda kũum yelle.” Rao a ye sẽn dɩk reem a woto buud tɩ lebg a tʋʋmd yeelame: “F sã n pa pogendẽ, wilgdame tɩ f pa maand ne f sũur fãa ye.”

Sẽn yaa woto wã, kiris-nebã tags segd n yɩɩ wãn ne reem a woto buud reengo? Wãn to la Biiblã tõe n sõng tõnd tɩ d yãk d sã n na n deema reem sẽn tõe n wa ne sãmpogr bɩ d pa na n deeme? D sã n bao n bãng Wẽnnaam tagsg sẽn yaa a soab ne vɩɩmã, tõe n sõng-d lame tɩ d paam sogs-kãensã leoore.

Wẽnnaam tagsg sẽn yaa a soab ne vɩɩmã

Biiblã yeelame tɩ yaa a Zeova “nengẽ la vɩɩmã yita.” (Yɩɩn-sõamyã 36:9) Woto rat n yeelame t’a sẽn naan ninsaalbã toog sẽn ka be, a maanda bũmb toor-toor sẽn na yɩl tɩ d paamd bũmb nins sẽn yaa tɩlɛ ne d vɩɩmã. (Yɩɩn-sõamyã 139:14; Tʋʋma 14:16, 17; 17:24-28) Rẽnd zemsame tɩ d tags t’a ratame tɩ d kogl bũmb ning a sẽn maan-d neer n kõ-dã. Noy la sagls nins a sẽn da kõ Israyɛll nebã sõngda tõnd tɩ d bãng rẽ vẽenega.

A Moyiiz Tõogã ra wilgame tɩ ned kam fãa segd n maana bũmb toor-toor sẽn na yɩl n kogl a taabã vɩɩm. Ned sã n da pa maan woto tɩ tũ ne a to yõore, sẽn yɩ-a sabab tɩ yel-beedã wa wã ra tara taale. Wala makre, ned sã n da me ro-paalga, a ra segd n mee lal-bil roogã zug b sẽn boond tɩ kogre. A sã n da pa maan woto tɩ ned rʋ roogã zug n lʋɩ n ki, zĩim taal da bee roogã zugu. (Tõodo 22:8) Loalg sã n da tiig n tãag ned t’a ki, b ra pa segd n ning loalgã soab taal ye. La loalgã sã n da minim n tãadame tɩ b togs loalgã soab t’a pa loe-a, tɩ rẽ poor tɩ loalgã tãag neda, b ra tõe n ninga loalgã soab taale, n kʋ-a. (Yikri 21:28, 29) Sẽn mik tɩ vɩɩmã tara yõod wʋsg a Zeova nifẽ wã yĩnga, Tõog ning a sẽn da kõ wã wilgdame tɩ d pa segd n deem ne vɩɩmã koglg ye.

Neb nins sẽn maand sɩd ne Wẽnnaamã miime tɩ no-kãensã wilgdame me tɩ d pa segd n maan bũmb sẽn na n ning d vɩɩmã yell pʋgẽ ye. Biiblã kibar a ye wilgame tɩ daar a yembre, a Davɩɩd yeelame t’a ra nongẽ lame n paam “bulg ning sẽn be Betlehɛm noorã” koom n yũ. Wakat kãng tɩ Betlehɛm yaool n da bee Filisti nebã nugẽ. A Davɩɩd tãb-biis a tãab sẽn wʋm a goamã, b kẽe Filisti nebã tãb-sikẽ wã ne pãnga, n pɩʋʋg n ta bulgã sẽn be Betlehɛm noorã, n yõng koomã n wa kõ a Davɩɩde. A Davɩɩd manesem yɩɩ wãna? A pa sak n yũ koomã ye. A rɩk-a lame n daag tẽnga. A yeelame: “Mam Wẽnnaamã yĩnga, mam kõn saag n maan bõn-kãngã ye! Mam na yũ nin-kãensã sẽn gẽneg b yõyã zɩɩm? Bala bãmb gẽnega b yõyã n tɩ yõng koomã n wa.” (1 Kibayã 11:17-19) Sã n yaa ne a Davɩɩde, pa zems t’a kɩt tɩ ned ning a vɩɩm yell pʋgẽ, yẽ mengã sũ-noog yĩng ye.

A Zeezi me talla manesem a woto, Sʋɩtãanã sẽn wa n mak-a n yeel t’a bas a meng n yi wẽnd-doogã zug n lʋɩ, n ges malɛgsã pa na n kok-a t’a ra poglã. Tõe tɩ Sʋɩtãanã tũnuga ne vẽnegre, n maan woto. A Zeezi leokame yaa: “Yãmb pa segd n mak yãmb Wẽnnaam a Zeova ye.” (Matiye 4:5-7) Rẽnd a Davɩɩd ne a Zeezi fãa sak n deegame tɩ Wẽnnaam nifẽ, pa zems tɩ d maan bũmb sẽn tõe n ning ninsaal vɩɩm yell pʋgẽ tɩ yaool n pa tɩlɛ ye.

D sã n tags mak-sõng ning b sẽn kõ-dã yelle, d tõe n soka d meng yaa: ‘D maanda wãn n bãng reem sẽn yaa sõma la reem sẽn yaa wẽng n bake? Sẽn mik tɩ baa reem nins sẽn yaa sõma wã tõe n waa ne yelle, d sã n maan tɩ loog noorã, d maanda wãn n bãng d sẽn na n deem tɩ zems to-to?’

Bõe yell la d segd n tagse?

Sẽn wa n yaa reem ning fãa la d yãk n dat n deeme, d sã n fees d meng ne pʋ-peelem, d bãngda reemã sã n yaa sõma bɩ pa sõma. Wala makre d tõe n soka d meng yaa: ‘Neb nins sẽn pogend reem-kãngã pʋgẽ wã sõor yaa wãna? Mam tara bãngr tɩ seke, wall m tar teed nins m sẽn dat sẽn na yɩl n kogl m meng n da wa paam sãmpogrã bɩ? Mam sã n lʋɩ, wall m sã n pa bãng n yɩk tɩ zemse, pa rẽ bɩ teed nins m sẽn tar n kogend m mengã sã n sãame, bõe n tõe n maane? Tõe n waa ne sãmpogr sẽn yaa bilfu, sãmpogr sẽn yaa kãsenga, wall kɩt tɩ m ki meng bɩ?’

Kiris-ned sã n ningd a vɩɩmã yell pʋg reem yĩnga, tõe n sãama yẽ ne a Zeova zoodã sẽn tar yõod wʋsgã, la kɩt me tɩ b pa tõe n yãk-a t’a tʋm tʋʋm kẽer tigingã pʋgẽ ye. (1 Tɩmote 3:2, 8-10; 4:12; Tɩte 2:6-8) Rẽnd baa kiris-nebã sã n wa reemdẽ, b segd n tẽegdame tɩ vɩɩmã yaa sõng wʋsg Naandã nifẽ.

[Tẽngr note]