Oborẹ Baibol na ta kpahọn

“Ehaẹha rọ vrẹka”​—Ofori nẹ Wo Vwobọ Vwọ?

“NONẸNA, IHWO BUEBUN RUẸ VRẸ AYEN DI VWO NUGHE RẸ EHAẸHA RI MUOSHỌ KERẸ A VWỌ VWẸ IPARASHUTU VWO PHO NẸ ASAN RO KPENU CHA, E VWO YERẸN UGBENU, E VWO BIOKỌ WAN AME RO HWẸ NẸ ORAGHA RO KPENU CHA KUGBE A VWỌ RHẸRHẸ VẸ ERIN RE SE ISHAKI, ENẸNA, KẸ AYEN VWOBỌ VWẸ AYEN KERẸ EHAẸHA GHEVWEGHE.”​—ỌBE RỌ GHWA IYẸNRẸN RE SE WILLOW GLEN RESIDENT.

OTA rẹ obenu na yen ghwa hẹ obo ri sherhe vwẹ ehaẹha enẹna. Ehaẹha ri muoshọ tiọna titiri mamọ nonẹna. Ihwo vwobọ vwẹ ehaẹha ri muoshọ kerẹ e vwo ru erọnvwọn sansan ri muoshọ vwẹ enu rẹ okada, skating board vẹ Snowboard. Vwo nene oborẹ Time magazine tare, “ehaẹha re vrẹka”​​—rọ dia ehaẹha rẹ ihwo ri vwobọ vwọ vwo phi arhọ rayen phiyọ ẹdia rẹ imuoshọ​​—titiri kidie iduduru rẹ ihwo buebun guọnọ vwobọ vwẹ erọnvwọn ri muoshọ rere ayen vwo phi oshọ rayen kparobọ je riavwerhen rẹ erọnvwọn kpokpọ.

Ehaẹha tiọnana vwo titẹ phiyọ ye, ọtiọyen omaẹkuọn rayen ji buẹnphiyọ. Ihwo re kuoma ki buenphiyọ buẹnphiyọ kidie ihwo re ha eha ri ghwe vwo imuoshọ-ọ, ruo vwẹ idjerhe rọ vrẹka. Vwẹ uvwre rẹ ukpe ri 1997 vwẹ United States, uche ihwo re wonma re muẹ cha họspito fikirẹ omaẹwan rẹ skateboard soro, vwẹ ẹkẹn 33 vwo bun vrẹ obo ri jovwo, ihwo re wonma fikirẹ snowboard vwẹ ẹkẹn 31 vwo bun vrẹ obo ri jovwo, ihwo re rha wonma fikirẹ ugbenu eyeren da rha vwẹ ẹkẹn 20 vwo bun vrẹ obo ri jovwo. Omaẹkuọn rẹ ehaẹha efa ri muoshọ sua yen tobọ ma bra, ọtiọyen ji te uche ihwo ri ghwẹ vwẹ ayen. Ihwo ri titẹ ehaẹha nana riẹnre nẹ ọ vọnre vẹ imuoshọ. Aye ọvo ro vwobọ vwọ ehaẹha ọvo ro muoshọ re se skiing da ta: “Me riẹnre nẹ mi se ghwu vwọ.” Ọshare ọvo rọ tẹn ona ri snowboard de ku ota na phiyọ rọ vwọ ta nẹ “wọ rha wonma vwọ-ọ, kọyen wọ davwan te-e.”

Avwanre rhe vwọ riẹn re nẹ ehaẹha nana vọnre vẹ imuọshọ na, ofori nẹ Onenikristi vwobọ vwẹ ayen? Mavọ yen Baibol na sa vwọ chọn avwanre uko vwo brorhiẹn sẹ e vwobọ vwẹ ehaẹha re vrẹka? A da fuẹrẹn oborẹ arhọ ghanre te vwẹ ẹro rẹ Ọghẹnẹ, ọ cha chọn avwanre uko vwọ kpahenphiyọ enọ nana.

Ẹro rẹ Ọghẹnẹ Vwo ni Arhọ

Baibol na vuẹ avwanre nẹ obọ ri Jihova “ọye ogbugbu rẹ arhọ epha.” (Une Rẹ Ejiro 36:9) Vwọ vrẹ ẹma rọ ma avwanre, ọ je kẹ avwanre erọnvwọn ra guọnọre a sa vwọ riavwerhen rẹ akpeyeren. (Une Rẹ Ejiro 139:14; Iruo Rẹ Iyinkọn Na 14:​16, 17; 17:​24-​28) Ọnana djephia nẹ o rhẹro rọyen nẹ a cha vwẹrote okẹ rẹ arhọ rọ vwọ kẹ avwanre na. Ọ vwẹ irhi kẹ emọ rẹ Izrẹl ro djephia nẹ arhọ pha ghanghanre vwọ kẹ.

O vwo irhi evo vwẹ Urhi ri Mosis re tare nẹ ohwo cha jowọ evo ọ sa vwọ sẹro rẹ arhọ rẹ ihwo efa. Ohwo ọvo vwẹ Izrẹl rha yọnrọn irhi nana-a, ohwo de ghwu fiki rọyen, kọyen ohwo rẹ Izrẹl yena rọ yọnrọn urhi na-a riabe rẹ ọbara re. Kerẹ udje, e jurhi kẹ ohwo rọ bọn uwevwin kpokpọ nẹ ọ bọn igbẹhẹ otete riariẹ akọkọ rẹ ebọn rẹ uwevwin rọyen na. O rhe ruo-o, ohwo ko she nẹ enu rẹ ebọn rẹ uwevwin rọyen na rhe o de ghwu, a cha yọnrọn ohwo ro vwo uwevwin na suọ. (Urhi Rivẹ 22:8) Erhuẹn da vwẹ ighoro rọyen dje ohwo ghwu kpregede, a cha yọnrọn ohwo ro vwo erhuẹn na suọ-ọ. Ẹkẹvuọvo, ọ da dianẹ erhuẹn na vwo uruemu rọ vwọ vwẹ ighoro rọyen vwo dje ihwo, e ji si ohwo ro vworo orhọn kpahọn jovwo re jẹ o ru emu vuọvo kpahọ-ọn, erhuẹn na de dje ohwo ghwu, kọyen ohwo ro vworo na riabe rẹ ọbara re, ọtiọyena ke hwe phiyọ. (Eyanno 21:​28, 29) Jihova vwẹ irhi nana kẹ emọ rẹ Izrẹl kidie arhọ ghanre kẹ, ọ je guọnọ nẹ ihwo efa no ghanghanre je sẹro rọyen.

Idibo rẹ Ọghẹnẹ re fuevun riẹnre nẹ irhi nana ji churobọ si e vwo phi arhọ romobọ rẹ ohwo yẹrẹ ọ rẹ ihwo efa phiyọ ẹdia rẹ imuoshọ. Vwẹ ikuegbe ri Baibol ọvo, Devid da ta ọdavwẹ rọyen phia rọ vwọ ta: “Manẹ ka mrẹ ohwo ọvo ro vo ame kẹ vwẹ da vwẹ orhare ri Betlẹhẹm.” Betlẹhẹm hẹ otọ rẹ usuon rẹ ihwo ri Filistia vwẹ ọke yena. Eshare erha vwẹ usun rẹ isodje rọyen de duvwun uyovwin ro erhọn rẹ isodje ri Filistia na re vo ame nẹ orhare rẹ Betlẹhẹm na rhe Devid. Die yen Devid ruru? Ọ da ame na-a, ukperẹ ọtiọyen o kuro kuotọ. Ọ da ta: “A sa mrẹ nẹ mi ru emu nana vwẹ obaro rẹ Ọghẹnẹ-ẹ. Me da ọbara rẹ ihwo nana? . . . Ayen ku uyovwi rayen kufia ra reyọ ame na.” (1 Ikun Rivie 11:​17-​19) Vwọ kẹ Devid, ọyen emu ọbrabra o vwo phi arhọ rẹ ihwo efa phiyọ ẹdia rẹ imuoshọ fikirẹ ojevwe romobọ rọyen.

Jesu senre ọke rẹ Idẹbono vwọ davwọn ni, rọ vwọ vuẹ nẹ o pho nẹ enu rẹ uwevwin rẹ ẹga na sẹ emekashe na cha ya, o vwo jẹ oma ẹwan. Jesu da kpahen kẹ: “Wọ davwẹ Ọrovwohwo Ọghẹnẹ wẹn nẹ-ẹ.” (Matiu 4:​5-7) Devid vẹ Jesu mrẹvughe nẹ ọ chọre vwẹ ẹro rẹ Ọghẹnẹ ayen vwo phi arhọ rayen yẹrẹ ọ rẹ ihwo efa phiyọ ẹdia rẹ imuoshọ.

Vẹ idje nana vwẹ ẹwẹn, avwanre se roro, ‘Mavọ yen avwanre sa vwọ riẹn ehaẹha rẹ imuoshọ hepha? Ọ vwọ dianẹ ehaẹha evo ghwe vwo imuoshọ-ọ, jẹ a sa ha vwẹ idjerhe rọ da so imuoshọ, kẹ, mavọ yen a sa ha eha tiọyen wan o de jẹ imuoshọ ẹsuọ kẹ avwanre?’

Ọ Ghene Ghanre?

E se vwo bru omamọ orhiẹn vwẹ ẹdia nana ofori nẹ a nabọ roro kpahen oka rẹ ehaẹha ra guọnọ vwobọ vwọ na. Kerẹ udje, a sa nọ oma rẹ avwanre, ‘A wan oma mamọ vwẹ ehaẹha nana? A nabọ yono uvwe obo ra ha eha na wan mi vwo jẹ oma ẹwan gbanẹ mi vwo ekuakua re me sa vwọ serọ rẹ oma mẹ nẹ omaẹwan vwẹ eha na? Mi de she yẹrẹ mi de pho chọ yẹrẹ ekuakua ra vwọ sẹro rẹ oma ri mi vwo ruiruo de miovwin vwo, me cha de kuon oma emerha, gbanẹ omaẹwan na cha rho gbanẹ mi se ghwu dede?’

Onenikristi da vwẹ arogba vwo vwobọ vwẹ ehaẹha ri muoshọ, o se miovwo oyerinkugbe rọyen vẹ Jihova, ọ je cha dia omamọ rẹ udje vwọ kẹ ihwo vwẹ ukoko na-a. (1 Timoti 3:​2, 8-​10; 4:​12; Taitọs 2:​6-8) Ọtiọyena, e de tobọ vwobọ vwẹ ehaẹha, ofori nẹ Inenikristi roro kpahen oborẹ arhọ ghanre te vwẹ ẹro ri Jihova.